Deut 24
24
Ri pixa' chirij ri ch'arojri'il richin ri e k'ulan taq winaqi'
1Wi jun achin nik'ule' rik'in jun ixoq y chaq k'ate' man nrajo' ta chik, roma k'o jun ri man utz ta xutz'et chire, jari' toq nuben jun wuj richin jachojri'il y nuya-el chire ri ixoq y xtrelesaj-el pa rachoch. 2Y wi ri ixoq nik'ule' chik rik'in jun achin, kan utz tik'ule'; 3jak'a wi ri ruka'n rachijil niken o napon jun q'ij man utz ta chik nutz'et y nujech-ri' rik'in y nuya' jun wuj richin ch'arojri'il chire y nrelesaj-el pa rachoch, 4ri nabey rachijil man ruk'amon ta chik nik'ule' rik'in, roma maneq chik ch'ajch'ojil rik'in ri ixoq; re kere' kan nrixowaj ri Jehová, roma ri' rix kan man tiben re etzelal re' chupan ri ruwach'ulew ri xtuya' ri Jehová ri qa-Dios chiwe richin xtiwichinaj kan.
Jalajoj ruwech pixa'
5Ri jun achin ri k'a juba' tik'ule', man xtitaq ta el pa labal, ni man xtiya'ox ta chik jun samaj chire; kan xtik'oje' pa rachoch jun juna' richin keri' nuya' kikoten chire ri rixjayil ri k'a juba' tik'ule' rik'in.
6Wi k'o jun wineq k'o nuqej iwik'in man tik'utuj kan ri ruka' o ri ruq'a' ruka' chire richin jun retal chi nutzolij ri ruk'as chiwe, roma re' xa kan achi'el ja ta ri ruk'aslen ri nik'utuj kan. 7Wi jun wineq nilitej chi releq'an-el jun ruwinaq richin nibe'ok rusamajel o richin nuk'ayij-el, ri nibanon keri' kan xtikamisex, richin nik'is-el ri etzelal chi'ikojol rix.
8Rik'in juba' nipe ta chiwij jun itzel laj yabil ri nutaluj-ri' kan titaqej k'a ronojel ri nikibij ri e sacerdote levita chiwe ri nubin yin chike. 9Toqaqa k'a chi'ik'u'x ri xuben ri Jehová ri qa-Dios chire ri María, toq e peteneq pa bey toq k'a juba' qojel-pe pan Egipto.
10Wi k'o niya' pa qajik chire jun iwachpochel utz nik'utuj jun retal richin qajbel richin, jak'a man kixok pa rachoch richin nibek'ama-pe ri nuya-pe chiwe. 11Xa kan kixk'oje' kan chuwa-jay y tiwoyobej ri achike xtuya-el rija' chiwe richin qajbel richin ri ruqajo'n ri rubanon iwik'in. 12Y wi ri nibanon qajo'n iwik'in xa kan man jun k'o rik'in, xaxe ri ruq'u' ri k'o rik'in y jari' ri xuya-el chiwe, man tik'oje-qa iwik'in jun aq'a' ri k'ul ri'. 13K'o chi nitzolij-el chire toq niqaqa yan qa ri q'ij, richin keri' k'o nuq'uj-qa toq niwer-qa. Keri' rija' xtroyoj urtisanik pan iwi' y kan xtiben jun utzilej banobel chuwech ri Jehová ri qa-Dios.
14Man tikamisaj pa samaj ri samajel ri nisamej chi q'ij iwik'in, ni man tiyek-qa ri xuch'ek yan, stape' iwinaq o man iwinaq ta. 15Toq nuk'is ri q'ij, kan jari' titojo-el chire, y man tiben chi nik'is-qa ri q'ij y man niya' ta chire ri xuch'ek, roma rija' xa man jun k'o rik'in y xaxe rik'in ri' nuq'axibej-wi-ri'. Richin keri' man nisujun ta chuwech ri Jehová ri qa-Dios chiwij y man yixqaqa ta pa mak rix.
16Ri te'ej-tata'aj man yekamisex ta roma kimak ri alk'ualaxela', y ni ta ri alk'ualaxela' man yeken ta roma ri kimak ri kite-kitata', xa kan chikijujunal k'o chi yekamisex roma ri kimak.
17Kan tibana' pa ruchojmilal kik'in ri man e iwinaq ta y ri meba'i'. Y chuqa' man tik'utuj jun rutziaq ri malka'n richin qajbel richin ri ruk'as. 18Man k'a timestaj chi rix chuqa' xixxime' pa samaj pan Egipto, y ri Jehová ri qa-Dios xixelesan-pe chiri'. Roma ri' ninbij chiwe richin kan titaqej ronojel re'.
19Toq xtapon ri q'ij richin q'atoj trigo chupan ri iwulew, wi rix nimestaj kan jun q'etaj trigo, man kixtzolin chik richin nibek'ama-pe. Re' xa kan tik'oje' kan richin nikik'uaj ri man e iwinaq ta ri ek'o chi'ikojol o jun meba' o jun malka'n, richin keri' ri Jehová ri qa-Dios kan xtuya' urtisanik pa ruwi' ronojel ri xtiben. 20Y toq xtapon ri q'ij richin niyikikej ri ruche'el ri olivo man tikamuluj rubanik, ri yek'oje' kan xa kan xtok kan kichin rije'. 21Keri' chuqa' toq nik'ol ri uva, man tinik'oj chukojol ri ruxaq wi k'o nik'oje' kan, kan tiya' kan kichin rije'. 22Toqaqa k'a chi'ik'u'x chi rix chuqa' kan man jun xk'oje' iwik'in toq xixk'oje' pan Egipto; roma ri' yin nibij chiwe chi titaqej ronojel re'.
Currently Selected:
Deut 24: KQC
Highlight
Copy
Compare
Share
Want to have your highlights saved across all your devices? Sign up or sign in
Kaqchikel Bible © Bible Society in Guatemala, 2003.
