Job 26
26
1K'ari' ri Job xch'on k'a y xubij chire ri Bildad:
2¡Rat kan janila k'a e ato'on ri winaqi' ri xa maneq ok kuchuq'a'!
¡Rat kan e akolon chuqa' ri winaqi' ri xa yetzaq yan!
3¡Kan xe'apixabaj-wi jebel ri xa maneq ok ketamabal!
¡Kan xak'ut k'a chi kan at aj-na'oj-wi!
4¿Achoq chire k'a xe'abij-wi ri ch'abel ri xe'abij-qa?
¿Achike xbanon chawe richin xe'abij ri ch'abel ri'?, xcha' ri Job.
Ri nimalej ruchuq'a' ri Dios
5Y ri Bildad kan jari' xuk'uluba' ri ruch'abel ri Job y xubij:
Roma ri ruchuq'a' ri Dios, ri kaminaqi' ri ek'o k'a chuxe-qa ri ulew kan yebaybot k'a,
y keri' chuqa' ri ruxe' ri palou y ronojel ri ek'o chiri', kan yebaybot chuqa'.
6Ri Dios kan jebel e rutzuliben ri jul ri akuchi yemuq-wi ri kaminaqi',
kan man ewatel ta chuwech rija' ri akuchi yebek'is-wi kan ri kaminaqi'.
7Ri Dios kan xuben k'a y xuripiba' k'a kan ri kaj ri richin ri chiri' pa xaman, ri akuchi man jun k'o,
y kan xuk'oloba' k'a kan ri nimalej ruwach'ulew ri pa kaq'iq'.
8Kan ja ri ruchuq'a' rija' ri banayon chi ri ya' kan chupan ri sutz' k'o-wi,
y ri ya' ri' man nibeq'ejq'o' ta pe jumul roma ri ralal.
9Rija' kan nitikir nuq'equmarisaj ruwech ri nojineq ik',
xa rik'in nurik' jun nimalej sutz' chuwech.
10Ja rija' xbanon ri ruwi' ri palou ri kan choj-choj nitzu'un,
jari' ri nik'atzin richin retal toq nitzaq ri q'ij y nok ri aq'a'.
11Ri nima'q taq juyu' ri ek'o chuxe' ri kaj kan yek'ark'ot roma xibinri'il,
kan janila nikixibij-ki' toq ri Dios nich'on kik'in.
12Rik'in ri ruchuq'a' rija' ri palou kan nisilon janila,
y rik'in ri na'oj ri k'o rik'in kan xch'akon chirij ri nimalej ruchuq'a' ri palou.
13Rik'in ri ruxla' xuxupuj ruwech ri kaj y kan xuben k'a chire chi jebel ok xtzu'un kan,
rija' kan rik'in ri ruq'a' xukamisaj ri kumetz ri man nuya' ta ri' richin nichap roma nubak'ak'ela-ri'.
14Ronojel re' xa kan xaxe ok ti ruchi' ri rubanobal ri Dios;
re' kan man jun ok chire ronojel ri nitikir nuben rija'.
Kan man jun k'a ri k'o chiqakojol roj winaqi' ri kan niq'ax ta chuwech ronojel ri nitikir nuben rija', roma rija' jun nimalej Dios.
Currently Selected:
Job 26: KQC
Highlight
Copy
Compare
Share
Want to have your highlights saved across all your devices? Sign up or sign in
Kaqchikel Bible © Bible Society in Guatemala, 2003.
