Deut 11
11
Ri runimirinen ri Jehová
1Kan tiwajo' k'a ri Jehová ri qa-Dios ronojel q'ij chire ri ik'aslen, y kan titaqej k'a ronojel re pixa' re'. 2Kan tiq'ax k'a chiwech wakami, ronojel ri xiwetamaj chirij ri xuben ri Jehová qik'in richin chi xojrutijoj chuwi tijoj-poqonal, roma kan ja rix xixtz'eton y man ja ta ri iwalk'ual. Rix kan xitz'et k'a ri runimirinen y ri nimalej ruchuq'a'. 3Xitz'et k'a ri nima'q taq banobel ri xuben ri Jehová pan Egipto pa ruwi' ri rey y pa kiwi' konojel ri ruwinaq. 4Xitz'et k'a ri xuben kik'in ri aj-labal richin ri Egipto, kik'in ri kikiej y ri ki-carruaje, y toq xek'is kan chuxe' ri Kaqa-Palou toq xojkitzeqelibej-pe. Ri Jehová kan xeruk'is k'a kan jumul. 5Toqaqa k'a chi'ik'u'x ronojel ri xuben qik'in roj chupan ri tz'iran ruwach'ulew k'a toq xojoqaqa re wawe'. 6Xitz'et ri xuben ri Jehová chiqakojol kik'in ri Datán y ri Abiram, ri e ruk'ajol ri Eliab, rijatzul kan ri Rubén, toq xjaqatej ri ruwach'ulew y xerubeq' chi achijlonel, ixjayilonel y alk'ualaxel, keri' chuqa' ri kachoch ri banon rik'in tzieq y ronojel ri kawej. 7Kan ja rix k'a ri xixtz'eton ronojel ri nima'q taq banobel ri xerubanala' ri Jehová.
Urtisanik pa ruwi' ri ruwach'ulew ri rusujun ri Jehová
8Roma ri' kan tiyaka' k'a ronojel ri pixa' ri xinbij chiwe re q'ij re', richin kan xtik'oje' iwuchuq'a' y kan xtiwichinaj ri ulew ri xtibeya'ox chiwe. 9Richin keri' kan xtiyaloj ri ik'aslen chuwech ri jebelej ruwach'ulew ri rusujun ri Jehová chike ri qati't-qamama' y chiwe rix ri ix kijatzul. 10Ri ruwach'ulew ri xtiwichinaj man achi'el ta ri ruwach'ulew Egipto, akuchi xojel-wi-pe. Chiri' kan xeqatik na y xeqaya'aj na ronojel tiko'n achi'el niban chike ri tiko'n ri ek'o pa taq qejoj. 11Jak'a ri xtiwichinaj rix, kan jun ruwach'ulew ri kan k'o juyu' y taq'aj, ruwach'ulew ri kan niya'ex roma ri job. 12Ri ruwach'ulew ri' kan ja ri Jehová ri qa-Dios nichajin, y ri rutzubal kan ruya'on pa ruwi' richin q'asen.
13Wi rix kan xtitaqej ri pixa' ri xinya' chiwe re q'ij re', y kan niwajo' ri Jehová ri qa-Dios, y kan nisamajij rik'in ronojel iwánima y chijun ri ik'aslen, 14rija' kan xtuya-pe ri job pa ruq'ijul pa ruwi' ri ruwach'ulew. Keri' chuqa' xtuya-pe ri saq'ij richin keri' xtik'ol ri jalajoj ruwech ixin, ri vino y ri aceite richin olivo. 15Y chuqa' xtuben chi nik'ase-pe q'os pa juyu' richin nikitej ri iwawej, y chuqa' kan xtik'ase' ri iway rix y xtitej k'a janipe' ri niwajo'. 16Kan tichajij k'a iwi'; man kixq'olotej; man tijech'ej kan iwi' rik'in rija' richin niya' kiq'ij ch'aqa' chik dios y yixxuke' chikiwech. 17Wi keri' xtiben, ri Jehová kan xtiyakatej royowal pan iwi' rix, y man xtuteq ta pe ri job; y ri ulew man xtiwachin ta chik, y kan chi'anin xkixken roma wayjal.
