Job 31
31
Ri Job nubij chi kan choj wi ri ruk'aslen
1Yin kan nujikiban nutzij,
chi kan man jun bey xtinrayij ta ruwech jun xten.
2Roma, xa ta yin nubanon ri nurayibel ri', ¿achike ta kami ri nuteq-pe ri Dios ri k'o ronojel uchuq'a' pa ruq'a' richin nuya' ruk'exel chuwe?
3Roma ri wineq ri kan maneq Dios chuwech, kan k'o-wi k'a tijoj-poqonal nuq'axaj,
kan nipe-wi ri wululen chirij roma kan itzel-wi ri ruk'aslen.
4Ri Dios kan retaman wi ri achike rubanik ri nuk'aslen yin,
rija' kan retaman k'a chikijujunal ri nuxaka'l ri ninya' chuwech re ruwach'ulew.
5Wi ta yin yibiyin chuwech re ruwach'ulew y ja ri man qitzij ta ri ninben,
o wi kan junanin yibe richin ninben richin nitzeqelibej ri q'oloj,
6kan kirupaja' k'a ri Dios rik'in jun etabel ri kan tz'aqet nipajon,
richin keri' ri Dios kan nretamaj k'a chi yin kan choj wi ri nuk'aslen.
7Y wi ta yin ninjel ri nubey y ninchop chik el jun ri xa man k'utun ta chinuwech,
wi ta yin kan nutzeqeliben ta ri yerutzu' ri wineq,
y wi yin kan in tz'ilobitajineq chik k'a roma ri man utz ta yeruchop-el ri nuq'a',
8wi ta keri', utz ta nrelesaj ronojel ri nutikon-qa y nuya' chike ch'aqa' chik,
y chuqa' ri nutikon-qa kan yek'uq-el chinuwech.
9Wi ta ri wánima ch'akon ta roma jun chik ixoq,
o wi ta yin kan woyoben ri rixjayil ri wachpochel, jampe' nel pe,
10wi ta keri', ri wixjayil xa utz ta chi niberilij y nuben ta ri nrajo' jun chik achin,
xa nibek'oje' ta pa ruch'at xabachike achin.
11Roma xa ta jari' ri nubanobal, kan mak ta ri nubanon
y kan ruk'amon ta richin yibepabex chuwech ri q'atoy-tzij y niya'ox ta ri rutojbalil ri numak.
12Ri mak ri' kan achi'el k'a jun nimalej y k'ayewalej k'atik ri kan nitikir nuporoj ronojel,
y kan nuk'is ronojel ri k'o wik'in.
13Wi yin man ta xinchojmirisaj ri kich'ojinik ri nusamajela',
wi man ta xinwak'axaj ri ruch'ojinik ri nusamajel achin y ri ruch'ojinik ri nusamajel ixoq, toq xe'oqaqa wik'in,
14wi man ta choj xinben kik'in ¿Achike ta kami ninben yin toq yibepa'e' chuwech ri Dios?
Y ¿achike ta kami ninbij chire toq rija' nuq'et-tzij pa nuwi' roma ri nubanobal?
15Roma ¿man ja ta kami ri Dios ri xtz'ukun-q'anej wichin rik'in ri nte'?
Y ri nusamajela', ¿man ja ta kami ri Dios ri' ri xtz'ukun chuqa' kichin rik'in ri kite' y junan qabanik xuben chiqe?
16K'ayew ta chuwe yin wi man ta xento' ri winaqi' ri xa man jun k'o kik'in,
o man ta xinto' ri malka'n ixoq ri k'o nik'atzin chire y roma ri' e sipojineq ta chik runaq' taq ruwech roma oq'ej.
17Kan man jun bey k'a nubanon chi kan xaxe ta wichin yin, ri k'o wik'in richin nintej,
xa kan nuya'on k'a chike ri maneq kite-kitata', richin man yewayjan yebe toq nikik'utuj chuwe.
18Yin, kan k'a pa nuk'ajolil-pe in okineq achi'el kitata' ri ak'uala' ri kan maneq chik kite-kitata'.
y kan jantape' k'a in okineq-pe kito'onel ri ixoqi' e malkani'.
19Toq yin kan xintz'et k'a jun wineq ri xa niken yan roma tew, roma maneq rutziaq, kan xinya' rutziaq ri nik'atzin;
toq xintz'et jun molonel ri man jun achoq ik'in nukuch-ri', kan xinya' chuqa' rutziaq ri nik'atzin chire.
20Y rije' kan janila k'a xematioxin, roma xinya' pim y meq'en taq kitziaq ri kan banon rik'in ri rusumal ri nukarne'l yin.
21Yin kan man jun k'a ri welesan ta chuwi-kiq'a' ri xa maneq chik kite-kitata',
stape' kan wetaman chi kan yinkito' ri yeq'aton-tzij chiri' pan okibel richin ri tinamit.
