Job 21
21
Ri Job nrajo' chi nak'axex
1K'ari' ri Job xch'on chik y xubij:
2Xa rik'in ta niwak'axaj ri tzij ri ninwajo' ninbij chiwe,
rix kan nikuquba' ta nuk'u'x.
3Rokik k'a yich'on iwik'in, kan kinikoch'o' k'a juba'
y toq nubin chik qa ronojel ri ninwajo' ninbij, wi niwajo' yixtze'en roma ri', kixtze'en k'a.
4Ri nuch'ojinik yin man chuwech ta k'a jun wineq,
y roma ri', kan k'o k'a roma toq ri wánima man nril ta achike nuben.
5Kan tiwak'axaj k'a jebel re xtinbij chiwe,
y rix kan xtiya' ri iq'a' chuwech ri ichi', roma kan xtimey ri xtiwak'axaj.
Ri e banoy etzelal xa más utz kibanon
6Toq kan noqaqa chinuk'u'x ronojel ri nuq'axan-pe,
nipe tewulej-ya' chuwij, ninxibij-wi' y nibeyikik-pe ri nuch'akul.
7¿Achike kami roma toq ri winaqi' ri maneq Dios chikiwech, más yeyaloj yek'ase'?
Kan yerijix na el jebel y jebel yebe pa jotol.
8Kan k'a yekitz'et na kan ri kalk'ual, ri yek'iy-q'anej y jebel chik kibanon kan;
kan yekitz'et na chuqa' kan ri kiy-kimam toq yek'iy-q'anej.
9Ri pa taq kachoch ri winaqi' ri' kan ronojel utz y man jun ri achike ta nikiq'axaj,
y ri Dios kan man jun chuqa' ruk'ayewal ri nuya' ta pa kiwi'.
10Ri achija' kiwákix kan jikil chi ye'alk'ualan;
ri ixoqi' taq kiwákix kan yeyawej kan y jikil chi ye'alex ri taq kal.
11Ri kalk'ual ri winaqi' ri' kan e achi'el jumolaj alaji' taq karne'l,
kan yetzok'lan k'a yebe achi'el nikiben ri taq karne'l.
12Ri ak'uala' ri' kan yebixan y yekikot rik'in ri ruch'abel ri q'ojom,
ri arpa, y ri xul ri banon rik'in aj.
13Konojel ri winaqi' ri', kan ronojel q'ij chire ri kik'aslen, nikiq'axaj rik'in beyomel;
y kan rik'in k'a uxlanen yeken y yemuq-el.
14Rije' kan nikibij k'a chire ri Dios chi keruya' kan kiyon,
roma man nikajo' ta nikak'axaj chirij ri rubeyal ri k'aslen ri nrajo' rija'.
15Y chuqa' nikibij: ¿Achike ta k'a ri Dios, ri k'o ronojel uchuq'a' pa ruq'a', richin chi niqasamajij?
¿Kan k'o ta kami k'a ri niqach'ek, ri yojch'on-q'anej rik'in?, yecha'.
16Kan pa kiq'a' k'a rije' k'o-wi, chi utz nel chikiwech y pa jotol ek'o-wi.
Stape' ri kich'obonik y ri nikibij rije', nej k'o chire ri nubij ri Dios.
17Man rik'in ri', chikikojol rije' man q'ij-q'ij ta ri k'o ta niken-el,
y maneq ruk'ayewal ri niqaqa ta pa kiwi'.
Ri Dios kan man nuben ta k'a chire ri kibeyomel chi k'o ta ri nuk'uluwachij.
18Rije' kan man e achi'el ta ri páxa ri man k'ayew ta nuk'uaj-el kaq'iq',
chuqa' man e achi'el ta ri solot ri man k'ayew ta chi nuyek-el ri surkum.
19Rix kan niq'ax k'a chiwech chi ri rutojbalil ri kimak rije',
yakon-apo roma ri Dios chi pa kiwi' ri ralk'ual niqaqa-wi.
