Job 19
19
Ri Job kuqul ruk'u'x rik'in ri Dios
1Y kan jari' k'a toq ri Job xch'on y xubij:
2¿Achike k'a roma toq kan man yixtane' ta chuwij richin niya' pa q'axo'n ri wánima?
¿Achike k'a roma kan jantape' yinisok rik'in ri ch'abel ri ye'ibila' chuwe?
3Janila mul yan iqasan nuq'ij,
y kan man yixk'ix ta juba', xa kan nik'o ruwi' ri niben chuwe.
4Stape' ta kan qitzij chi yin ximakun,
ri rutojbalil man xkixrumej ta rix, xa kan pa nuwi' yin xtiqaqa-wi.
5Rix kan nibananej k'a chi janila ix jebel,
y roma ri' chiwech rix, ri ruk'ayewal ri nink'owisaj jare' ri nuya' chuwe ri numak.
6Rix xa kan man iwetaman ta k'a chi ja ri Dios ri banayon kere' chuwe,
xa kan ja rija' ri xya'on ri pikbel richin chi yin xiqaqa chupan.
7Stape' yin kan xtinbij: ¡Yikamisex!, man jun xkinak'axan.
Stape' kan rik'in ronojel wuchuq'a' yich'on rik'in jun q'atoy-tzij,
man ninwil ta to'onik.
8Ri Dios xutz'apej k'a nubey richin chi yin man yiq'ax ta.
Rija' kan xuq'equmarisaj k'a ri bey ri akuchi yiq'ax-wi.
9Rija' kan ronojel k'a ri nubeyomel xumajij-el chinuwech.
Ri nuk'ojlen ri kan k'o chikiwech ri winaqi', kan xuyoj k'a chikiwech.
10Kan xiruchop k'a y xiruqasaj pan ulew jumul.
K'iy k'a ri woyoben-pe richin ninben,
y xa xrelesaj chuwe achi'el nik'uq-el jun che'.
11Rija' kan xq'aq'er k'a roma royowal chuwij yin,
y xuben chuwe chi in jun etzelanel richin.
12Kan xerumol k'a pe aj-labal richin xeruyek-pe chuwij.
Xkisutij-rij ri wachoch richin nikoyobej jampe' yitzaq pa kiq'a'.
Kan xekibanala' k'a q'anej tz'aq chirij ri wachoch richin yinkichop.
Ri Job xmalix kan jumul
13Ri Dios kan xuben k'a chike ri wach'alal chi xkich'er-el-ki' chuwe yin,
y ri e etamayon nuwech chi achi'el xa man jun bey xqachibilaj-qi' kik'in.
14Konojel ri e ach'alalri'il wik'in xa xebe,
y ri e etamayon nuwech jebel, xinkimestaj kan.
15Ri kan jantape' ek'o-pe pa wachoch xinkimestaj.
Ri e waj-ik' xtani' kibanon chuwe chi man ketaman ta nuwech.
Wakami kan in okineq achi'el jun aj nej chikiwech konojel.
16Y toq ninwoyoj k'a jun nusamajel man nich'on ta pe chuwe.
Y stape' yilokok-apo chuwech, achi'el xa man chire ta yich'on-wi.
17Ri wixjayil kan iretzelan k'a jumul roma xa kan itzel chik ri wuxla',
y ri walk'ual xa xejel-el nej chuwe yin.
18Kan jajun chuqa' ri ak'uala' yinketzelaj,
y kan xaxe yipa'e-el kan itzel k'a yech'on y yetze'en chuwij.
19Konojel k'a ri wachibil ri kan jantape' xek'oje' wik'in, wakami xa yinketzelaj.
Kan konojel k'a ri janila e wajowan, xa xeyakatej chuwij.
20Yin xa xik'is-xik'is yan qa jumul;
xaxe chik ri nutz'umal ri k'o chirij ri nubaqil.
Ri nutijul ri k'a k'o na, xaxe chik ri ti'ij ri akuchi e tikil-wi ri wey.
21Rix ri ix wachibil, xa tijoyowaj k'a nuwech.
Roma re ruk'ayewal re qajineq pa nuwi', kan ja ri Dios yoyon-pe.
22¿Achike k'a roma toq rix kan yiniya' chuqa' pa ruk'ayewal achi'el nuben ri Dios?
¿Kan man nik'o ta kami ruwi' niben chuwe rik'in re'?
Ri royoben-apo ri Job
23¡Jebel ta ri' xa ta re nuch'abel yetz'ibex kan pa jun boton wuj!
24Kan jebel ta ri' chi ri tz'ibabel kan ja ta rik'in q'eqapueq,
y chuwech jun wuj ri banon rik'in chajipueq tz'ibatel kan.
Kan jebel ta ri' chi nitz'ibex kan chuwech jun abej, richin kan tetamex koma konojel.
25Jak'a yin kan wetaman chi k'o jun ri k'o chila' chikaj ri nito'on wichin,
y kan xkiruya' chik chupan ri nuk'ojlen.
Rija' kan k'o k'a jun q'ij xtitzolin-pe,
y xkiruyek-pe ri pan ulew akuchi in muqul-wi.
26Y toq xa k'isineq chik ri nutz'umal re nuk'uan, kan xkik'astej chik,
y kan k'o chik k'a nuch'akul toq yin xtintz'et ruwech ri Dios.
27Kan ja wi yin ri xkitz'eton richin,
kan rik'in re runaq'-nuwech re' xtintz'et-wi.
Y ja rija' ri xtintz'et y man jun ta chik.
Y re wánima kan nurayij chi nutz'et yan ruwech.
28Rix nibij: ¿Achike ta rubanik niqaben richin niqaya' más pa q'axo'n?
Roma ronojel re' xa kan rik'in qa rija' peteneq-wi, yixcha'.
29Wakami k'a, rix kan tixibij-iwi' chuwech ri espada richin ri ruq'atoj-tzij ri Dios,
roma ri ru-espada rija' jari' ri nik'utu ri royowal pa ruwi' ri mak.
Y kan tiwetamaj chi kan k'o jun ri niq'aton-tzij.
Currently Selected:
Job 19: KQC
Highlight
Copy
Compare
Share
Want to have your highlights saved across all your devices? Sign up or sign in
Kaqchikel Bible © Bible Society in Guatemala, 2003.
