Job 24
24
Ri kibanobal ri itzel taq achi'a'
1¿Achike roma ri Dios, ri k'o ronojel uchuq'a' pa ruq'a', man ruch'aron ta ruq'ijul richin chi nuq'et ta tzij pa kiwi' ri aj-maki',
richin chi ri yeniman richin rija', kan nikitzu' ta toq nuq'et-tzij?
2Ri achi'a' ri' yekijuk' k'ulba't, richin ninimer ri kulew,
yekeleq'ala' awej y man jun kik'ix yebe chikiyuq'uxik.
3Yekeleq'aj-el ri taq kibur ri meba'i',
y kan yekimej ri kibóyix ri malkani', ri e yuqul kan roma k'as.
4Rije' kan yekinimila' kan ri e molonel ri ek'o pa taq bey,
roma ri' konojel ri winaqi' ri kan man jun k'o kik'in, nikewala-ki' chikiwech.
5Ri winaqi' ri man jun k'o kik'in, yebe pa taq tz'iran ruwach'ulew,
kan nikiben k'a achi'el nikiben ri taq bur toq nibekikanoj kiway;
rije' xaxe ok keri' yetikir nikil kiway ri kalk'ual.
6Rije' kan k'a ja na toq nok aq'a', k'ari' yebe chuk'amik ri trigo ri nik'atzin chike,
y chuqa' kan k'a jari' toq yebe chuwuxik uva pa taq kulew ri achi'a' e aj-maki'.
7Rije' kan man nikik'uaj ta kiq'u' y keri' yeq'ax ri junaq'a',
kan man jun ri nikikusaj richin nikikuch-ki' chuwech ri tew.
8Kan nik'o chuqa' kiya'al roma ri job richin k'echelaj,
roma ri' rije' nikimol k'a ki' chikij abej, nikikanoj juba' ti meq'en.
9Y kan ek'o k'a chike ri itzel taq achi'a' ri kan yekimajila-el ri taq ak'uala' maneq chik kitata', chikiwech ri teja', stape' k'a yetz'uman na.
kan ja ri ak'uala' yekik'en chuwech ri kik'as ri winaqi' ri man jun k'o kik'in.
10Ri winaqi' ri' kan nikiben chike ri kisamajela' chi yebe pa taq samaj y q'alaj chik pe ri kich'akul roma maneq kitziaq,
ri samajela' ri' yeken roma wayjal y pa q'etaj trigo e kejqalon-el.
11Kan yekisiloj ri abej richin nikiyitz' ri aceite,
kan janila k'aten nikina' toq nikipitz' ri uva richin nel pe ri ruya'al, y kan man niya'ox ta chike richin nikiqum.
12Jak'a ri pa tinamit ek'o-wi ri yeken yan, kan rik'in k'a jiloj nikik'utuj to'onik,
y ri kánima ri e sokotajineq, kan yesik'in nikik'utuj chuqa' to'onik,
jak'a ri Dios kan man nrak'axaj ta ri kich'owen.
Ek'o ri man niqa' ta chikiwech ri rusaqil ri q'ij
13Ri aj-maki' ri' kan yeyakatej chirij ri saqil,
kan man ketaman ta nikitzeqelibej ri utzilej rubey ri Dios,
y man yebiyin ta chupan ri bey ri'.
14Jun kamisanel kan k'a nimoymot na toq kan ja yan ri' niyakatej-el,
richin nukamisaj ri man jun k'o rik'in,
y ri chaq'a', ja ri eleq' ri nuben.
15Jak'a ri achin k'ulan y nukanoj jun chik ixoq, kan nroyobej chi k'a nok na aq'a', k'ari' nel-el,
y nuch'ob-qa chi man jun achike ta nitz'eton richin;
y kan nujel k'a el ruwech.
16Ri eleq'oma', k'a ja ri chi'aq'a' yekiteq'ula' ri jay richin ye'ok-apo,
ri jay ri kan kiq'ijun chik kan ri paq'ij;
kan man jun bey ye'eleq' ta toq k'o ri saqil, roma kan itzel nikina' chire.
17Chikiwech ri winaqi' ri', toq niseqer-pe, kan ruq'equmal ri kamik nikina' rije',
roma rije' xa kan ruk'ulun chik chike ri xibinri'il ri richin ri chaq'a', xcha' ri Job.
Ri aj-maki' e achi'el tz'il ri e rutelen ya'
K'ari' ri Zofar xubij:
18Ri itzel taq achi'a' yeq'ax-el chi'anin achi'el ri raqen-ya';
ri kulew kan k'o ruk'ayewal ya'on pa ruwi' roma ri Dios,
y man jun chik nisamej chupan ri kitiko'on richin uva.
19Y kan achi'el nikiben ri k'aten y ri saq'ij toq nikibeq'-qa ri pim chuma-tew ri niqaqa,
keri' chuqa' nuben ri jul richin kamineq chike ri e makuwineq.
20Rije' kan man xkenatex ta chik koma ri kite';
jak'a ri jut kan ki' xtikina' toq xke'apon pa kichi';
rije' kan man jun chik k'a xtinatan kichin,
xa kan jumul k'a xke'elesex-el, achi'el toq nichoy-el jun che'.
21Rije' kan xekiya' pa tijoj-poqonal ri ixoqi' ri man e alanel ta.
y chuqa' kan man jun bey ri utz ta juba' xkiben kik'in ri malkani' taq ixoqi'.
22Jak'a ri Dios, rik'in ri ruchuq'a' yerutzeq ri k'o janila kiq'ij;
y stape' kan kow ek'o, kan man xkekolotej ta chuqa' pa ruq'a'.
23Rija' nuben chike chi jikil y kuqul kik'u'x e k'es;
jak'a ri bey ri kik'uan kan tzuliben roma rija'.
24Rije' kan chi'anin k'a yebe-q'anej pa jotol y k'a juba' ri' xa e man jun chik,
yetzaq y yeken k'a achi'el nikik'uluwachij konojel,
niqupix-el ri kik'aslen, achi'el niq'at ri ruwi' ri trigo.
25Y wi man keri' ta, ¿k'o kami jun ri nitikir nibin chuwe chi man qitzij ta ri ninbij?
¿Kan k'o kami jun ri nitikir nuk'ut chi yin xa in sachineq rik'in ronojel ri xinbij?, xcha' ri Zofar.
Currently Selected:
Job 24: KQC
Highlight
Copy
Compare
Share
Want to have your highlights saved across all your devices? Sign up or sign in
Kaqchikel Bible © Bible Society in Guatemala, 2003.