Man keri' ta. Ri Dios xa kan pa kiwi' ri aj-maki' xtuya-wi ri rutojbalil,
richin chi kan tiketamaj na.
20Ri aj-mak kan tutz'eta' na ri ruk'ayewal ri xtipe pa ruwi',
kan tuqumu' na ri royowal ri Dios ri k'o ronojel uchuq'a' pa ruq'a'.
21Toq jun wineq xa kamineq chik el, man xkeruch'ob ta chik kan ri ralk'ual;
kan man jun chik k'a xtuch'ob kan, toq xtiqupix-el ri ruk'aslen chuwech re ruwach'ulew.
22Kan man jun k'a ri nitikir nibin chire ri Dios ri achike utz nuben,
roma rija' kan nuq'et-tzij pa kiwi' konojel, jajun pa kiwi' ri ek'o chila' chikaj.
23Ek'o chike ri winaqi' ri', toq yeken-el stape' e rijita'q chik kan k'a e jebel na,
k'o kikoten kik'in ri yeken-el, y man jun ri nibanon ta chike chi yebison yebe.
24Kan yebe k'a toq kan k'a janila jebel e ti'oj,
y ri rupan ri kibaqil kan k'a utz na.
25Jak'a ek'o ch'aqa' chik winaqi' ri janila nibison ri kánima yeken-el,
roma kan man jun bey xkina' ta juba' ruki'il ri kik'aslen.
26Ri wineq beyom y ri meba', chi e ka'i' yebelie' chuxe' ulew,
y kan xtinoj k'a kij chi jut, ri yetijo kichin.
Ri itzel taq kich'obonik ri rachibil ri Job
27Yin kan wetaman k'a ri achike itzel taq ch'obonik ri k'o iwik'in,
y chuqa' wetaman ri achike niwajo' niben richin yitzaq.
28Rix kan nibij k'a: ¿Achike k'a xtikik'uluwachij ri e aj pa rachoch ri nimalej achin aj-mak?
¿Y achike xtikik'uluwachij ri ek'o rik'in ri xa maneq Dios chuwech?, yixcha'.
29Rix xa kan k'o ta chik iwetaman kan kik'in ri yeq'ax ri yebe juk'an chik tinamit, xa ta ik'utun chike.
Rije' kibin ta chik kan chiwe ronojel ri e kitz'etelon chik ri pa kik'aslen,
30chi ri wineq banoy etzelal kan jebel nitz'et, roma toq k'o ruk'ayewal man jun nuk'uluwachij;
y toq ri Dios nuteq-pe ruk'ayewal roma ri royowal, ri wineq banoy etzelal xa nikolotej chuwech ri'.
31Xa man jun wineq ri nitikir ta nibin chupalej ri rubanikil ri ruk'aslen chikiwech ri winaqi'.
Y kan man jun chuqa' ri nitikir ta niya'on rutojbalil chire roma ri e rubanalon.
32Y toq rija' xtuk'uex-el richin nibemuq kan, kan e k'iy k'a xkemuqun richin,
y ri akuchi xtimuq-wi, ri winaqi' kan xkekiya' chuqa' chajinela'.
33Ri k'olok'eq ulew ri ek'o pa jul ri akuchi xtili'e-wi kan, kan buyul k'a xtuna' rija';
e k'iy k'a winaqi' ri xkemuqun richin, ek'o ri e nabeyajineq-el, y ek'o ri e xambey kan.
34Ronojel ch'abel ri ibin-qa chuwe, richin chi nikuquba' nuk'u'x, xa man jun xuk'en-pe chuwe.
Ronojel ri ch'abel ri xe'ibij, xa xe'itz'ukula-pe chinuwech, xcha' ri Job.
Currently Selected:
Job 21: KQC
Highlight
Copy
Compare
Share
Want to have your highlights saved across all your devices? Sign up or sign in
Kaqchikel Bible © Bible Society in Guatemala, 2003.
