Job 16
16
Q'ejelonik ri maneq rejqalen
1K'ari' ri Job xch'on chik y xubij:
2Kan k'iy k'a mul wak'axan ch'abel re achi'el nibij rix wakami.
Chi'iwonojel rix xa man nikuquba' ta nuk'u'x;
xa ruyon ch'abel ri nupaxij wánima ri ibin-qa.
3¿Kan xtibe ta k'a ruwech ri tzij ri niben y man jun bey xkixtane'?
¿Ri nabij rat kan ja ri' kami ri ruk'amon chi niban?
4Yin chuqa' yitikir ta yich'on achi'el ri yixch'on rix,
xa ta yin ink'o ta pan ik'exel y rix ixk'o ta pa nuk'exel yin.
Kan yitikir ta ninbij ronojel ri ch'abel ri xibij yan qa rix,
y kan ninsiloj ta apo nujolon chiwech roma ninna' chi wetaman ronojel.
5Jak'a yin man ta keri' ch'abel ri yenbij chiwe;
ri nuchi' kan man ta nitane' richin chi ninya' iwuchuq'a' chupan ri iq'axo'n.
Ri Job nubij ri ruk'ayewal ri ruya'on ri Dios pa ruwi'
6Wi yich'on, ri nuq'axo'n man nik'is ta el;
y wi yitane-qa, ri nuq'axo'n man xkiruya' ta kan.
7Ri Dios kan rubanon k'a chuwe chi xiq'itej yan;
kan xuya' q'ij chi xa nuyonin chik kan, roma xa e maneq chik wachibil.
8Kan yakatajineq k'a chuwij, achi'el jun sujunel.
Xuben chi kan xibaqir-qa y xaxe chik ri nutz'umal k'o chuwij,
ri winaqi' kan jari' ri kichapiben-wi-ki', chi yin in jun aj-mak.
9Ri Dios roma ri royowal, chi wech' chi wech' yiruk'is-el.
Kan achi'el nuqach'ach'ej rey chuwij;
y kan ruch'ikon ri runaq'-ruwech chuwij, achi'el jun etzelanel wichin.
10Ri winaqi' xkijeq k'a pa kichi' chuwij yin;
xkaqer k'a ri nupalej roma xinkik'ixbisaj.
Kan konojel k'a xkimol-ki' chuwij.
11Ri Dios xiruya' k'a pa kiq'a' ri winaqi' ri xa maneq Dios chikiwech.
Kan xirujech k'a pa kiq'a' ri itzel taq winaqi'.
Ri Job nibison roma ri rubanon ri Dios rik'in
12Kan ronojel k'a utz eleneq chinuwech toq rija' xuwulaj ronojel chinuwech.
Xiruchop k'a chirij nuwi' y xiruq'ututej,
y kan ja yin k'a ri xiruq'ijuj richin yirutzeq.
13Ri ruch'ab rija', kan man jun k'a ti nuq'ij chuwech.
Kan xiruq'ijuj y xuteq'uj nupan;
y ri nuk'ay kan xbiyin pan ulew.
14Kan jantape' in ruya'on-pe pa tijoj-poqonal.
Kan jantape' yakatajineq chuwij,
achi'el nuben jun achin richin oyowal.
15Y jari' xbanon chuwe chi janila yibison y nukusan ri tzieq richin bis.
Xa maneq chik nuq'ij; xa jare' nutikiliben nik'aj-nuwech pan ulew.
16Ri runaq' taq nuwech kan e sipojineq chik k'a roma oq'ej.
Ri nutz'ubal kan xeq'equmatej yan k'a.
17Keri' nuk'uluwachin man rik'in chi yin kan man jun bey nuyakon ta nuq'a' richin ninben ri itzel,
y ri nuch'owen rik'in ri Dios kan ch'ajch'oj-wi.
Ri Job kan rukuquban ruk'u'x rik'in ri Dios
18Kan ek'o-wi k'a ri ye'ajowan nukamik,
jak'a rat ruwach'ulew man taya' q'ij chi ri woq'ej nichup ruwi',
y man nak'axex ta ri nink'utuj.
19Jak'a ri etamayon ri qitzij chuwij, kan ja ri k'o chila' chikaj,
y ja rija' ri nito'on wichin.
20Stape' ri wachibil kan janila yinketzelaj,
yin kan chuwech ri Dios yinoq'-wi, richin chi kiruto'.
21Ja rija' ri nich'ojin chuwech ri Dios pa nuk'exel,
achi'el nuben jun wineq ri nich'on pa ruk'exel ri rachibil.
22Ri rajlabal ri nujuna' xa juba' chik ok,
y yin xtinchop-el bey ri akuchi man xkitzolin ta chik pe.
Currently Selected:
Job 16: KQC
Highlight
Copy
Compare
Share
Want to have your highlights saved across all your devices? Sign up or sign in
Kaqchikel Bible © Bible Society in Guatemala, 2003.
