Deut 10
10
1Chupan ri q'ij ri', ri Jehová xubij chuwe: Tachoyo' ka'i' tz'alem taq abej junan rik'in ri xinjech chawe pa nabey. Chuqa' tabana' kan jun káxa rik'in tz'alem. K'ari' kajote-pe wik'in wawe' pa ruwi' re juyu', 2y xtintz'ibaj-el chuwech ri tz'alem taq abej ri' ri ch'abel ri xentz'ibaj chuwech ri xe'apaxij; y re' xke'ayek chupan ri káxa, xcha' chuwe.
3Yin kan xinteq rubanik ri káxa ri' y ja ri che' acacia ri xukusex chire. Chuqa' xinteq rubanik ri ka'i' tz'alem taq abej achi'el rubanik ri ka'i' nabey. Xink'uaj-el y xibe k'a el pa ruwi' ri juyu'. 4Ri Jehová kan xutz'ibaj chik chuwech, achi'el ri xutz'ibaj-pe pa nabey ri lajuj rupixa', y xuya' chik pe chuwe. Re' kan junan k'a rik'in ri ch'abel ri xubij chiqe toq xch'on pa ruwi' ri juyu' pa jun ruxaq-q'aq' chupan ri q'ij richin molojri'il. 5K'ari' xiqaqa-pe pa ruwi' ri juyu'; y xenya' ri tz'alem taq abej ri' chupan ri káxa, achi'el xubij ri Jehová chuwe, y chiri' ek'o-wi k'a re wakami, xcha' ri Moisés.
6Ri israelita xe'el-el pa Beerot-bené-jaacán y xe'apon pa Moserá; chiri' xken-wi kan ri Aarón y chiri' chuqa' xmuq wi kan. Y ja ri Eleazar ri ruk'ajol xk'oje' kan pa ruk'exel richin xok kan nimalej sacerdote. 7Chirij ri' xe'el-el chiri' y xe'apon pa Gudgoda, y xe'el chik el chiri' y xe'apon pa Jotbata, ri akuchi janila kokoj taq raqen-ya' ek'o. 8Chupan ri q'ij ri' ri Jehová xucha' ri tzobaj richin kan ri Leví richin chi ja rije' ri ye'uk'uan ri káxa richin ri rujikibel-tzij, y richin nikisuj kamelabel y nikik'utuj urtisanik pa qawi', achi'el nikiben k'a re q'ij re'. 9Roma ri' ri e levita maneq ulew richin tiko'n xkichinaj chikikojol ri kach'alal, roma ri xkichinaj rije' ja ri xek'oje' kan pa rusamaj ri Jehová, achi'el rubin rija' chike.
10Y ri Moisés xubij chike ri ruwinaq: Chupan ri q'ij ri' yin xik'oje' pa ruwi' ri juyu', kawineq q'ij y kawineq aq'a' achi'el xinben ri nabey mul. Y ri Jehová kan xirak'axaj k'a jun bey chik y roma ri' man xeruk'is ta. 11Ri Jehová kere' k'a xubij chuwe: Kabiyin y katik'o chikiwech ri awinaq, y kixbiyin chupan ri ruwach'ulew ri xinjikiba' chike ri iwati't-imama' richin nok iwichin, xcha' chuwe.
Ri nuk'utuj ri Jehová chire ri wineq
12Wakami k'a nuwinaq, ri Jehová ri qa-Dios jare' ri nuk'utuj chiqe: Kan tiqaya' rejqalen, kan tiqatzeqelibej ri bey ri niqa' chuwech rija'. Kan tiqajo' y kan tiqaya' ruq'ij-ruk'ojlen rik'in ronojel qánima y chijun ri qak'aslen. 13Chuqa' tiqataqej ronojel ri pixa', richin keri' kan utz xqojbe chupan ri qak'aslen. 14Ri Jehová ri qa-Dios kan richin k'a rija' ri kaj ri tz'etel y ri man tz'etel ta, y chuqa' chijun ruwach'ulew, y ronojel ri ek'o chuwech. 15Y man rik'in ri', kan xuya' k'a ri rajowabal pa kiwi' ri qati't-qamama', roma ri' xojrucha' roj ri oj kijatzul kan rije' chikikojol konojel ri winaqi', achi'el rubanon wakami.
16Kan tiyaka' k'a ronojel ri rujikibel-tzij ri Dios pa taq iwánima y man chaq tikowirisaj-iwi'. 17Roma ri Jehová ri qa-Dios kan ja rija' ri Dios pa kiwi' konojel ri dios ri ek'o, y kan ja rija' ri Ajaw pa kiwi' konojel ajaw ri ek'o. Rija' kan Dios nim rejqalen ri k'o ronojel uchuq'a' pa ruq'a' y kan ruk'amon yojbaybot chuwech. Rija' man nuben ta rukojol kik'in ri winaqi', ni man yojtikir ta niqapuaqij. 18Rija' kan yeruto' k'a ri meba'i' y ri malkani', y chuqa' kan yerajo' ri man e aj pa qatinamit ta, y roma ri' kan nuya' kiway y kitziaq. 19Kan keri' chuqa' tiqabana' roj, keqajo' k'a ri man e qawinaq ta, roma roj xa kan xojk'oje' chuqa' pan Egipto.
20Kan chuwech k'a ri Jehová ri qa-Dios tiqaxibij-qi' y kan xaxe rija' tiqaya' ruq'ij y tiqasamajij. Y pa rubi' k'a rija' xtiqaya' ri qatzij. 21Kan tiqanimirisaj k'a ri rubi' ri Jehová, roma kan xuben k'a nima'q taq banobel ri kan nak'en rukiy qoma roj, y re' kan xqatz'et. 22Toq ri qati't-qamama' xe'apon pan Egipto xaxe e oxk'al lajuj wineq, jak'a re wakami ri Jehová ri qa-Dios xuben chiqe chi janila xojwinaqir achi'el ri kajlabal ri ch'umila' ri ek'o chila' chikaj.
Currently Selected:
Deut 10: KQC
Highlight
Copy
Compare
Share
Want to have your highlights saved across all your devices? Sign up or sign in
Kaqchikel Bible © Bible Society in Guatemala, 2003.
