Deut 23
23
Ri wineq ri man utz ta yek'oje' pa jun molojri'il
1Ri achin ri xa paxin ri rukowil y ri tzak'in-el ri rutza'n ri rukowil, man utz ta chi nik'an ruwech chupan ri molojri'il richin ri Jehová.
2Ri e sik'on taq ak'uala' toq yenimer man tik'an kiwech chupan ri molojri'il richin ri Jehová, stape' xtiq'ax lajuj sol winaqi' chike ri kijatzul chuwech ri ruwach'ulew.
3Ri e rijatzul ri Amón y ri e rijatzul ri Moab man jun bey tik'an kiwech chupan ri molojri'il richin ri Jehová, ni ta chirij ri lajuj sol winaqi' chike ri kijatzul; 4roma toq roj xojq'ax chunaqaj ri kiruwach'ulew, toq oj eleneq-pe pan Egipto, rije' man xkisuj ta juba' qaway, ni juba' qaya'. Y chuqa' xkitoj ri Balaam, ruk'ajol ri Beor, ri peteneq pa Petor richin ri Mesopotamia, richin tuya' jun etzelanik pa qawi'. 5Jak'a ri Jehová ri qa-Dios man xrak'axaj ta ri Balaam, y pa ruk'exel ri itzel oyonik xa kan ja ri urtisanik xuya' pa qawi', roma janila rajowabal ri Jehová ri qa-Dios pa qawi' roj. 6Y roma ri' rix man tirayij chi rije' utz ta nikik'uaj-ki' iwik'in y man jun oyowal chi'ikojol rokik k'o ik'aslen, y re' kan richin jantape'.
7Man rik'in ri' man ke'iwetzelaj ri e rijatzul kan ri Edom, roma xa kan e iwach'alal naqaj, y keri' chuqa' ri aj-Egipto, roma rix chuqa' xixk'oje' pa kiruwach'ulew rije'. 8Jak'a ri e kijatzul ri xkek'oje' chirij ri rox sol, utz yek'oje' chupan ri molojri'il richin ri Jehová.
Pixa' richin ri ch'ajch'ojirisanen
9Toq rix ixk'o pa labal kik'in ri e etzelanel iwichin, kan titija' k'a iq'ij richin man tiben ri man utz ta achi'el nubij ri pixa'. 10Wi ta chupan ri chaq'a' k'o ta nuk'uluwachij jun achin y re' nuben chire chi man ch'ajch'oj ta, k'o chi xtel-el ri akuchi ixk'o-wi-qa, y man xtok ta apo chijun q'ij. 11Y k'a toq xtiqaq'ij na qa k'ari' natin, y k'ari' xtok-apo jun bey chik ri akuchi ixk'o-wi-qa.
12Chuqa' k'o chi nich'er ri akuchi yixpaman-wi, y kan nej juba' chire ri akuchi ixk'o-wi-qa. 13Kan jantape' k'a xtik'uaj jun iche' simej rutza'n, richin keri' toq yixbepaman, nik'ot jun jul rik'in ri che' ri', y toq xkixk'achoj nimuq kan. 14Roma ri Jehová ri qa-Dios kan nibiyaj chi'ikojol rix chiri' akuchi ixk'o-wi-qa, richin xkixrukol y xkerujech pan iq'a' ri e etzelanel iwichin. Y roma ri' ri akuchi ixk'o-wi-qa kan k'o chi jantape' ch'ajch'oj, richin chi ri Dios man jun tz'il xtutz'et chiri', y roma ta ri' yixrumalij kan.
Ri pixa' richin ye'ito' ri e animajineq
15Wi k'o ta jun loq'on samajel ri animajineq-el chuwech ri achoq ik'in k'o-wi y napon iwik'in rix, man titeq chik el rik'in ri xok rajaw. 16Tiya' q'ij chire richin tik'oje' kan iwik'in rix, chupan ri tinamit ri akuchi nrajo' nik'oje-wi rija', y man jun titz'ilon richin.
Man ke'iben itzel taq banobel
17Man tichop jun itzel k'aslen achi'el nikiben ri ch'aqa' chik winaqi', chi ri ixoqi' yek'oje' kik'in achi'a', y ri achi'a' yek'oje' kik'in kach achi'a' pa rachoch ri ki-dios, richin yeqa' chuwech ri ki-dios. 18Roma wi keri' niben, ri Jehová kan man niqa' ta chuwech, stape' nik'en-pe ri isujun chire rija'.
19Man tich'ojij chire jun iwinaq richin nutoj ral ri qajo'n ri rubanon iwik'in, wi ta méro, o xabachike ri yetij o xabachike ri ruqajon iwik'in. 20Jak'a chire ri man iwinaq ta ruk'amon chi nik'utuj ri ral ri ruqajo'n, y chire ri iwinaq man tik'utuj, richin keri' ri Jehová ri qa-Dios kan xtuya' urtisanik pan iwi' rik'in ronojel, chupan ri ruwach'ulew ri xtiwichinaj kan.
21Toq k'o jun nisuj chire ri Jehová ri qa-Dios richin niya' chire, xa kan tiya' chire chi'anin, roma rija' kan xtuk'utuj chiwe y kan xkixmakun chuwech, wi man xtiben ta ri isujun chire. 22Wi rix man jun nisuj man jun mak niben. 23Ronojel k'a ri nisuj richin sipanik chire ri Jehová ri qa-Dios, kan k'o chi niben, kan tiya' k'a apo ri xisuj rik'in ronojel iwánima.
24Toq yixok-apo chupan ri rulew jun iwinaq ri akuchi tikil-wi uva, man jun rubanon wi nitej ri janipe' niwajo', jak'a man jun tik'uaj-el pa taq iwachoch. 25Wi ta yixok-apo pa rulew jun iwinaq ri akuchi tikon-wi trigo, man jun nuben nik'uq-el juba' rik'in iq'a', jak'a man tikusaj jos.
Currently Selected:
Deut 23: KQC
Highlight
Copy
Compare
Share
Want to have your highlights saved across all your devices? Sign up or sign in
Kaqchikel Bible © Bible Society in Guatemala, 2003.
