Job 29
29
Ri Job noqaqa chuk'u'x ri kikoten ri xk'oje' rik'in ri pa nabey
1Ri Job xuchop chik jun rutzij y xubij:
2¡Janila ninrayij chi yitzolej ta chupan ri ka'i' oxi' ik' kan chuwij,
chupan ri q'ij toq kan ja wi ri Dios ri chajiyon wichin!
3Rik'in ri rusaqil rija' ri k'o pa nuwi',
yin kan xitikir k'a xiq'ax chupan ri ruq'equmal ri k'aslen re wawe'.
4Chupan ri q'ij ri' yin kan jebel nubanon,
y ri Dios kan in rachibil rubanon chuwe, y ruchajin jebel ri wachoch.
5Y ri Dios ri k'o nimalej uchuq'a' pa ruq'a', kan k'a k'o na wik'in yin chupan ri q'ij ri';
y ri walk'ual kan ek'o chuqa' pe naqaj chuwe.
6Ri q'ij ri' ri waqen kan yech'eqe' rik'in ri janila chi leche ri nikiya' ri nuwákix y ri nuk'arnel.
Chuqa' kan janila chi aceite richin olivo nibiyin-pe chikikojol ri abej ri akuchi niyitz'-wi.
7Noqaqa chinuk'u'x ri q'ij toq yin yibe k'a richin ninq'et-tzij, chiri' pan okibel richin ri tinamit.
8Toq niqamol-qi' chiri' richin niqaq'et-tzij,
ri wachibil ri k'a e alaboni' na juba' kan nikijech'ej-ki' chinuwech.
Y chuqa' ri wachibil ri kan k'o chik k'iy kijuna',
kan yepa'e-q'anej toq yinapon kik'in.
9Toq ri e tata'al yinkitz'et chi yinapon, yetane-qa chi ch'owen.
Rije' kan nikiben k'a retal chi man jun chik tich'on.
10Ri achi'a' ri kan k'o más kiq'ij yetane' richin yewolol.
Y keri' man xkik'is ta rubixik ri kich'abel.
11Ri winaqi' ri ye'ak'axan wichin
kan janila k'a yekikot, y utz yech'on chuwij.
Ri yetz'eton wichin rik'in ri nubanobal,
kan nikiq'alajirisaj k'a chi utz ri ninben.
12Rije' kan ketaman k'a chi yin xinkol ri nuk'utuj to'onik.
Y kan xenwilij k'a ri meba'i' ri man jun nito'on kichin.
13Roma ri nuto'onik, ri yeken yan kan xkoyoj k'a urtisanik pa nuwi'.
Y ri malkani' kan xebixan k'a roma kikoten.
14Ri chojmilal k'a ri e nubanon ri pa nuk'aslen,
kan yiruwiq k'a achi'el ri nutziaq.
Y ri nubanobal e choj, kan yinkikuch k'a,
achi'el nuben ri tzieq ri ninkusaj chuwij y ri pa nujolon.
15Yin kan xinok k'a achi'el kitzubal ri e moyi'.
Chuqa' kan xinok achi'el kaqen ri e jetz'.
16Kan xinok k'a achi'el jun tata'aj pa kiwi'
ri winaqi' ri man jun k'o kik'in.
Kan xinok k'a chojmirisey richin ri k'o nikik'uluwachij
ri winaqi' ri xa man e nuwinaq ta.
17Y chikikolik ri winaqi', yin kan k'o chi xench'ek ri maneq Dios chikiwech,
kan xenmajij k'a kan ri winaqi' chikiwech.
18Chupan ri q'ij ri', yin kan xinch'ob wi k'a pa wánima:
Pa buyul k'a ink'o pa nuch'at toq xkiken.
Ri nujuna' kan achi'el chik k'a ri sanayi' ri k'o chuchi' ri palou, toq xkibe.
19Chinuwech yin kan in achi'el k'a jun che',
y ri nuxe' kan jebel k'a nikiq'i-apo ri ya'.
Ri pa taq nuq'a', kan chi junaq'a' k'a nilie' ri raxq'ab ri niqaqa.
20Y ri nuq'ij y ri wejqalen, kan jantape' k'a beneq-q'anej pa jotol,
y ri nuk'aqbal-ch'ab kan jantape' k'a k'o ruchuq'a' y man k'ayew ta chinuwech richin ninjik'.
21Chupan k'a ri q'ij ri', ri winaqi' kan in koyoben k'a richin nikak'axaj ri ninbij,
kan yetane-qa chi ch'owen richin nikak'axaj ri nupixabanik.
22Y toq yin xitane' chi ch'owen chikiwech ri winaqi', kan man jun achike ta ri xkibij chuwij,
ri nuch'abel kan buyul-buyul k'a xapon pa taq kixikin.
23Rije' kan yinkoyobej k'a, achi'el nikiben ri winaqi' toq nikoyobej ri nabey job,
kan achike la k'a nuben ri kánima koyoben chi niqaqa ri job ri'.
24Y toq yin kan xtze'en k'a nuwech kik'in, man k'a xinkinimaj ta.
Man rik'in ri', roma xinkitzu' chi yikikot, kan k'o chuqa' kikoten xuk'en-pe chike rije'.
25Y ri winaqi' ri' kan xkitaqej k'a ri ch'abel ri xinya' chike,
y kan xitz'uye' k'a chikikojol achi'el jun aj-raqen.
Xinok achi'el jun rey chikikojol ri aj-labal,
y toq ek'o pa bis yin kan xinkuquba' k'a kik'u'x.
Currently Selected:
Job 29: KQC
Highlight
Copy
Compare
Share
Want to have your highlights saved across all your devices? Sign up or sign in
Kaqchikel Bible © Bible Society in Guatemala, 2003.
