Job 23
23
Ri Job nrajo' chi nak'axex roma ri Dios
1Ri Job xch'on k'a y xubij:
2Wakami k'a, yin yijilo chuwech ri Dios roma ri ruk'eyul ri nuk'aslen,
roma rija' kan rubanon chuwe chi ink'o pa ruk'ayewal y roma ri' yin yijilo k'a.
3Xa rik'in ta ninwetamaj akuchi ninwil wi ri Dios,
yin yinapon ta k'a rik'in richin chi kirak'axaj, ri chiri' ri akuchi nuq'et-wi-tzij.
4Y kan ninya' ta apo chuwech rija' ri nuk'uluwachin,
y kan ninchol ta apo ronojel chuwech rija', richin chi ninto-wi'.
5Kan ninwajo' k'a ninwetamaj, achike ta ri xtubij-pe chuwe
o achike ta ch'abel nukusaj richin nuk'ulubej-pe ri nuch'abel.
6Rija' kan man xtiyakatej ta pe chuwij rik'in ri nimalej ruchuq'a',
rija' kan xkirak'axaj ta chi utzil, toq xkich'on rik'in.
7Roma yin in jun achin ri man nintz'uk ta ri ninbij y yitikir ninchol chire ri nuk'uluwachin,
y kan jumul chiri', rija', ri q'atoy-tzij kan xtuq'alajirisaj chi yin xa man jun numak.
8Xa ta yin yibe k'a chukanoxik ri Dios re kere' pa relebel-q'ij,
man xtinwil ta, roma man chiri' ta k'o-wi,
xa ta yibe chukanoxik re kere' pa qajbel-q'ij, kan man chiri' ta k'o-wi.
9Y chuqa' xa ta yibe k'a kela' pa xaman xa man xtintzu' ta kan ruwech ri chiri'
y xa ta yibe re kere' pa xokon, xa man xtintz'et ta chuqa' kan.
10Jak'a rija' kan retaman achike bey ri nuchapon-el,
y toq yiruya' pa tejtobenik, kan yinok k'a achi'el ri q'anapueq toq nich'ich'an.
11Ri nubinibal yin kan rutzeqeliben wi k'a naqaj ri rubinibal rija';
kan nuchajin k'a wi' jebel chupan ri rubey rija', y man nujech'en ta kan wi' chire ri rubey.
12Kan man jun bey k'a ri nujech'en ta el wi' chire ri pixa' ri rubin,
kan nubeyomel k'a nubanon chire ri ch'abel ri e eleneq-pe pa ruchi', más ke chuwech ri nuway.
Ri Dios kan nuben wi k'a ri nubij
13Xaxe k'a ri Dios ri pa'el pa ruwi' ronojel y man jun chik ri achi'el ta rija'.
Man jun ri nitikir ta nupaba-ri' chuwech y nujel ta ri nuch'ob.
Roma kan achike k'a ri nrajo' ri ránima rija', jari' ri nuben.
14Ri ruch'obon ri Dios chi kan nuben wik'in, kan xtibanatej-wi,
y re nuben wik'in yin, xa jun ok chike ronojel ri nuch'ob chi nuben rija'.
15Y xa roma ri' toq yin kan janila ninxibij-wi' chuwech rija'.
Y toq kan ninch'ob rij ronojel ri', yik'ark'ot k'a chuwech.
16Ri Dios kan rubanon chik k'a chuwe chi in jun achin xibiy-wi',
y roma rija', ri k'o ronojel uchuq'a' pa ruq'a', kan achike na nuben ri nupan roma xibinri'il.
17Jak'a man ja ta ri q'equ'm ninxibij-wi chuwech,
stape' nuben chuwe chi man yitz'u'n ta.
Currently Selected:
Job 23: KQC
Highlight
Copy
Compare
Share
Want to have your highlights saved across all your devices? Sign up or sign in
Kaqchikel Bible © Bible Society in Guatemala, 2003.