18Roma ri' kan tiyaka' k'a re ch'abel re' pa taq iwánima y tich'obo'. Tixima' k'a chirij iq'a' y ri nik'aj iwech richin jun retal. 19Ke'itijoj k'a ri iwalk'ual chire re ch'abel re' toq ixk'o pa taq iwachoch, toq ix beneq pa taq bey, toq yixkotz'e-qa y toq yixyakatej-el. 20Y kan titz'ibaj k'a chuwech ri ruchi' taq iwachoch, 21richin chi rix y chuqa' ri iwalk'ual xtiyaloj ri ik'aslen chupan ri ruwach'ulew ri rusujun kan ri Jehová chike ri qati't-qamama'. Keri' ri ik'aslen kan xtiyaloj achi'el ri ch'umila' ri ek'o chuwech ri kaj.
22Wi rix kan xtitaqej pa ruchojmilal ri pixa' ri xinbij chiwe y kan niben ri nubij y kan niwajo' ri Jehová ri qa-Dios, y kan nitzeqelibej ri bey richin rija', 23ri Jehová kan xkerujech pan iq'a' ri etzelanel iwichin. Xkerelesaj k'a el ri winaqi' ri' stape' kan e k'iy y kan más kuchuq'a' chiwech rix. Chupan k'a ri kiruwach'ulew rije' xkixk'oje-wi kan rix. 24Ronojel ri ruwach'ulew ri akuchi xkixq'ax-wi jari' xtok iwichin, nitiker-pe pa xokon chire ri tz'iran ruwach'ulew y napon k'a pa Líbano, y nitiker-pe pa relebel-q'ij chire ri raqen-ya' Éufrates y napon k'a chuchi' ri palou. 25Man jun k'a ri xtupaba' ta ri' chiwech, roma ri Jehová ri qa-Dios xtuben chike chi xtikik'en ikiy, y xtipe jun nimalej xibinri'il pa kiwi' ri winaqi' ri ek'o pa nima'q taq ruwach'ulew ri akuchi xkixq'ax-wi, achi'el ri rubin rija' chiwe.
26Chupan k'a re q'ij re' ninya' chiwech richin nicha' chukojol ri urtisanik y ri etzelanik. 27K'o urtisanik wi rix kan ninimaj ri pixa' ri ruya'on ri Jehová ri qa-Dios ri xinbij chiwe wakami. 28Ri etzelanik xtik'ul k'a wi rix man xtinimaj ta ri pixa' ri xinbij chiwe wakami, y wi xtich'er kan iwi' richin ye'itzeqelibej kan jujun chik dios ri xa man iwetaman ta kiwech.
29Toq ri Jehová ri qa-Dios ix rukusan chik apo chupan ri ruwach'ulew ri xtiwichinaj kan, kan xtiqaq'alajirisaj k'a re urtisanik re' pa ruwi' ri juyu' Guerizim, y re etzelanik re' xtiq'alajirisaj pa ruwi' ri juyu' Ebal. 30Ri juyu' ri', ek'o la juk'an-apo chire ri raqen-ya' Jordán chupan ri kiruwach'ulew ri aj-Canaán. Ek'o pa qajbel-q'ij chire ri taq'aj chuwech-pe ri tinamit Guilgal chunaqaj ri paten-che' richin ri Moré. 31Rix kan jare' k'a xkixq'ax la juk'an-apo ruchi' raqen-ya' y xtok iwichin ri ruwach'ulew ri xtuya' ri Jehová ri qa-Dios chiwe. Toq rix xe'ich'ek yan y ixk'o chik chupan, 32kan titz'eta' k'a richin niben ronojel ri nubij ri pixa' ri ya'on chiwe.
Currently Selected:
Deut 11: KQC
Highlight
Copy
Compare
Share
Want to have your highlights saved across all your devices? Sign up or sign in
Kaqchikel Bible © Bible Society in Guatemala, 2003.
