1 Crón 22
22
Ri David nunaba-ri' richin niban ri rachoch ri Dios
1Y roma ri' ri David xubij: Wawe' k'a xtibek'oje-wi ri rachoch ri Jehová Dios, y wawe' xkeporox-wi chikopi' pa ruwi' ri porobel richin ri qatinamit Israel, xcha'.
2Chirij k'a ronojel re', ri David xerumol k'a konojel ri winaqi' ri man e aj-Israel ta ri ek'o chikikojol rije', y xerucha' k'a ri e choyoy abej richin nipabex-q'anej ri rachoch ri Dios. 3Y xumol k'a k'iy q'eqapueq richin yetun ri che', y richin ri q'eqapueq ri nichapo ri ruchi-jay. Y chuqa' xumol janila k'iy q'enq'oj-pueq, ri man xtikir ta xretaj roma janila k'iy k'o. 4Y chuqa' xuyek k'iy tiox-che', roma ri winaqi' aj-Sidón y ri aj-Tiro kan pa ruk'iyal xkik'en-pe chire ri David.
5Ri David xuben ronojel re' roma xuch'ob chi ri Salomón ri ruk'ajol man jani k'o retamabal richin nupaba-q'anej ri rachoch ri Jehová akuchi niya'ox-wi ruq'ij-ruk'ojlen, roma ri jay ri' k'o chi niban janila nim chire y kan xtel k'a rutzijol chuwech chijun ruwach'ulew chi kan jebel ok rubanik. Y roma ri' ri David xeruchojmirisala' k'a kan pa ruk'iyal ronojel ri nik'atzin chire ri rachoch ri Dios.
6Y toq ri David janila chik ri'j, jari' toq xroyoj ri Salomón ri ruk'ajol richin xuchilabej kan chire chi xtupaba-q'anej ri rachoch ri Jehová Dios richin ri tinamit Israel, 7y xubij chire: Nuk'ajol yin, janila xurayij ri wánima richin xinpaba' ta q'anej ri rachoch ri Jehová ri qa-Dios; 8jak'a rija' man xrajo' ta, y xubij chuwe chi yin janila kamik y janila labal xenben; roma ri' man ja ta yin ri xkipaban-q'anej ri rachoch rija'. 9Chuqa' xubij chuwe chi xtik'oje' jun nuk'ajol, y kan xtok jun achin richin uxlanibel-k'u'x, roma ri Dios xtuya' uxlanibel-k'u'x rik'in, y ri e etzelanel richin man jun xtikiben chire. Y roma ri' xubij chi xtubini'aj Salomón.*f8* Y chi chupan ri ruq'atbal-tzij kan xtik'oje' k'a uxlanibel-k'u'x y uxlanenri'il wawe' pan Israel. 10Y ri Dios chuqa' xubij chi ja rija' ri xtipaban-q'anej jun jay pa rubi' ri Dios. Rija' kan xtok ruk'ajol ri Dios y ri Dios xtok rutata'; y kan xtujikiba' ri ruq'atbal-tzij richin q'asen pa ruwi' re ruwach'ulew Israel. Keri' xubij ri Jehová chuwe.
11Wakami k'a, nuk'ajol yin; kan ja ri Jehová ri xtik'oje' awik'in richin xtapaba-q'anej ri rachoch, achi'el ri rubin chi ja rat xkabanon. 12Kan ja ta ri Jehová xtiya'on ana'oj y awetamabal toq xtaq'et kan tzij pa ruwi' ri Israel, richin kan tataqej k'a ri pixa' ri ruya'on ri Jehová ri qa-Dios. 13Kan xkabe k'a pa jotol wi rat xtaben ronojel ri achike nubij ri pixa' ri ya'on kan chire re tinamit ri xuya' ri Jehová chire ri Moisés. Kan tatija' k'a aq'ij: Kan kof k'a kak'oje': Man k'a kamayamo-qa: Y man taxibij-awi'. 14Yin rik'in janila wuchuq'a' xinben kan ri ruchojmil ronojel ri k'atzinel ri nikusex richin nipabex-q'anej ri rachoch ri Dios. Xinya' kan 66,000 quintal q'anapueq, 660,000 quintal saqipueq, k'iy q'enq'oj-pueq y k'iy q'eqapueq ri man yatikir ta chik nawetaj. Chuqa' xinchojmirisaj kan che' y abej. Y wi k'a k'o na ri nrajo', utz naya' chik apo juba'. 15Man xaxe ta ri'; ek'o janila samajela' ri e choyoy abej, aj-tz'aq, ajanela', y ri etamanela' richin nikiben jalajoj ruwech samaj 16rik'in q'anapueq, ri saqipueq, rik'in q'enq'oj-pueq y ri q'eqapueq. Ek'o e k'iy samajela' ri man yatikir ta nawajlaj. Kan kasamej k'a pa rachoch ri qa-Dios y ja rija' xkato'on, xcha' ri David.
17Chuqa' ri David xubij chike konojel ri achi'a' ri k'o más kiq'ij ri e richin ri tinamit Israel chi nibekito' ri Salomón ri ruk'ajol. 18Y ri David xubij chike: Ri Jehová ri qa-Dios kan k'o-wi qik'in, y ruya'on uxlanibel-k'u'x xabakuchi, roma rija' kan xerujech yan pa nuq'a' konojel ri winaqi' richin chijun ruwach'ulew. Y re ruwach'ulew re' kan xk'oje' kan chuxe' rutzij ri Jehová y ri rutinamit. 19Roma ri' kan rik'in k'a ronojel iwánima y rik'in kikoten, tikanoj ri Jehová ri qa-Dios. Xtipaba' k'a q'anej ri rachoch ri Dios richin xtibeq'axex-pe ri káxa richin ri rujikibel-tzij chiri', y chuqa' ronojel ruwech samajibel ri e ch'aron richin ri jay ri', xcha'.
Currently Selected:
1 Crón 22: KQC
Highlight
Copy
Compare
Share
Want to have your highlights saved across all your devices? Sign up or sign in
Kaqchikel Bible © Bible Society in Guatemala, 2003.
