Job 15
15
Ri Elifaz nuch'olij ri Job
1K'ari' xch'on chik ri Elifaz ri aj-Temán y xubij chire ri Job:
2Jun wineq achi'el rat, ri k'o runa'oj, man yerubila' ta ch'abel ri maneq kejqalen.
Man choj ta keri' xkerubila' ch'abel,
achi'el xa ta e k'amon-pe roma ri kaq'iq' ri nipe kere' pa relebel-q'ij.
3Jun ri k'o runa'oj man xkerukusala' ta ch'abel ri man jun kejqalen,
ni man xkerubila' ta tzij ri xa man jun utz nuk'en-pe.
4Y wi ri abey rat keri', man jun ri xtik'oje' rukiy ri Dios chuwech.
Kan man jun chik ri xtikanon richin ri Dios richin nitzijon rik'in.
5Rat kan ja ri achi' ri niq'alajirisan ri itzel abanobal,
roma xa ja ri kaq' ri itzel taq winaqi' ri xakusaj richin xach'on-qa.
6Xa kan ja ri achi' rat ri nisujun awichin, y man ja ta yin.
Kan ja ri achi' rat niq'alajirisan ri achike abanikil.
7¿Kan ja kami rat ri nabey achin ri xalex chuwech re ruwach'ulew,
richin chi más awetamabal?
¿Kan atk'o chik kami rat toq man jani ek'o ta ri nima'q taq juyu',
richin chi k'o más ana'oj?
8¿Kan xak'oje' kami rat chupan ri molojri'il ri xuben ri Dios,
richin awetaman ri nuch'ob rija'?
¿Ri na'oj xa kan xaxe kami chawe rat xjach-wi?
9¿Achike kami ri awetaman rat y roj kan man qetaman ta?
¿Xa kan xaxe kami awik'in rat k'o-wi ri kan niq'ax ronojel chawech y roj maneq qik'in?
10Tatzu' chiqakojol roj ek'o winaqi' ri seq chik ri rusumal taq kiwi'
y ek'o achi'a' ri kan janila chik k'iy kijuna'.
Kan más k'o chik kijuna' ke chuwech ri atata'.
11Chawech rat, achi'el xa man jun rejqalen ri kuqubabel-k'u'x ri nuya' ri Dios chawe,
ri kan rik'in ch'uch'uj taq ch'abel y ajowabel niqabij chawe.
12¿Achike roma toq kan naya' q'ij chi ja ri nuna' ri awánima ri nuk'uan awichin?
¿Achike roma toq la runaq' taq awech kan nuk'ut ri awoyowal?
13¿Achike k'a roma toq kan janila yakatajineq awoyowal chirij ri Dios,
roma kan jebel q'alaj rik'in ri ch'abel ri ye'el pan achi'?
14Jun wineq xa man jebel ta rubanik ri ruk'aslen, richin chi kan ch'ajch'oj ta.
Jun wineq kan etaman k'a ri' chi jun ixoq ri xalan richin chuwech re ruwach'ulew.
15Roma ri Dios ni kik'in ri rusamajela' ri ek'o rik'in man nukuquba' ta ruk'u'x,
ni ri kaj man ch'ajch'oj ta chuwech rija';
16¡K'atala', chik jun achin ri kan man jun narayij chire ri ruk'aslen y chuwirineq chupan,
ri kan jebel nuna' nuben ri itzel taq banobel, achi'el xa ta nuqum ruya'!
Ri ruk'ayewal ri nipe pa ruwi' ri banoy etzelal
17Kinawak'axaj k'a, y kan xkatintijoj;
kan xtink'ut k'a chawech ronojel ri nutz'eton;
18ri q'alajirisan kan chikiwech ri achi'a' aj-na'oj koma ri qati't-qamama',
y rije' man jun nikewaj chire.
19Ri ruwach'ulew xa kan pa kiq'a' chuqa' rije' xjach wi kan.
Ri na'oj ri xk'oje' kik'in kan kichin rije',
roma kan man xkiya' ta q'ij chi ch'aqa' chik winaqi' xkixol-ki' kik'in.
