Job 18
18
Ri oyowal xa man jun utz nuk'en-pe
1Y kan jari' toq ri Bildad xch'on y xubij chire ri Job:
2¿K'a janipe' k'a yatane-qa chi ch'owen?
Katane' k'a chire ronojel ri nach'ob, y taya' q'ij chiqe roj richin yojch'on.
3¿Achike roma rat kan xojakusaj yan chikopi',
y kan yojatzu' chi kan maneq qana'oj?
4Xa ayon k'a rat natej poqon roma ri awoyowal.
Y xa man ruk'amon ta k'a chi awoma rat, ri Dios nuben chike ri winaqi'
chi ke'el-el chuwech re ruwach'ulew.
Y chuqa' xa awoma ta rat, ri Dios yerunim-el ri juyu' k'a juk'an chik.
Ri Bildad nubij ri xtikik'uluwachij ri itzel taq wineq
5Kan qitzij chi ri kik'aslen ri winaqi' ri maneq Dios chikiwech,
kan achi'el jun q'aq' y k'o jun q'ij xa xtichup;
y ri ruxaq ri kiq'aq' ri' man xtisaqirisan ta chik.
6Y keri' ri pa rachoch xa xtiq'equmer kan roma xchup ri saqil;
ri ruq'aq' ri nisaqirisan xa xtiken-qa.
7Ri maneq Dios chikiwech xa kan man xketikir ta chik xtikiya' nima'q taq kixaka'l,
y ronojel ri ch'abel ri nikibij richin yekito' ri wineq, xa jari' ri xtibanon chike chi xketzaq.
8Kan roma k'a ri rubanik ri rubinibal chupan ri ruk'aslen, xtiqaqa pa jun ya'l pikbel
Ri rubinibal kan choj k'a xtuk'uaj k'a pa ruwi' jun jul-pikbel.
9Ri pikbel kan xtuchop k'a chi ruqul-raqen,
y chiri' xtujitz' kan ri'.
10Ri pikbel kan jebel muqun kan rij,
y k'o kan chiri' pa bey ri akuchi niq'ax-wi.
11Xabakuchi k'a nibe-wi; kan jantape' ruxibin-ri';
y kan nuna' chi k'o tzeqelibeyon richin.
12Ri ruchuq'a' xa kan xtik'is y xtilawalo',
y ri rutijoj-poqonal kan xtok k'a achi'el jun rachibil ri k'o-apo naqaj chire.
13Y ri ruyabil kan xtutaluj-ri' chupan chijun ri ruch'akul,
y ri yabil ri' kan richin kamik;
kan xkeruk'is ruchuq'a' ri ruq'a-raqen.
14Ri kamik kan xtrelesaj k'a pe ri wineq ri' pa rachoch,
y xtuk'uaj k'a rik'in ri rajawal kamik.
15Ri rachoch ri wineq ri' kan xtiya'ox k'a ruq'aq'al,
y xtijopix ri chuwilej-abej pa ruwi' richin nich'ajch'ojirisex.
16Kan xtuk'uluwachij k'a achi'el nuk'uluwachij jun che',
toq nichaqi'j-qa ri ruxe', y keri' k'a pa rutum-el.
17Ri wineq ri' kan jumul man xtinatex ta chik chuwech chijun re ruwach'ulew,
y ri rubi' kan jumul xtimestex.
18Kan jumul k'a xtelesex-el chikikojol ri kan k'a k'o na kik'aslen;
kan xtelesex k'a el ri akuchi k'o saqil y xtiq'axex akuchi ruyon q'equ'm k'o.
19Kan ni xa ta jun rijatzul ri xtik'oje' kan chikikojol ri winaqi' ri pa rutinamit,
ni xa ta jun ri xtik'ase' kan y nik'oje' ta kan ri pa rachoch.
20Y ronojel k'a ri xuk'uluwachij ri wineq ri' kan xtetamex k'a koma konojel ri ek'o pa qajbel-q'ij y ri ek'o pa relebel-q'ij,
y kan xkebaybot k'a roma xibinri'il.
21Keri' xtibek'is ri ruk'aslen jun wineq ri maneq Dios chuwech.
Kan k'a chiri' k'a xtapon-wi ri kan man xukanoj ta ri Dios.
Currently Selected:
Job 18: KQC
Highlight
Copy
Compare
Share
Want to have your highlights saved across all your devices? Sign up or sign in
Kaqchikel Bible © Bible Society in Guatemala, 2003.
