Job 12
12
Ri Job nuk'uluba' ri ruch'abel ri Zofar
1K'ari' ri Job xch'on chik kik'in ri yeq'ejelon richin y xubij:
2Kan qitzij na wi ja rix ri ix ruch'abel ri tinamit;
y toq xkixken rix, jari' chuqa' toq xtik'is ri na'oj chuwech re ruwach'ulew.
3¿Y xaxe kami rix ri k'o inojibal?
Ni, yin chuqa' k'o nunojibal.
Yin man más ta in ko'ol ke chiwech rix.
¿Achike ta k'a man ta etamayon ronojel ri xibij-qa?
4Yin in jun chike ri xa nitze'ex koma ri rachibil;
jun ri xch'on-q'anej rik'in ri Dios, y xk'ulubex-pe ri ruch'abel.
Man rik'in ri', ri choj y tz'aqet ruk'aslen kan nitze'ex koma ri rachibil.
5Ri kan utz ek'o man nikajo' ta jun ri xa k'ayew rubanon,
y kan man jun nuben chike chi nikitzeq ri xa nijilil beneq richin nibetzaq.
6Ri kachoch ri eleq'oma' kan beneq pa jotol,
y ri nikiyek royowal ri Dios kan jikil ek'o.
Rije' kan kibanon k'a chire ri kuchuq'a'
y ri kina'oj chi jari' ri e ki-dios.
Ri uchuq'a' y ri na'oj ri k'o rik'in ri Dios
7Ronojel kan ja ri Dios ri niya'on q'ij richin chi nibanatej,
roma xa ta yech'on ri chikopi' ri yebiyin pa ruwi' ulew, yixkitijoj ta chi keri'.
Y xa ta yech'on ri aj-xik' taq chikopi', rije' nikichololej ta chuqa' chiwe.
8Keri' xa ta nik'utuj chire ri ruwach'ulew y nich'on ta pe, kan nuk'ut ta chiwech.
Chuqa' xa ta yixtikir nik'utuj chike ri ker ri ek'o chupan ri palou kan nikiq'alajirisaj ta chiwe.
9Chike konojel re' ¿k'o kami jun ri man retaman ta chi ja ri Jehová banayon richin?
10Kan ja wi ri ruchuq'a' ri Dios ri xya'on kik'aslen konojel ri ek'o chuwech re ruwach'ulew.
Kan ja rija' ri xya'on ri uxla' richin k'aslen chike konojel ri winaqi'.
11Ri qak'axabal kan richin k'a chi nrak'axaj,
y nuya' rukojolil ronojel ruwech ch'abel,
kan achi'el ri qaq' nuna' ri ki' y ri k'ey.
12Kan tikanoj na'oj kik'in ri e rijita'q taq achi'a' chik.
Chupan ri juna' e kiq'axalon chik, k'o k'iy na'oj ruya'on kan chike.
13Jak'a ri na'oj y ronojel ri uchuq'a' kan richin ri Dios;
kan retaman y kan nutzu' chik apo ri peteneq.
14Roma ri' toq rija' k'o ri nuwulaj, man jun chik nitikir nipaban-q'anej.
Toq rutz'apen jun wineq pa jun tijoj-poqonal, man jun ri xtisq'open-el richin.
15Wi rija' nuq'et ri job, ronojel nichaqi'j-qa;
y wi nuteq-pe janila job, numuq ri ruwach'ulew.
16Ri uchuq'a' y ri ch'akonik kan richin k'a ri Dios.
Kan ja chuqa' rija' ri niq'aton-tzij pa ruwi' ri wineq ri niq'ol,
y pa ruwi' ri niq'olon jun chik wineq.
17Rija' kan nuben k'a chike ri yepixaban chi nik'is ch'abel kik'in,
y nuben nakaneq chike ri to'onela'.
18Rija' nuben chike ri e rey chi nrelesaj ri q'atbel-tzij pa kiq'a',
y nuben chike chi yexim xekipan rik'in kolo'.
19Kan yerelesaj k'a el ri sacerdote ri ek'o pa taq kisamaj y choj keri' yebe.
Kan yerelesaj-el ri nikina' chi k'o uchuq'a' pa kiq'a'.
20Rija' nutz'apej kichi' ri kan banon chike chi ja ri qitzij ri nikibij,
y nrelesaj ri utzilej nojibel chike ri rijita'q taq achi'a'.
21Nuben chike ri tata'al chi maneq chik kiq'ij,
y ri k'o janila kuchuq'a' kan nrelesaj ri uchuq'a' kik'in.
22Rija' nuq'alajirisaj ri kan man e tz'etel ta ri ek'o pa q'equ'm,
y kan nrelesaj chuwa saqil ri rumujal ri kamik.
23Rija' yeruwinaqirisaj ri tzobaj winaqi' richin ri ruwach'ulew,
y rija' chuqa' nik'ison kichin.
Yerutaluj-el y k'ari' yerumol chik.
24Rija' nuben chike ri aj-raqen kichin ri tinamit ri ek'o ketamabal
chi man yech'obon ta chik.
Nuben chike chi yebe-kela', yebe-kela'
achi'el xa ta e beneq pa jun tz'iran ruwach'ulew ri akuchi xa maneq bey.
25Yemaqaqlan k'a e beneq, achi'el pa q'equ'm e beneq-wi y maneq saqil.
Nuben chike chi yetzalima'y yebiyin achi'el nikiben ri q'abarela'.
Ri Job nuk'ut chi kan choj ruk'aslen
Chuqa' ri Job xubij:
Currently Selected:
Job 12: KQC
Highlight
Copy
Compare
Share
Want to have your highlights saved across all your devices? Sign up or sign in
Kaqchikel Bible © Bible Society in Guatemala, 2003.
