Job 20
20
Ri ruk'uluwachin pa ruk'aslen jun wineq ri kan itzel
1Ri Zofar xch'on chik y xubij chire ri Job:
2Yin kan ninwajo' chi chi'anin yan nink'uluba' ri ach'abel,
roma kan ja ri nuch'obonik ri nibanon chuwe chi ninwajo' yich'on chik.
3Yin xinwak'axaj yan qa chi itzel xach'on chirij ri nuch'abel,
y roma ri' ri nuna'oj nuben chuwe chi yich'on.
4Yin ninbij chi rat kan awetaman ri achike rubanik rubanon-pe ojer ri',
ri achike rubanik rubanon-pe pa rutikeribel,
toq ri Dios xuya' ri wineq chuwech re ruwach'ulew.
5Kan awetaman k'a chi ri itzel taq winaqi' xa man niyaloj ta ri kikoten kik'in.
Ri kan maneq Dios chikiwech, xa jun ok ti ramaj nuben ri kikikoten.
6Stape' ri runimirinen ri wineq kan nuq'i' ta el ri kaj,
y roma ri rupalen kan nuq'i' ta q'anej ri sutz' rik'in ri rujolon.
7Jak'a k'o na jun q'ij toq ri wineq ri' xa xtiqaqa jumul k'a pan ulew, achi'el ri nupamaj rija'
y ri xe'etaman ruwech xtikibij k'a: ¿Akuchi k'a xbe-wi ri achin ri'?, xkecha'.
8Ri wineq ri' kan xtibe k'a, achi'el nibe jun achik'.
Kan xtuk'uluwachij achi'el toq nik'utumej jun achi'el achik' chuwech jun wineq.
9Ri runaq'-wachaj ri xetz'eton richin, kan man jun bey chik xtikitz'et,
ni ri xek'oje' rik'in ri chiri' pa rachoch, kan man xtikitz'et ta chik.
10Ri e ralk'ual kan ri wineq ri' k'o chi xtikitzolij chike ri meba'i' ri keleq'an.
Kan rik'in ri kiq'a' rije', nikitaluj-el ri rubeyomel kan ri kitata'.
11Ri wineq ri maneq Dios chuwech kan k'a e kow ri rubaqil;
toq kan ja yan ri' xtiken-el y xtibe kan pan ulew.
Ri nuk'en-pe ri mak
12Ri maneq Dios chikiwech, toq yemakun, kan ki' nuna' ri pa kichi',
y kan nik'oje' kan ri ruki'il chuxe' ri kaq'.
13Kan niyaloj k'a ri ruki'il chuxe' ri kaq' y man nikibeq' ta qa chi'anin,
richin kan niyaloj na nikina' ruki'il.
14Jak'a toq napon-qa pa kipan xa nik'eyur,
y ri chiri' xa nupon-ri' y nok achi'el ri kamisanel ya' ri nel pa ruchi' jun itzel kumetz.
15Ri wineq ri nutej-qa ri beyomel ri xa releq'an, xa xtiberuxa-pe.
Stape' kan pa rupan chik k'o-wi, ri Dios xtuben chire chi xtel-pe.
16Ri nubeq' qa ri wineq ri' xa achi'el ri ya' ri nel-pe pa ruchi' ri kumetz;
kan niken k'a chi'anin achi'el xa ta purin roma jun itzel kumetz.
17Kan man xtutz'et ta chik kan ri aceite toq achi'el ti raqen-ya' nibiyin-pe.
Chuqa' kan man xtutz'et ta chik kan ri beyomel ri nuya-pe ri Dios,
ri kan nibiyin-pe achi'el leche y achi'el ri kab ri nikiya' ri taq chikopi'.
18Ri wineq ri' kan k'o chi nutzolij ronojel ri nubij chi ruch'akon rik'in ri rusamaj,
y man xtuna' ta juba' ruki'il ri rubeyomel.
19Roma rija' kan xuben chike ri winaqi' ri man jun k'o kik'in chi nikitej poqon.
Xa xerumajla' jay, pa ruk'exel chi xerubanala' ta q'anej richin rija'.
20Rija' kan xrajo' k'a chi ronojel ta xok richin;
ri rayinik ri k'o rik'in q'ij-q'ij más nim.
21Kan ronojel k'a ri nurayij, kan nok-wi richin rija'.
Man rik'in ri', ronojel ri rubeyomel xa kan man xtiyaloj ta.
22Roma toq xa kan k'iy chik k'a beyomel rilon, xa xtiqaqa k'a bis pa ruwi'.
Xa kan xtiqaqa k'a jun nimalej wululen pa ruwi' y xtutej poqon roma ri'.
23Y toq kan ruchapon k'a rumolik ri rubeyomel,
jari' toq ri Dios xtuya-pe ruk'ayewal pa ruwi', roma q'aq'arneq roma royowal.
Y ri ruk'ayewal ri', man xaxe ta xtumej rija', xa kan xtumej chuqa' ri ruway-ruk'ya'.
24Wi ta nitikir nanimej chuwech ri kum ri q'eqapueq rutza'n,
chuwech ri ch'ab q'enq'oj-pueq rutza'n, man xtikolotej ta.
25Y ri ch'ab ri' xtuk'owisaj ri ruch'akul,
y ri rutza'n ri ch'ab, ri nich'ich'an, kan xtuteq'uj ri ruk'ay.
Kan jari' toq ri ránima xtuxibij-ri', roma kan jari' xutz'et ri rukamik.
26Ri rubeyomel ri wineq ri', kan oyoben chik k'a roma ri q'equ'm ri xtik'ison richin,
ri akuchi k'o-wi ri q'aq' ri man wineq ta boxoyon richin.
Y re' kan xtuk'is k'a ronojel ri e kolotajineq chik kan, ri ek'o kan pa rachoch.
27Ri kaj xtuya' chuwa saqil ri itzel rubanobal,
y re ruwach'ulew xtiyakatej chirij.
28Y toq ri Dios xtiyakatej royowal,
kan xtrelesaj-el ronojel ri rubeyomel ri', ri kan rumolon pa rachoch.
29Ri Dios kan nuben k'a chike ri winaqi' ri maneq Dios chikiwech, chi k'a chiri' ye'apon-wi.
Kan nuben k'a chuqa' chike chi jare' ri nikichinaj.
Currently Selected:
Job 20: KQC
Highlight
Copy
Compare
Share
Want to have your highlights saved across all your devices? Sign up or sign in
Kaqchikel Bible © Bible Society in Guatemala, 2003.
