Job 27
27
Ri nuch'ob ri Job richin nuben
1Ri Job xubij chik k'a:
2Kan chuwech k'a ri k'aslik Dios ri man nrajo' ta nuq'et-tzij pa nuwi',
chuwech ri Dios ri k'o ronojel uchuq'a' pa ruq'a' ri rubanon chuwe chi ink'o pa tijoj-poqonal, ninbij chi
3rokik k'a k'o juba' nuk'aslen
y rokik chi ri Dios kan k'a nuya' na q'ij chuwe ninjiq'aj wuxla',
4yin, kan man xtinben ta tz'ukuj taq tzij,
ni man jun bey xtinben q'oloj.
5Yin kan man jun bey xkitikir xtinbij chi kan qitzij ri nibij chuwij,
roma yin kan man in aj-mak ta, y jantape' xtinbij keri' k'a toq xkiken na.
6Ri ruchojmilal ri nuk'aslen, kan nuchapon kow y man xtinya' ta kan rubanik;
keri' ri wánima kan man jun k'a achike ta xtubij chuwe chire ri nubanobal ri q'axineq kan.
Ri xtikik'uluwachij ri itzel taq achi'a'
7Ja ta niqaqa ruk'ayewal pa ruwi' ri etzelanel wichin, achi'el ri niqaqa pa kiwi' ri maneq Dios chikiwech,
ja ta niqaqa ruk'ayewal pa ruwi' ri niyakatej chuwij, achi'el ri niqaqa pa kiwi' ri xa man choj ta kik'aslen chuwech ri Dios.
8Ri wineq ri maneq Dios chuwech, kan man jun k'a xtroyobej-apo, rik'in ri itzel ch'akoj ri e rubanalon,
roma ri Dios xa xtrelesaj-el ri ruk'aslen.
9Ri Dios xa man xtrak'axaj ta toq kan rik'in ruchuq'a' nuk'utuj to'onik roma ri ruk'ayewal ri nipe pa ruwi'.
10Ri kan maneq Dios chuwech man jun bey xtikikot rik'in ri Dios,
xa kan man jun bey nuk'utuj ta ruto'onik ri Dios pa ruwi'.
11Yin xtinq'alajirisaj k'a chiwech ri nimalej ruchuq'a' ri Dios;
kan xtinq'alajirisaj k'a chuqa' chiwech ri nuch'ob nuben ri Dios, ri nitikir nuben ronojel.
12Chi'iwonojel rix kan jebel k'a iwetaman, roma kan rik'in ri runaq'-iwech itz'eton ri rubanobal,
¿achike k'a roma toq ri tzij ri ye'ibanala', xa ruyon bin man bin?, xcha' ri Job.
K'ari' ri Zofar xubij:
13Kan tawak'axaj k'a jebel ri achike rutojbalil ri xtuya' ri Dios chike ri maneq Dios chikiwech,
ri achike ri xtikichinaj ri e itzel taq achi'a' chuwi' ruq'a' ri Dios ri nitikir nuben ronojel.
14Y stape' kan e janila e k'iy kalk'ual xkek'oje', xa pa labal xkebeken-wi kan,
y ri más kokoj xa xkeken roma wayjal.
15Y ri ak'uala' ri k'a xkekolotej na kan, xa xkeken k'a pa jun nimalej yabil,
y ri ixoqi' ri xemalkanej kan, xa man xkekoq'ej ta.
16Ri wineq ri maneq Dios chuwech, stape' rumolon janila chi saqipueq achi'el ri ulew,
y e runuk'uk'en janila chi tzieq pa rachoch, xa xtik'oje' kan.
17Ri rumolon kan rija' xa jun chik wineq ri kan utz ruk'aslen ri xtukusan kan,
y ri xtikikot rik'in ri saqipueq ri', xa jun k'a ri kan choj ruk'aslen.
18Ri rachoch ri nupaba-q'anej ri wineq ri maneq Dios chuwech, xa achi'el ok jun ti sokaj,
xa junan ok rik'in ri rumo'k ri nuben ri chajinel pa juyu'.
19Ri wineq ri', toq nikotz'e-qa kan beyom k'a, y jari' ri ruk'isibel mul chi kan k'a k'o na rubeyomel,
roma toq xtujeq ri runaq' taq ruwech ruka'n q'ij xa kan man jun chik ri k'o rik'in.
20Y rik'in ri', xtipe k'a jun nimalej xibinri'il chire, roma xa achi'el jun ya' ri xuk'uan-el ronojel chuwech,
achi'el xa ta jun nimalej surkum ri xq'ax chi'aq'a' y xutelej-el ronojel.
21Ri nimalej kaq'iq' ri nipe pa relebel-q'ij, nitikir nutzeqej y nuk'uaj-el;
kan achi'el xtumes-el ri chiri' pa rachoch.
22Ri Dios kan k'iy k'a ri xtuteq chirij y man xtujoyowaj ta ruwech
y rik'in ri keri', ri wineq ri' kan jari' xtutej ruq'ij richin nanimej chuwech.
23Y roma ri nuk'uluwachij ri wineq ri', ri ch'aqa' chik winaqi' kan nikipaq'apa' kiq'a' chirij,
y xabakuchi k'o-wi yexuban chirij, richin nikik'ut chi yekikot chirij roma ri rubanon.
Currently Selected:
Job 27: KQC
Highlight
Copy
Compare
Share
Want to have your highlights saved across all your devices? Sign up or sign in
Kaqchikel Bible © Bible Society in Guatemala, 2003.
