Deut 22
22
1Wi k'o ta jun chiwe rix nutz'et chi sachineq jun bóyix o jun karne'l richin jun ruwinaq, man tuben chi man retaman ta, xa kan tutzolij-el chire. 2Jak'a wi ri rajaw xa man chunaqaj ta rachoch k'o-wi y man retaman ta ruwech, tuk'uaj-el ri ti chikop pa rachoch y tik'oje' rik'in, k'a toq xtibek'utux na rik'in k'ari' nuya-el chire. 3Y keri' chuqa' niben rik'in ri bur, o rik'in jun tzieq o xabachike ri sachineq pa bey y jun chiwe rix nilon; toq nikanox man tuben chi man rutz'eton ta.
4Wi k'o ta jun nutz'et kan pa bey chi tzaqineq ri rubur o rubóyix ri rach'alal, man tuben chi man nutz'et ta kan, xa kan tuto' kan chusik'ik ri ti chikop.
5Ri ixoq man tukusaj rutziaq ri achin richin nuben achi'el achin, y ri achin man tukusaj rutziaq ri ixoq richin nuben achi'el ixoq, roma ri banobel ri' kan itzel nutz'et ri Jehová ri qa-Dios.
6Wi k'o ta jun nril jun ti sokaj richin jun ti aj-xik' chikop pa ruwi' jun che', o pan ulew rik'in taq saqmolo' o taq alaji' y ri te'ej jupul pa ruwi', man tuk'uaj-el ri te'ej; y xaxe utz nuk'uaj ri taq alaji' o ri taq saqmolo'. 7Ri te'ej k'o chi nrisq'opej kan, richin keri' kan utz xkixbe, y k'iy juna' xkixk'ase' chuwech ri ruwach'ulew.
8Toq k'o jun chiwe rix nupaba-q'anej jun rachoch y taq'aj ruwi' nuben chire, k'o chi nuben jun tz'aq chirij chi jun ri ruchi' ri ruwi' ri jay, richin keri' wi k'o ta jun nitzaq-pe y niken, ri rajaw man jun rumak.
9Man titik jalajoj ruwech ija'tz pan iqejoj ri akuchi nitik-wi ri uva, roma wi jalajoj ruwech ija'tz ri nitik-qa k'o chi nich'er jun chire ri lajuj chire ronojel ri nel chuwech ri ulew ri'.
10Man tisamajij ri ulew rik'in jun bóyix rachibilan-el jun bur.
11Toq nikem itziaq man tikusaj juba' lana y juba' betz' lino chire.
12Tibana' taq retz'aba'l chi kaji' ruchi' ri itziaq ri achi'el taq k'olok'eq kibanik.
Ri mak chirij ri k'ulubik
13Wi jun ala' nik'ule' rik'in jun xten, y toq xk'oje' yan rik'in, xa man nrajo' ta chik, 14rik'in juba' nich'on itzel chirij, y nubij: Yin xik'ule' rik'in re xten re' y toq xik'oje' rik'in, xinwetamaj chi xa man xten ta chik, xticha'.
15K'ari' ri te'ej-tata'aj richin ri ixoq ri', nikik'en k'a pe ri retal chi ri kimi'al k'a xten na, y re retal re' nikijech chupan ri q'atbel-tzij chikiwech ri achi'a' ri k'o kiq'ij. 16Y ri rutata' xtubij chike ri achi'a' ri': Yin xinjech ri numi'al chire re jun ala' re' richin xk'ule' rik'in; y wakami xa man nrajo' ta chik. 17Y roma ri' rija' nich'on itzel chirij ri numi'al y nubij chi toq xk'oje' rik'in xa man xten ta chik. Wakami k'a titz'eta' re retal re ninya-apo chiwe chi ri numi'al k'a xten na, xticha'. Y k'ari' xtikirik'-apo ri tzieq richin retal chikiwech ri achi'a' ri k'o kiq'ij richin ri tinamit. 18Y ri achi'a' ri' xtikichop k'a ri achin ri' y xtikiya' ri rutojbalil ri rumak; 19y xtikiben chire chi xtuya' ka'i' libra rik'in nik'aj saqipueq, y re' xtuya' chire ri rujinan, roma xch'on itzel chirij jun xten chiri' pan Israel. Y chuqa' re achin re' kan jantape' k'a xtik'oje' ri rixjayil rik'in y man xtujech ta k'a ri' rik'in chijun ruk'aslen.
20Jak'a wi nibek'ulun-pe chi qitzij xa man xten ta chik, 21k'ari' xtelesex-el chuchi' ri rachoch ri rutata' y ri achi'a' richin ri tinamit ri' xtikikamisaj chi abej, roma kan janila nim ri itzel xuben pan Israel, roma xk'oje' yan achin rik'in toq k'a k'o na pa rachoch ri rutata'. Y keri' xtelesex ri etzelal chi'ikojol rix.
22Wi k'o ta jun achin nilitej kotz'ol rik'in jun ixoq ri k'ulan chik y k'o rachijil, kan chi e ka'i' xkekamisex; keri' xtik'is ri etzelal chikikojol ri qawinaq.
23Wi jun xten k'utun chik roma jun ala' y wi k'o ta chik jun achin nuk'ul pa tinamit y nik'oje' rik'in; 24jari' xke'uk'uex-el chi e ka'i' chuchi' ri tinamit akuchi xkek'aq chi abej y xkeken chi e ka'i'; ri xten roma man xuraqaqej ta ruchi' richin ta xto'ox, y ri achin roma xuqasaj ruq'ij ri xten ri xok ta rixjayil ri rachpochel; keri' xtik'is-el re etzelal re' chi'ikojol rix.
25Jak'a wi jun achin nril pa juyu' jun xten ri k'utun chik y nuben chire richin nik'oje' rik'in, xaxe k'a ri achin ri nikamisex. 26Jak'a ri xten man jun niban chire, roma rija' kan maneq rumak richin nikamisex, roma re' achi'el jun wineq ri niyakatej chirij jun rach'alal y nukamisaj, 27roma ri achin ri' xril ri xten pa juyu'. Stape' xuraqaqej ta ruchi' ri xten, man ta jun xkolon richin pa ruq'a' ri achin.
28Toq jun achin nril jun xten ri man k'utun ta roma jun ala' y nik'oje' rik'in y ye'ilitej; 29ri achin ri xk'oje' rik'in ri xten, xtuya' más juba' jun libra saqipueq chire ri rutata' ri xten. Y ri xten ri' xtok rixjayil ri achin ri' roma xuqasaj ruq'ij; y kan man xtujech ta k'a ri' rik'in chijun ruk'aslen.
30Jun achin man ruk'amon ta nik'oje' rik'in ri rixjayil ri rutata', roma wi k'o jun nibanon keri', nuqasaj ruq'ij ri rutata'.
Currently Selected:
Deut 22: KQC
Highlight
Copy
Compare
Share
Want to have your highlights saved across all your devices? Sign up or sign in
Kaqchikel Bible © Bible Society in Guatemala, 2003.
