Job 13
13
1Ronojel k'a ri xabij kan e nutz'eton rik'in ri runaq' taq nuwech,
y ri wak'axabal kan kak'axan chuqa' y q'axineq chikiwech.
2Achike ri iwetaman rix, ja chuqa' ri' ri wetaman yin;
yin man más ta in ko'ol ke chiwech rix.
3Jak'a yin más ninwajo' yich'on rik'in ri Dios ri k'o ronojel uchuq'a' pa ruq'a',
roma kan ninwajo' ninchol chire rija' pa ruwi' re nuk'uluwachin.
4Roma rix xa kan jebel ok rubanik niben chire ri itz'ukun tzij richin nimuq rij ri qitzij.
Iwonojel rix xa nibananej chi ix aq'omanela',
y xa man jun yixtikir niwaq'omaj.
5Ri más ruk'amon chi niben rix wakami richin chi niq'alajin chi kan k'o ina'oj,
ja ri kixtane' chi ch'owen.
6Yin ninwajo' k'a yich'on y ninbij chiwe ri ninch'ob;
man ninwajo' ta k'a chi nik'oje' kan ri ch'abel wik'in.
Xa kan ninwajo' ninto-wi' chiwech.
7¿Nich'ob rix chi ri ch'abel ri xa man pa ruchojmilal ta ri ibin-qa,
kan ja chuqa' ri' nubij ri Dios?
¿O nibij rix chi nito' ri Dios rik'in ri tz'ukun taq tzij ri ibin-qa?
8¿Achike roma ja rix ri yixtijo iq'ij chi yixch'on pa ruk'exel ri Dios?
¿Achike roma xa ja rix ri yixch'ojin pa ruk'exel rija'?
9¿Achike ta nuben chiwe rix chi xa ja ta ri ik'aslen rix ri ninik'ox roma ri Dios?
¿Yixtikir kami niq'ol rija', achi'el niq'ol jun wineq?
10Y wi ta rix pan ewel ye'ich'obola' ri man pa ruchojmilal ta,
rija' kan nuya' ta rutojbalil ri ibanobal, roma xaxe ri ch'aqa' chik niya' kejqal.
11Kan qitzij na wi ri runimirinen xtuben chiwe chi xtixibij-iwi',
y ri xbinri'il kan xtiqaqa pan iwi'.
12Ri na'oj ri ibin chik qa maneq kejqalen;
xa achi'el ri chaj, ri xa man jun nik'atzin-wi.
Chuqa' ri nich'ob xa maneq ruxe';
xa achi'el ch'abeq, ri man k'ayew ta nilubulu-qa.
13Man k'a kixwolol, roma wakami ja yin ri ninwajo' yich'on iwik'in,
y k'ari' tibij k'a ri achike ri niwajo' nibij.
14Yin kan ninwoyobej k'a xabachike chi ruk'ayewal xtiyakatej-pe chuwij.
Kan ninwoyobej chi ri nuk'aslen k'o ri nuk'uluwachij.
15Y stape' ri Dios kan yirukamisaj, yin kan nukuquban nuk'u'x rik'in.
Chuqa' xtinq'alajirisaj chuwech rija' ri rubanik ri nuk'aslen.
16Kan jare' k'a ri xtikolon wichin chuwech rija';
roma wi jun wineq maneq rukiy ri Dios chuwech, man xtitikir ta xtipa'e-apo chuwech.
17Tiya' k'a ixikin jebel chire ri nuch'abel,
y ronojel ri ninq'alajirisaj chiwe kan ta xtok kan pa taq ixikin.
18Wakami k'a, wi yin ninchol chiwech ri rubanik ri nuk'aslen,
yin kan wetaman chi kan xtik'ulun chi man jun numak.
19¿Kan k'o kami jun ri nitikir nubij chi nupalej ri itzel nubanobal?
roma wi keri' más utz man jun chik ch'abel ninbij y más ta utz yiken.
Ri yeruk'utuj ri Job chire ri Dios
K'ari' ri Job xubij:
20Nu-Dios yin, xaxe k'a nink'utuj utzil chawe chi k'o ka'i' banobel ri man taben wik'in;
y wi kan xtaben k'a ri nink'utuj chawe, kan man jun k'a ri xtinwewaj chawech.
21Tabana' utzil tawelesaj pa nuwi' re tijoj-poqonal re aya'on pa nuwi',
y chuqa' kan katane' chuwij chi jantape' aya'on xibinri'il wik'in.
22Wi kan ja rat ri yatikiriban yach'on-pe wik'in, yin xtink'uluba-q'anej ri ach'abel.
Y wi ja yin ri yich'on-q'anej chawe nabey, ja rat ri xkak'uluban-pe nuch'abel.
23Kan tabij k'a chuwe janipe' itzel banobel nubanon,
y janipe' chi mak ri nubanon chawech.
Richin keri' ninwetamaj janipe' mul nupaban-wi' chawech,
y ninwetamaj janipe' mak nubanon chawech.
24¿Achike roma toq ja ri awij naya' kan chinuwech,
y naben chuwe chi in jun chike ri ye'etzelan awichin?
25¿Achike roma toq kan janila niqa' chawech chi yinaxibij?
Roma yin xa in achi'el ok jun ti ruxaq che'.
¿Achike roma toq at yakatajineq chuwij?
Roma yin xa in achi'el ok jun chaqi'j ti ruxaq k'im.
26¿Achike roma chupan re aq'atoj-tzij k'iy itzelej taq banobel ri ye'atz'ibaj chuwij,
y kan nak'en-pe ronojel ri nubanobal ri xenbanala' toq k'a in k'ajol na?
27Yin kan in asamajel wi k'a y kan in achapon kow.
Xa kan ninna' chi achi'el aximon ri waqen.
Kan aya'on k'a ri awech pa ruwi' ronojel ri nubanobal,
y kan atzuliben k'a ri retal ri waqen ri akuchi ninya-wi ri nuxaka'l.
28Rat keri' yatajin chubanik wik'in, rokik yin q'ij-q'ij in beneq-qa,
achi'el toq ri tzieq nichikopir-qa, xcha'.
Currently Selected:
Job 13: KQC
Highlight
Copy
Compare
Share
Want to have your highlights saved across all your devices? Sign up or sign in
Kaqchikel Bible © Bible Society in Guatemala, 2003.
