Job 32
32
Nabey ch'owen richin ri Elihú
1Y roma ri Job kan nutej ruq'ij richin nuk'ut chi maneq rumak, ri Elifaz, ri Bildad y ri Zofar, ri e oxi' rachibil, xa xetane' qa richin nikik'uluba-apo ri ruch'abel. 2Y k'o k'a jun ala' rubini'an Elihú, ruk'ajol ri Baraquel ri aj-Buz, ri peteneq chupan ri rijatzul ri jun achin rubini'an Ram, re ala' re' xyakatej royowal chirij ri Job, roma kan nutej ruq'ij richin nubij chi kan maneq rumak chuwech ri Dios, y chirij ri Dios nuya-wi ri tijoj-poqonal ri nuk'owisaj. 3Keri' chuqa' kan xpe royowal chike ri e oxi' rachibil, roma man jun chik nikil richin nikibij chire ri Job, stape' xkiben chire ri Job chi kan aj-mak-wi. 4Ri Elihú kan man nich'on ta k'a apo rokik ri e oxi' rachibil yetajin yech'on rik'in ri Job, roma rije' kan e nimalaxela' chuwech rija'. 5Jak'a toq xutz'et ri Elihú chi kan man jun chik k'a yetikir nikibij re e oxi' achi'a' re', jari' toq xyakatej janila royowal. 6K'ari' xch'on-apo y xubij:
Yin xa kan k'a in ak'ual na y rix kan k'o chik ijuna';
roma ri' kan ninxibij-wi' e nubin-apo ch'abel,
kan man e nuq'alajirisan ta apo ri yench'ob.
7Yin kan nuchobon k'a chi roma kan k'o chik k'iy kijuna',
kech'on na rije' nabey, roma ri kan k'iy chik kijuna', más k'iy na'oj ri yetikir nikiq'alajirisaj.
8Jak'a xa man keri' ta, ri wineq k'o runa'oj roma kan ja ri Dios ri xya'on chire toq xuya' ruk'aslen,
kan ja ri Dios ri k'o ronojel uchuq'a' pa ruq'a', ri xya'on na'oj chire toq xuxupuj k'aslen rik'in.
9Man xaxe ta k'a ri winaqi' ri e rijita'q chik ri k'o na'oj kik'in,
man xaxe ta ri kan k'o chik k'iy kijuna', ri yetikir yenojin pa ruchojmilal.
10Y roma ri' toq ja yin k'a ri xkich'on re wakami: Kan kiniwak'axaj k'a,
kan tiya' k'a q'ij chuwe richin ninq'alajirisaj ri yitikir ninnojij.
11Yin kan man xinwil ta k'a achike xinben, richin xich'on yan ta, rokik rix jari' yixch'on,
kan xinwak'axaj k'a ri rubanik ri ich'obonik rix,
kan xinwoyobej k'a, rokik xe'ikanola' achike chi tzij ri yixtikir nibij.
12Yin kan jebel k'a xinya' nuxikin chire ronojel ri xibij yan,
kan man jun k'a chiwe rix tikirineq ta ruq'alajirisan jebel chi ri Job kan aj-mak-wi,
kan man jun chiwe rix tikirineq ta ruk'uluban ri ruch'abel ri Job.
13Tiq'ata' k'a iwi' richin nibij: Roj kan qilon chik ri na'oj,
roma xaxe ri Dios ri ruk'amon chi nik'uluban ri ruch'owen ri Job.
14Xa ta yin xik'uluban ri rutzij ri Job, kan man ta xenbij ri ch'abel ri xibij rix chire,
jak'a ri Job xa man wik'in ta yin nich'on-wi, xa iwik'in rix.
K'ari' xch'on-apo rik'in ri Job y xubij chire:
15Job re e oxi' achi'a' re' xa kan e ch'akatajineq chik,
xa man nikil ta chik ch'abel richin nikik'uluba' ri ach'abel,
kan man jun chik ch'abel ri yetikir nikibij.
16¿Y kan k'o kami chi ninwoyobej y man jun ch'abel ri ninbij?
Roma rije' xa man jun chik ch'abel ri nikibij,
xa choj chik e pa'el keri' y man jun chik nikibij richin nikik'uluba' ri ach'abel.
17Roma ri' yin kan man jun chik k'a ri ninwoyobej, wakami ja yin k'a ri xkich'on,
kan xtinq'alajirisaj k'a ri achike ri wetaman yin.
18Roma kan janila ch'abel k'o wik'in,
y ri wánima kan nuben chuwe chi tinbij ronojel re'.
19Roma ri' ninna' chi ri wánima kan nibos yan,
kan achi'el ri tz'um ri k'o vino k'ak'a' chupan,
y man jun akuchi nel-wi ri ruxla'.
20Kan janila k'a ninwajo' richin chi yich'on yan, richin keri' kan xkich'uch'u'.
Xtinjeq k'a ri nuchi', y xtinbij ri k'atzinel chi ninbij.
21Re xkich'on k'a re wakami, kan junan k'a ri xtinben chiwe.
Kan man jun k'a ri xtinya-q'anej más ruq'ij.
22Roma xa ta ri nubanik yin, ja ri ninya-q'anej kiq'ij ri winaqi' richin chi yench'ek.
Xa ta in keri', ri Dios ri banayon wichin,
kan ta xirelesaj yan el chuwech re ruwach'ulew.
Currently Selected:
Job 32: KQC
Highlight
Copy
Compare
Share
Want to have your highlights saved across all your devices? Sign up or sign in
Kaqchikel Bible © Bible Society in Guatemala, 2003.
