Job 28
28
Ri achin ri nukanoj na'oj
1Kan qitzij na wi chi ri saqipueq kan k'o ri akuchi nik'ot-wi,
y chuqa' ri q'anapueq kan k'o ri akuchi nitzak-wi, richin nich'ajch'ojirisex,
2Ri q'eqapueq, nel-pe toq nitzak jun q'eq ruwech ulew,
y ri kaqapueq nel-pe toq yetzak jujun ruwech abej.
3Chuwech ri achin ri q'equ'm xa man jun, roma rik'in ruq'aq' richin saqil,
kan nitikir k'a nisamej k'a nej qa, chuxe' re ruwach'ulew
y stape' k'a pa q'equ'm ek'o-wi-qa ri abej, yebekila-qa y yekelesaj-pe.
4Nej chire ri akuchi ek'o wineq, chiri' yekiwop jul chuxe' ulew richin nikikanoj q'eqapueq,
rije' yek'oje' ri akuchi man jun wineq napon o niq'ax ta,
y richin yesamej e tzeqel chutza'n kolo', yebe-kela' yebe-kela' nikiben.
5Re pa ruwi' re ruwach'ulew, chiri' nel-wi ronojel ri niqatej
y jak'a ri pa ruk'u'x-qa, ri q'aq' kan niroqo.
6Ri relik taq abej kan ek'o k'a zafiro chupan,
y chupan ri ulew kan k'o k'a q'anapueq.
7Ri bey ri napon chiri', kan man tz'eton ta ni koma ri aj-xik' taq chikopi' ri yetijo ti'ij,
ri bey ri' ni ri xik kan man rutz'eton ta chuqa',
8Chiri' kan man jun bey k'a kiya'on ta kaqen ri k'uxunela' taq chikopi',
chiri' kan man jun bey k'a q'axineq ta chuqa' ri koj.
9Jak'a ri achin roma ri rusamaj stape' nril ri abej más kow, nuwulaj richin chi niq'ax
rija' kan nuwop ri kixe' ri juyu' y nitikir nupiskolij ri ulew kichin ri juyu' ri'.
10Kan nuben k'a rubey stape' kan chupan abej,
y ri ruwech kan yeril k'a ri jebelej taq abej y q'eqapueq.
11Kan nitikir k'a nril akuchi nitiker-wi-pe jun raqen-ya',
y kan yerelesaj-pe chuwa saqil ronojel ri yeril, ri kan man jun bey e tz'eton.
Ri rejqalen ri na'oj
12Jak'a ri na'oj, ¿akuchi kami nilitej-wi?
y ¿akuchi kami nilitej-wi ri etamabel richin netamex ri rukojolil ronojel?
13Ri achin kan man retaman ta k'a achike bey ri nuk'uan k'a chiri',
ri bey ri' kan man xtril ta re wawe' pa ruwi' re ruwach'ulew.
14Ri ruxe' ri nimalej taq palou kan nikibij chi man chiri' ta k'o-wi,
y ri nimalej taq palou kan nikibij chuqa' chi man chiri' ta k'o-wi.
15Y stape' kan q'anapueq nawajo' naya' chuwech ri na'oj, man xtawil ta,
ni stape' xtapej ta saqipueq richin nawil ri na'oj, man xtawil ta chuqa'.
16Ri na'oj janila rejqalen y stape' nawajo' natoj rik'in q'anapueq ri nipe pan Ofir, man nuq'i' ta ri rajel,
chuqa' stape' nawajo' naya' cornalina o zafiro chuwech, kan man nuq'i' ta chuqa' ri rejqalen.
17Ni ta ri q'anapueq y ri leq ri e banon rik'in chay, junan ta kajel rik'in ri na'oj,
y ni ta ri leq ri e banon rik'in q'anapueq ri más jebel, junan ta chuqa' rik'in ri na'oj.
18Kan más wi rejqalen ri na'oj ke chuwech ri wiqobel ri yeban rik'in jalajoj ruwech abej achi'el ri coral, ri abej chay yetzu'un y ri perla.
19Ri rejqalen ri na'oj man tikirel ta chi nijunamex rik'in rejqalen ri abej topacio ri richin pan Etiopía,
ni rik'in ri q'anapueq man tikirel ta richin niloq' ri na'oj.
20¿Kan akuchi kami nipe-wi ri na'oj?
y kan ¿akuchi kami nilitej-wi ri etamabel ri nuya' rukojolil ronojel?
21Roma re' kan ewan k'a chikiwech konojel ri winaqi',
y kan matzel chuqa' chikiwech konojel ri aj-xik' taq chikopi'.
22Ri kamik y ri akuchi ye'apon-wi ri kaminaqi' nikibij k'a:
Roj kan juba' ok qak'axan chi kan k'o-wi ri na'oj, yecha'.
23Y xaxe k'a ri Dios etamayon ri bey ri nuk'uan k'a rik'in ri na'oj,
xaxe rija' etamayon akuchi nilitej-wi.
24Roma xaxe rija' nitikir nitzu'un k'a pa ruk'isibel chire ri ruwach'ulew,
kan nutz'et k'a ronojel ri k'o pa ruwi' ri ruwach'ulew.
25Roma rija' kan retaman ri janipe' ralal xuya' chire ri kaq'iq',
y kan retan k'a jebel ri janipe' chi ya' k'o y kan k'o retabal.
26Rija' kan xuya' k'a ruchojmilal chire ri job,
y kan xuben ri retal-rubey ri koyopa' ri nuben ri koqolajay.
27Y toq k'o chik ronojel re', kan xuya' wi k'a rejqalen ri na'oj;
y ja rija' k'a xbin chi kan utz wi, roma kan xretamaj yan chi utz.
28Roma ri' ri Ajaw kan rubin wi k'a chike ri winaqi':
Jun wineq ri kan k'o rukiy ri Dios chuwech, kan q'alaj k'a chi k'o na'oj rik'in,
y jun wineq ri kan nuch'er-pe ri' chike ri itzel taq banobel, kan q'alaj k'a chi k'o etamabel rik'in.
Currently Selected:
Job 28: KQC
Highlight
Copy
Compare
Share
Want to have your highlights saved across all your devices? Sign up or sign in
Kaqchikel Bible © Bible Society in Guatemala, 2003.
