Job 22
22
Ri wineq man kan ta k'o nuk'atzinej-wi chire ri Dios
1K'ari' ri Elifaz xch'on chik y xubij:
2Jun achin xa man nitikir ta k'a nuto' ri Dios,
stape' kan jun wineq aj-na'oj, man nik'atzin ta chire ri Dios.
3Kan man jun k'a nuk'en-pe chire ri Dios ri k'o ronojel uchuq'a' pa ruq'a'.
chi rat kan ak'uan jun chojmilej rubeyal k'aslen.
4Ri Dios man nroyoj ta jun wineq roma kan k'o Dios chuwech,
ni man roma ta ri' nuben chi nuq'et-tzij pa ruwi'.
5Xa kan roma k'a janila mak ri e abanalon,
xa roma ronojel ri etzelal ri abanalon kan e ik'owineq ruwi'.
6Roma toq ri awach'alal xkiben jun kiqajo'n awik'in, kan k'o na chi k'o xkiyuquba' kan awik'in y xa maneq achike roma xaben keri',
kan xawelesaj kan ri kitziaq ri nikiq'uj, kan xaben k'a chike chi tew xkina'.
7Rat kan man xasuj ta juba' ruya' ri wineq q'itajineq,
y kan xak'ek'ej ruway ri xa niwayjan.
8Rat kan roma k'o abeyomel, k'o aq'ij y k'o awuchuq'a',
xa xachop relesaxik kulew ri man jun yetikir nikiben chawe y xok awichin ronojel.
9Y toq ri ixoqi' malkani' xbekik'utuj to'onik chawe, kan man jun xaya' pe chike,
kan xaben chike ri meba'i' ak'uala' chi xkitej poqon.
10Y roma re abanobal re', kan jantape' nana' chi k'o pikbel ri rusutin-pe awij,
y toq nana' nibeyikik-pe tew chawij roma axibinri'il.
11Xa maneq chik saqil awik'in, xa ronojel xq'equmatej chawech;
xa kan achi'el at muqutajineq roma jun ya'.
Ri Dios k'a chupan ri kaj richin rija' k'o-wi
12Ri Dios k'a más nej k'o-wi chire ri kaj akuchi ek'o-wi ri ch'umila';
y wi rat natzu' akuchi k'o-wi ri ruk'isibel ch'umil, natz'et chi kan nej-nej k'o-wi.
13Y roma ri' rat nach'ob: Wi k'a kela' k'o-wi ri Dios, man nretamaj ta achike nik'uluwachitej wawe',
Kan man nitikir ta nuq'et-tzij pa ruwi' ri wineq, roma xa k'a chirij el ri sutz' k'o-wi,
14Rat nach'ob chi ri sutz' kan man nuya' ta q'ij richin chi rija' nitzu'un-pe,
rokik niq'axlan chiri' chukojol ri sutz' y ri kaj.
15¿Kan nawajo' rat chi nak'uaj ri ojer bey,
ri bey ri jantape' xkitzeqelibej ri itzel taq achi'a'?
16Rije' kan chi'anin yan k'a xeken-el, y xa man jani kiq'ij ta;
achi'el xa ta xpe jun raqen-ya', xuk'ot-el ri ulew ri kipaliben y xeruk'uaj-el.
17Rije' kan kibin k'a chire ri Dios chi keruya' kan kiyon,
roma ri Dios ri k'o ronojel uchuq'a' pa ruq'a', man jun ruk'ayewal nitikir nuya' pa kiwi'.
18Keri' nikibij, stape' kan ja rija' ri xnojisan ri kachoch, rik'in ri nik'atzin chike,
y roma ri' yin kan man ninwajo' ta ninchop yich'obon achi'el ri itzel taq winaqi' ri'.
19Toq ri chojmilej taq winaqi' xkitz'et ri xkik'uluwachij-el ri itzel taq achi'a', xekikot,
ri winaqi' ri kan maneq kimak kan xetze'en roma kikoten.
20Y xkibij: Wakami, ri e etzelanel qichin xqaqa yan el ruk'ayewal pa kiwi',
y ronojel ri kibeyomel xa xuk'is q'aq', xkecha'.
Ri Elifaz nrajo' chi ri Job nutzolij-ri' chire ri rumak
21Wakami k'a tijunamatej chik k'a awech rik'in ri Dios y xtuk'en-pe uxlanen chire ri awánima,
y re' kan k'iy k'a utz xtuk'en-pe chawe.
22Kan tawak'axaj k'a ri pixa' ri yarutijobej-wi ri Dios
kan ronojel k'a ri ch'abel ri nubij, kan taya' pan awánima.
23Y wi rat kan nitzolin-pe ak'u'x rik'in ri Dios, ri k'o ronojel uchuq'a' pa ruq'a', xkayakatej k'a,
y keri' kan xtipa'e' rubanik ronojel ri man utz ta pan awachoch.
24Y kan taya' k'a el pan ulew ri q'anapueq ri k'o awik'in,
ri q'anapueq ri k'o awik'in xa tabeya' kan kojol abej ri pa raqen-ya' Ofir,
25y keri' kan ja ri Dios ri k'o ronojel uchuq'a' pa ruq'a' ri xtok abeyomel;
kan ja wi ri Dios ri xtok ri aq'anapuaq y ri asaqipuaq.
26Jari' k'a toq xkakikot rik'in rija',
y man xtapoqonaj ta k'a xkak'oje-apo chuwech ri Dios, rik'in jun ch'ajch'ojilej awánima.
27K'ari' xkatikir k'a xkach'on rik'in, y rija' xkarak'axaj chuqa';
y man tamestaj taya' chire ri asujun chi naya' chire.
28Ronojel k'a ri xtach'ob chi naben, kan utz xtel chawech;
roma ri aj-chikajil saqil, kan xtusaqirisaj ri abey.
29Roma ri winaqi' ri kan nim nikina-ki', ri Dios xa nuben chike chi maneq ok kiq'ij,
man rik'in ri' ri Dios kan yerukol k'a ri winaqi' ri maneq ok kiq'ij.
30Roma ri' ri Dios kan xkarukol k'a, wi kan maneq amak achi'el ri nabij,
kan xkarukol k'a wi ri ak'aslen kan ch'ajch'oj chuwech Rija', xcha' ri Elifaz.
Currently Selected:
Job 22: KQC
Highlight
Copy
Compare
Share
Want to have your highlights saved across all your devices? Sign up or sign in
Kaqchikel Bible © Bible Society in Guatemala, 2003.
