1 Crón 23
23
Ri e levita y ri kisamaj
1Toq ri David janila chik ri'j, xuq'alajirisaj k'a chikiwech ri winaqi' chi ja ri Salomón ri ruk'ajol xtik'oje' kan pa ruk'exel. 2Y xerumol k'a konojel ri aj-raqen richin ri tinamit, y ri e sacerdote y ri e levita. 3Xe'ajlex k'a ri e levita ri k'o juwineq lajuj kijuna' pa jotol. Xk'achoj ri kajlaxik, y ek'o k'a 38,000 achi'a'. 4Chike konojel re' e 24,000 richin yepa'e' pa ruwi' ri samaj chupan ri rachoch ri Dios, e 6,000 richin ye'ok aj-raqen y to'onela' pa ruwi' ri ruwach'ulew, 5e 4,000 chajinela' richin nikichajij ri ruchi' ri rachoch ri Dios, y e 4,000 chik ri yeya'on ruq'ij ri Dios rik'in jalajoj ruwech q'ojom, ri xuteq kibanik ri David. 6Y ri David xeruch'er k'a ri levita ri' pa taq tzobaj achi'el ri kajlabal ri e ruk'ajol kan ri Leví. Y rije' ja ri Guersón, ri Quehat, y ri Merarí. 7Ri e ruk'ajol kan ri Guersón ja ri Ladán y ri Simí. 8Ja kibi' re' ri e oxi' ruk'ajol ri Ladán: Ri Jehiel jari' ri nimalaxel; ri Zetam y ri Joel. 9Ri e ruk'ajol ri Simí chuqa' e oxi': Ri Selomit, ri Haziel y ri Harán. Konojel re' kan e aj-raqen kichin ri e aj pa rachoch kan ri Ladán. 10Chuqa' k'o jun chik achin rubini'an Simí, y xek'oje' kaji' ruk'ajol: Ri Jáhat, ri Ziza, ri Jeús, y ri Beriá. 11Ri Jahat ja rija' ri nimalaxel; ri ruka'n ja ri Ziza. Ri Jeús y ri Beriá man xk'oje' ta k'iy kalk'ual, y roma ri' xa jun jay winaqi' xban chike richin yesamej.
12Ri e kaji' ruk'ajol ri Quehat, ja ri Amram, ri Ishar, ri Hebrón y ri Uziel. 13Ri e ka'i' ruk'ajol ri Amram ja ri Aarón y ri Moisés. Ri Aarón xcha'ox richin nusuj ri sipanik ri yejach chire ri Dios, y richin nuporoj pom chuwech ri Jehová. Kan nusamajij, y kan pa rubi' ri Dios nuya' urtisanik. Ronojel re' ja re' ri samaj ri k'o chi nikiben ri Aarón y ri e rijatzul richin q'asen. 14Jak'a ri Moisés, ri rusamajel ri Dios, y ri e rijatzul xa jun xkiben rik'in ri tzobaj richin ri Leví. 15Ri e ka'i' ruk'ajol ri Moisés ja ri Guersón y ri Eliézer. 16Ri nabey ruk'ajol ri Guersón ja ri Sebuel. 17Ri juney ruk'ajol ri Eliézer ja ri Rehabías ri aj-raqen. Jak'a ri Rehabías xek'oje' janila ralk'ual. 18Ri nabey ruk'ajol ri Ishar ja ri Selomit. 19Ri Hebrón xek'oje' e kaji' ruk'ajol. Ri nabey ja ri Jeraías, ri ruka'n ja ri Amarías, ri rox ja ri Jahaziel; y ri rukaj ja ri Jecamán. 20Ri Uziel xek'oje' e ka'i' ruk'ajol. Ri nabey ja ri Micaías y ri ruka'n ja ri Isías.
21Ri e ka'i' ruk'ajol ri Merarí ja ri Mahli y ri Musí. Ri e ka'i' ruk'ajol ri Mahli ja ri Eleazar y ri Cis. 22Ri Eleazar xken y man jun ruk'ajol xk'oje'. Xaxe xek'oje' rumi'al, y xek'ule' kik'in ri kach'alal, ri e ruk'ajol ri kich'utitata' rubini'an Cis. 23Ri Musí xek'oje' e oxi' ruk'ajol: ri Mahli, ri Éder y ri Jeremot.
24Jare' ri e rijatzul kan ri Leví ri e aj-raqen pa kiwi' ri e aj pa kachoch y ri tz'ibatel kan ri kibi' toq xe'ajlex. Konojel re achi'a' re' k'o juwineq kijuna' pa jotol y yesamej pa rachoch ri Dios.
25Ri David rubin k'a: Ri Jehová ri qa-Dios roj ri oj aj-Israel xuya' yan uxlanibel-k'u'x chiqe, y rija' kan xtik'oje' chiri' pa Jerusalem richin q'asen. 26Y xa roma ri' ri e levita man chaq xtikik'uaj ta kela' ri rachoch ri Dios ri banon rik'in tzieq, y ni ta ri samajibel ri yekusex toq niya'ox ruq'ij Rija'. 27Keri' k'a ri runojibal ri David chi xtz'ibex ri kibi' y ri kajlabal chikikojol ri e rijatzul kan ri Leví ri k'o juwineq kijuna' pa jotol.
28Xek'oje' k'a kan ri e rijatzul ri Aarón chuxe' kitzij ri e sacerdote, richin yesamej pa rachoch ri Dios. Ja rije' ri yejosq'in ri ruwa-jay y ri pa jay, y nikich'ajch'ojirisaj ri samajibel ri yekusex toq niya'ox ruq'ij ri Dios, y keri' chuqa' ri ch'aqa' chik samaj ri niban chiri'. 29Y chuqa' ja rije' ri yechojmirisan ri kaxlan-wey chuwech ri mesa. Keri' chuqa' ri ye'etan ri k'ej chayun richin ri sipanik, y richin ri kaxlan-wey ri maneq ch'amilej-q'or rik'in. Chuqa' rije' xeya'ox richin xkichaq'arisaj ri kaxlan-wey pa sartén, y chuqa' nikiwotz'otz'ij. 30Y ek'o levita ri ye'ok chupan ri rachoch ri Dios ronojel q'ij ri nimaq'a' yan y ri tiqaq'ij richin nikimatioxij chire ri Jehová y nikiya' ruq'ij, 31y chuqa' toq niporox ri chikop chuwech ri Dios chupan ri q'ij richin uxlanenri'il, richin ri nimaq'ij toq nalex ri k'ak'a' ik' y ri ch'aqa' chik nimaq'ij. Ri e levita kan k'o chi nikisamajij ri Dios rik'in ch'ajch'ojil achi'el ri bin chike. 32Y keri' ri e levita kan xkiben k'a ri xbix chike richin ri rachoch ri Dios richin molojri'il y chuqa' richin ri jay ri akuchi k'o-wi ri Dios. Re levita re' xek'oje' chuxe' kitzij ri e rijatzul kan ri Aarón.
Currently Selected:
1 Crón 23: KQC
Highlight
Copy
Compare
Share
Want to have your highlights saved across all your devices? Sign up or sign in
Kaqchikel Bible © Bible Society in Guatemala, 2003.
