Deut 9
9
Ri Dios xkeruk'is-el ri winaqi' aj-Canaán
1Tiwak'axaj rix nuwinaq israelita: Wakami nibeq'axaj ri raqen-ya' Jordán richin niwichinaj ri nima'q taq ruwach'ulew, ri e k'iy winaqi' ri ek'o chupan y más kuchuq'a' chiwech rix, kan nima'q taq ruwach'ulew y e sutin-kij chi tz'aq ri janila nej e jotol. 2Ri winaqi' ri ek'o chiri' kan nima'q kipalen y e rijatzul kan ri achin rubini'an Anac, rix kan iwak'axan k'a chi kere' nibix: Kan man jun nitikir kik'in ri e rijatzul kan ri Anac, yecha'.
3Roma ri' tiwetamaj chi ri Jehová ri qa-Dios ja rija' ri ik'owineq chiwech rix, achi'el jun q'aq' ri nuk'is ronojel. Rija' xkeruk'is y xtuqasaj kiq'ij; y rix kan xke'iwelesaj-el y kan xke'ik'is chi'anin, achi'el xubij ri Jehová. 4Toq ri Jehová ri qa-Dios xkerelesaj-el chiwech rix re tinamit re', man tibij-qa: Matiox chi roma utz ri qak'aslen roma ri' xojruk'en-pe chupan re jun ruwach'ulew re' richin nok qichin, man kixcha'. Xa roma k'a ri kimak ri tinamit ri' kan xkerelesaj-el chiwech rix. 5Man roma ta k'a yalan utz ri ik'aslen, ni man roma ta utz ri ibanobal, roma ta ri' xkixok-apo y niwichinaj kan ri kiruwach'ulew rije'. Xa kan roma k'a ri itzel taq kibanobal re tzobaj winaqi' re' richin ri ruwach'ulew ri' ri Jehová ri qa-Dios xkerelesaj-el chiri', richin chi nujikiba' ri rubin-pe chike ri qati't-qamama' ri Abraham, ri Isaac y ri Jacob. 6Roma ri' kan tiwetamaj chi man roma ta yalan utz ri ik'aslen, man roma ta ri' ri Jehová ri qa-Dios xtuya' ri utzilej ruwach'ulew chiwe richin niwichinaj; roma rix xa kan ikowirisan-iwi'.
Ri israelita xeyakatej chirij ri Jehová
(Ex 31:18-32:35)
7Roma ri' toqaqa k'a chi'ik'u'x y man timestaj chi xiyek royowal ri Jehová ri qa-Dios, ichapon-pe kan ja toq xojel-pe pan Egipto, y chijun ri tz'iran ruwach'ulew y wakami re ojk'o wawe', kan man iniman ta k'a rutzij ri Jehová. 8Chiri' pan Horeb kan xiyek janila royowal ri Jehová, y xoyower k'a iwik'in y xrajo' chi xixruk'is ta chiri'. 9Toq yin xijote-el pa ruwi' ri juyu' ri' richin xebenk'ulu' kan ri ka'i' tz'alem taq abej richin ri rujikibel-tzij ri Jehová ri xuben qik'in, xik'oje' k'a chiri' kawineq q'ij y kawineq aq'a' man xiwa' ta y man xinuk'ya' ta. 10Ri Jehová xuya' k'a chuwe ri ka'i' tz'alem taq abej ri kan ja rija' xtz'iban y chiri' e tz'ibatajineq-pe ronojel ri ruch'abel, achi'el ri xubij chiwe pa ruwi' ri juyu' pa runik'ajal ri q'aq', ri q'ij toq qonojel xqamol-qi'. 11Toq xq'ax yan kawineq q'ij y kawineq aq'a', ri Jehová xuya-pe chuwe ri ka'i' tz'alem taq abej ri' ri akuchi tz'ibatel-wi pe ri rujikibel-tzij. 12Y ri Jehová xubij chuwe: Kabiyin y kaqaqa-el chi'anin, roma ri tinamit ri xe'awelesaj-pe pan Egipto kan chi'anin xkich'er kan ki' wik'in; xa kan man xkitaqej ta ri xinbij chike; xa xkiben jun wachibel ri banon rik'in q'anapueq ri ya'erisan pa q'aq'.