20Ronojel q'ij chire ri kik'aslen ri winaqi' ri maneq Dios chikiwech xa kan ruyon q'axo'n.
Keri' chuqa' ri ruk'aslen jun ri kan yeruya' pa ruk'ayewal ri ch'aqa' chik wineq.
Xa kan q'axo'n nik'oje' rokik k'es chuwech re ruwach'ulew.
21Xa kan ruyon k'a ch'abel richin xibinri'il ri yerak'axaj;
toq jebel eleneq chuwech ronojel jari' toq yepe ri eleq'oma' chirij.
22Man nril ta chik achike nuben roma nuch'ob chi man nel ta chik pe chupan ri ruq'equmal ri k'aslen ri akuchi k'o-wi.
Nuna' chi kan xaxe chik ri kamik royoben.
23Rija' xaxe chik royoben chi ri ruch'akul nok kiway ri k'ucha';
y rija' kan retaman chi ri q'ij ri' kan xtapon-wi.
24Ri ruk'ayewal ri e yakatajineq chirij y ri ch'obonik ri yeruben;
nuben chire ri ránima chi jantape' ruxibin-ri'.
Kan nikisech ruk'u'x achi'el toq nisach ruk'u'x jun rey ri kan k'o chi nibe pan oyowal.
25Jare' ri nuk'uluwachij jun ri kan rik'in k'olon-q'a' niyakatej chirij ri Dios,
y kan janila nunimirisaj-ri' chuwech ri k'o ronojel uchuq'a' pa ruq'a'.
26Jare' ri nuk'uluwachij ri kan rik'in k'a nimirisanen niyakatej chirij ri Dios,
y kan kow nuna' roma rewan-ri' chirij ri pimilej rutobal.
27Ri kan xaxe rija' ri nuch'ob-ri', roma ri' xaxe wi ti'oj ri rupalej;
y e ti'oj ri tzan taq racheq y ri rupan; xaxe ri' ri nuch'ob.
28Jak'a kan xtapon jun q'ij toq xa pa jun tolan y wuluwik tinamit xtk'oje-wi kan.
ri jay ri ek'o chupan ri rutinamit xa xketole' kan
y xaxe chik mulumik abej ri xkek'oje' kan.
29Man jun bey xtik'iyer ta más ri rubeyomel, y chuqa' kan man xtiyaloj ta.
Ni chuqa' ri rulew y ri ruxoral man xkenimer ta más chuwech re ruwach'ulew.
30Kan man k'a xtikolotej ta chuwech ri kamik.
Xa junan k'a xtuk'uluwachij kik'in ri ruq'a' taq che',
ri kan k'o chi ye'apon pa q'aq'.
Rik'in ri ruxla' ri Dios, xtibe achi'el nibe ri rusi'j ri che' roma ri kaq'iq'.
31Ri wineq kan man ta k'a xtiq'olotej rik'in ri xa maneq rejqalen,
roma wi keri' nuben, xa ja ri maneq rejqalen ri xtuk'ul richin rajel ruk'exel.
32Roma jun wineq ri nibanon keri', xa nuk'uluwachij achi'el ri che' toq man jani utz y ja ri' nichoy-el,
ri rujotay kan man xkeraxer ta chik pe.
33Xa xtok k'a achi'el juwi-uva ri xa yeruch'ototej-pe ri tzeqaj ruwech,
ri man jani e cheq' ta.
Y xa achi'el jun che' olivo ri xa man yepa'e' ta ri rusi'j y xa yebulul-pe.
34Ri tzobaj ri kan kachibil-ki' y xa maneq Dios chikiwech,
xa man xkek'oje' ta kan kimi'al kik'ajol.
Ri e kipaban-q'anej kachoch rik'in ri méro kik'ulun pan ewel, xa xtuk'is q'aq'.
35Xkiben k'a ch'a'oj y re' xuk'en-pe etzelal chike.
Kan pa kánima rije' xalex-wi-pe richin nikiben q'oloj chike ri winaqi'.
Currently Selected:
Job 15: KQC
Highlight
Copy
Compare
Share
Want to have your highlights saved across all your devices? Sign up or sign in
Kaqchikel Bible © Bible Society in Guatemala, 2003.
