Job 14
14
Ri ruk'aslen ri wineq xa ti juba-ok
1Roj winaqi' xa maneq k'a quchuq'a' y nik'atzin qato'ik,
y chuqa' xa ka'i' oxi' ok q'ij nuben ri qak'aslen.
Man rik'in ri' kan nojineq chi ruk'ayewal.
2Ri k'aslen nik'ulun-pe, achi'el nik'ulun-pe jun kotz'i'j,
y xa chi'anin nimayer-qa.
Chuqa' achi'el ri muj ri xa junanin niq'ax-el.
3¿Achike k'a roma toq xa pa ruwi' jun ti achin achi'el yin ach'ikon-pe ri runaq' awech,
y kan yinawoyoj chawech richin naq'et-tzij pa nuwi'?
4Roma kan man tikirel ta k'a chi k'o ta jun ri kan ch'ajch'oj,
toq xa wineq y k'a k'o na chuwech re ruwach'ulew.
Kan man jun.
5Kan ja rat k'a ri yabin ri janipe' q'ij ruk'aslen naya' jun wineq.
Ja rat chuqa' yabin janipe' ik' nik'ase' ri wineq.
Kan ja rat yabin akuchi napon-wi ri ruk'aslen,
y ri wineq man nitikir ta niq'ax jun ti ramaj chire ri ruk'aslen ri abin rat.
6Kan taya' k'a q'ij chi yinuxlan ta juba' pan aq'a'
chi kan man ta chik chi jantape' k'o ri runaq'-awech pa nuwi'.
Xa taya' q'ij chi nink'is na el ri q'ij richin ri nuk'aslen y yikikot ta,
achi'el nikikot jun ri nisamej chiq'ij. 7Yin man in junan ta k'a rik'in ri jun relik che', roma jun che' nijotayin,
stape' niqasex-qa kan k'a tikirel na chi ye'el-pe ralajul y yek'iy.
8Y man rik'in ri ruxe' ri che' nipe rurijixinen chuxe' ri ulew,
y ri rukuta'm ri k'o chuwa-kaq'iq' xa niq'ey-qa.
9Jak'a wi nuk'ul ri ya' xa kan niberaxer-pe,
y kan nibe-el chik pe ruq'a' achi'el jun che' ri kan k'a alaj na.
10Jak'a toq ri wineq niken, kan jumul nik'is ri ruchuq'a'.
Toq nitane' richin nujiq'aj ri ruxla', jari' xk'is chiri'.
11Roj winaqi' xa oj achi'el k'a ri ruxla' ri ya' ri niyakatej-pe pa ruwi' ri palou;
xa oj achi'el ri ruxe' jun raqen-ya' ri xa chaqi'j chik.
12Roj kan yojtzaq pa ruq'a' ri kamik y kan man yojtzolin ta chik pe,
toq kan k'a q'axineq chik na ri kaj.
Ri rurayibel ri Job pa ruwi' ri ruq'axo'n
13¡Tabana' utzil nu-Dios, kinaya-qa k'a chuxe' ulew, richin yinewatej chawech.
Toq ik'owineq chik ri awoyowal chuwij, yinoqaqa ta chik chi'ak'u'x y yinabekolo' ta pe chiri'!
14Wi ri wineq niken, y nik'ase' ta chik jun bey,
yin kan ronojel ta q'ij chire ri nuk'aslen xtinwoyobej-apo.
Xtinwoyobej k'a toq xtoqaqa na ri q'ij richin yinok-el jun wineq k'ak'a'.
15K'ari' xkinawoyoj, y yin kan xtink'uluba-apo ri ach'abel,
roma rat kan janila nawajo' natzu' chik ri abanon rik'in aq'a'.
16Kan atzuliben ri nubinibal chuwech re ruwach'ulew,
y aya'on ri awech pa nuwi'.
Jak'a ri ninwajo' yin, chi man ta atzuliben chuqa' ri numak.
17Ri nuxolq'otij ri atzij rat, xa kan yatikir naben chire chi achi'el najitz' ruwi' pa jun costal;
xa kan yatikir namatzej ruwi' ri numak.
18Jak'a kan tikirel chuqa' chawech chi achi'el naqasaj jun juyu' y nak'ajij jumul.
Naben chuqa' chire jun ruwech siwan ri kan abej, chi nawelesaj ri akuchi k'o-wi.
19Kan yatikir chuqa' naben achi'el nuben ri ya' toq nuk'uaj ri abej ri k'o pa rubey,
y naben chuqa' achi'el nuben ri ya' richin job toq nuch'ej-el ri ulew.
Kan keri' chuqa' yatikir naben rik'in ruk'aslen ri wineq chi man jun chik nroyobej-apo.
20Rat kan naya' k'a pe ronojel ri awuchuq'a' pa ruwi' y yach'akon-el chirij.
Kan k'a nayoj na el rubanik ri nitzu'un y k'ari' naben chire chi nibe.
21Y ri chiri', kan man chik xtretamaj ta wi ri e ralk'ual kan, nimirisan kiq'ij,
y chuqa' ri chiri', kan man chik xkerutz'et ta pe ri e ralk'ual kan, wi xa ek'o pa jun meba'il.
22Ri chiri' xa kan xaxe k'a ri ruq'axo'n ri ruch'akul rija' ri nuna';
xa kan xaxe chuqa' ri rubis rija' ri nuna'.
Currently Selected:
Job 14: KQC
Highlight
Copy
Compare
Share
Want to have your highlights saved across all your devices? Sign up or sign in
Kaqchikel Bible © Bible Society in Guatemala, 2003.