22Wi k'o ta welesan chike, xa ketzaq-el ri nuq'a' rik'in ri ruwi-nutele'n
xa keq'aj k'a el ri nuq'a' ri kitunun-ki' rik'in ri ruqul ri nuq'a'.
23Yin kan man yitikir ta ninben keri',
roma kan k'o xibinri'il richin ri Dios pa nuk'aslen, roma rija' kan nuya-wi ruk'ayewal;
kan man jun k'a yitikir ninben chuwech ri nimalej rubanik ri ruchuq'a' ri Dios.
Ri Job man xukuquba' ta ruk'u'x rik'in ri rubeyomel
24Yin kan man k'a xinkuquba' ta nuk'u'x rik'in ri q'anapueq, ri kan k'o-wi rajel,
y kan man jun bey ri xinbij ta chirij ri q'anapueq chi kan ninya' ri wánima rik'in.
25Ri nukikoten yin man xpe ta k'a roma ri nubeyomel,
chuqa' man xpe ta roma ronojel ri xinch'ek rik'in ri nuq'a'.
26Re' xa kan juba' man junan rik'in toq kan nintzu' ri nisaqirisan ri q'ij,
y toq niq'alajin chuqa' ri ik' rik'in ri rusaqil y kan jebel ok nitzu'un,
27yin kan man xinben ta k'a achi'el nikiben ri ch'aqa' chik winaqi' ri pan ewel,
y man xintz'ubaj ta ri nuq'a', richin jari' ri ninteq-q'anej chike ri q'ij y ri ik'.
28Wi ta kan xinben keri', kan mak ta chuqa' ri xinben y k'o chi xq'at ta tzij pa nuwi';
roma rik'in jun banobel keri', kan xink'ut ta chi maneq jun nimalej Dios ri k'o pa ruwi' ronojel.
29Yin kan man jun bey xikikot ta chirij ri etzelanel wichin roma k'o pa tijoj-poqonal,
kan man utz ta chuqa' xinna' toq xpe wululen chirij.
30Yin kan ninna' wi jebel chi man jun bey ximakun ta rik'in ri waq',
roma kan man jun bey xink'utuj ta kamik pa ruwi' ri etzelanel wichin.
31Konojel ri nusamajela' kan jebel xewa-xe'uk'ya' wik'in,
y man jun xbin chi man ta xnoj rik'in ri ti'ij ri xutej.
32Kan man jun chuqa' chike ri man e nuwinaq ta, ri xinya' ta q'ij chire chi pa bey ta xwer-wi kan,
ri winaqi' ri kan nej kibey y k'o chi xe'uxlan-el, kan jantape' k'a xenk'ul rik'in kikoten ri pa wachoch.
33Yin kan man jun bey nubanon ta chi wewan numak, achi'el nikiben ch'aqa' chik achi'a',
chi wewan ta pa wánima ri itzel taq nubanobal.
34Yin man nuxibin ta wi' chuwech ri achike nikibij ri winaqi',
ni man jun bey nutz'apen ta wi' pa wachoch roma ninxibij-wi chire ri nikibij chuwij.
35¡Kan ninrayibej k'a chi k'o ta jun ri nak'axan ronojel ri xinbij!
Ronojel re' kan nuch'abel wi yin, y kan pa nubi' k'a yin nibe-wi.
Wakami ja ri Dios ri k'o ronojel uchuq'a' pa ruq'a' ri tich'on pa nuwi',
ja rija' ri tibanon jun wuj ri nuq'alajirisaj ri nubanon yin.
36Y ri wuj ri' xtinya' chuwi-nutele'n y man xkik'ix ta xtink'uaj,
xtintelej k'a el pa nujolon, achi'el ta jun corona ri kan nitz'etetej jebel.
37Y yin kan xtinchol k'a chire ri Dios chikijujunal ri nubinibal chuwech re ruwach'ulew,
kan man jun k'a xibinri'il wik'in xkijel-apo chuwech, roma choj ri nuk'aslen.
38Ri wulew kan q'alaj chi man jun bey xe'oq' ta, roma man jun itzel banobel xinben.
ri boloj ri ek'o pa wulew kan q'alaj chuqa' chi man xebison ta;
39kan ronojel k'a ri xel chuwech ri wulew, man choj ta keri' xebe'el-pe,
kan xentoj ri nusamajela' achi'el ri ruk'amon chi nikich'ek, richin chi man yeken roma wayjal.
40Wi man ta keri' xinben, pa ruk'exel chi nel ta pe trigo pa wulew, xa kepe k'a k'ix,
y pa ruk'exel cebada, tel k'a pe itzel q'ayis, xcha' ri Job.
Ri Job nitane' chi ch'owen.
Currently Selected:
Job 31: KQC
Highlight
Copy
Compare
Share
Want to have your highlights saved across all your devices? Sign up or sign in
Kaqchikel Bible © Bible Society in Guatemala, 2003.