13Y chuqa' xubij chuwe: Yin kan e nutz'eton chi re tinamit re' kan jun tinamit ri yalan kikowirisan-ki'. 14Taya' q'ij chuwe richin yenk'is y kan xtiyojtej jumul ri kibi' chuwech ri ruwach'ulew, y xaxe k'a rik'in ri awijatzul rat xtinben jun nimalej ruwach'ulew y kan janila k'a xkek'iyer y xtik'oje' janila kuchuq'a' chikiwech rije', xcha' ri Jehová chuwe.
15Toq yin xiqaqa-pe pa ruwi' ri juyu' ri nibiron pa q'aq', nuk'amon-pe pa nuq'a' ri ka'i' tz'alem taq abej richin ri rujikibel-tzij. 16Yin xentz'et k'a pe ri qate-qatata', chi xa xemakun chuwech ri Jehová ri qa-Dios y xkiben ri ruwachibel jun nima-alaj achij wákix rik'in q'anapueq ya'erisan pa q'aq', y rik'in k'a ri' xkijech'ej kan ki' chire ri rubin ri Jehová chike. 17Roma ri' xink'eq pan ulew ri ka'i' tz'alem taq abej ri e nuk'amon-pe pa nuq'a' y kan chikiwech k'a rije' xinpaxij-wi. 18K'ari' yin xixuke' chik k'a chuwech ri Jehová kawineq q'ij y kawineq aq'a' y man xiwa-xinuk'ya' ta, roma ri mak ri xkiben chuwech rija', xkiya' q'axo'n pa ránima y xkiyek janila royowal. 19Yin kan janila k'a xinxibij-wi' chuwech ri royowal ri Dios pa kiwi' rije', roma kan xrajo' chi xeruk'is ta rik'in ri royowal. Jak'a rija' kan xerak'axaj chik. 20Chuqa' ri Jehová yakatajineq royowal chirij ri Aarón, y xrajo' xuk'is jumul, jak'a yin kan xich'on chuqa' pa ruwi' rija'. 21Xeri' xinchop ri ruwachibel ri nima-alaj achij wákix ri xkiben, ri achoq ik'in xemakun-wi, xinwulaj y xinporoj. K'ari' xinben poqolaj chire, y xinjopij pa ruwi' ri ch'uti'n raqen-ya' ri xulan-pe kojol juyu'.
22Y chuqa' ri qate-qatata' xkiyek royowal ri Jehová pa Taberá, pa Masá y pa Quibrot-hataavá. 23Y toq ojk'o pa Cadés-barnea, ri Jehová kere' xubij chike: Kixjote-el richin niwichinaj ri ruwach'ulew ri nuya'on chik chiwe, xcha'. Jak'a rije' man xeniman ta chire ri ruch'abel. Man xkikuquba' ta kik'u'x rik'in y kan man xkinimaj ta rutzij. 24Kan ja ri q'ij toq yin xinwetamaj kiwech; xentz'et chi kan yalan kikowirisan-ki' chuwech ri Jehová. 25Roma ri' rija' xubij chi yeruk'is jumul, y jari' toq yin xixuke' kawineq q'ij y kawineq aq'a' chuwech ri Jehová koma rije'. 26Y xink'utuj k'a utzil chire ri Jehová y xinbij: ¡Ajaw Jehová!, nink'utuj utzil chawe chi man tak'is re tinamit re', roma re' kan awichin rat, rat xakolon-pe richin rik'in ri animirinen, rat xatelesan-pe richin chiri' pan Egipto rik'in ri nimalej awuchuq'a'. 27Ke'oqaqa k'a chi'ak'u'x ri e asamajela', ri Abraham, ri Isaac y ri Jacob. Takuyu' ri yakatajinenri'il richin re tinamit re', keri' chuqa' ri itzel taq banobel y ri mak ri yekibanala' chawech. 28Wi man keri' ta, ri aj-Egipto xtikibij chi rat man yatikir ta naya' chiqe ri ruwach'ulew ri asujun chiqe, o xa roma kan yojawetzelaj, roma ri' xojawelesaj-pe chiri' xaxe richin yojak'is kan re wawe' pa tz'iran ruwach'ulew. 29Roma ri' tabana' utzil takuyu' rumak re tinamit re', roma re' kan awichin rat, rat xatelesan-pe qichin pan Egipto rik'in ri nimalej awuchuq'a', xicha'.
Ruk'exel ri tz'alem taq abej ri xepax
(Ex 34:1-10)
Currently Selected:
Deut 9: KQC
Highlight
Copy
Compare
Share
Want to have your highlights saved across all your devices? Sign up or sign in
Kaqchikel Bible © Bible Society in Guatemala, 2003.
