1 Crón 21
21
1K'o k'a jun q'ij ri Satanás xyakatej k'a chikij ri winaqi' israelita y roma ri' xubij chire ri David chi tutaqa' kajlaxik ri aj-labal. 2Roma ri' ri David xuya' rutzijol chire ri Joab y chike ri e tata'al richin ri tinamit, y kere' xubij: Kixbiyin y kebe'iwajlaj ri aj-labal aj-Israel, nitiker-el pa xokon rik'in ri tinamit Beerseba y yixapon k'a pa xaman rik'in ri tinamit Dan; y no'iya' rutzijol chuwe ri janipe' ek'o, xcha'.
3Jak'a ri Joab xubij chire: Ja ta k'a ri Jehová xtibanon chiqe richin xqojk'iyer ta más. Qonojel roj oj asamajela'. Roma ri', ¿achike k'a roma keri' nawajo' chi niban? ¿Achike roma naben chiqe richin yojmakun?
4Jak'a ri rubin ri rey, jari' ri k'o chi xunimaj ri Joab, y keri' k'a xbanatej. Xebe k'a ri Joab y ri ch'aqa' chik tata'al chi kajlaxik ri aj-labal chupan chijun ri ruwach'ulew Israel; y k'ari' xetzolin pa Jerusalem. 5Ri Joab xujech k'a ri kajlabal ri achi'a' chire ri David; y ri kajlabal, e 1,100,000 achi'a' ri yetikir yebanon labal rik'in espada ri chiri' pa xaman chire ri ruwach'ulew Israel, y ek'o chuqa' 470,000 ri chiri' pa xokon chire ri ruwach'ulew Judá. 6Jak'a man xe'ajlex ta ri e rijatzul kan ri Leví, y ni ta ri rijatzul kan ri Benjamín, roma ri Joab kan man xqa' ta chuwech ri achike xubij ri rey chire.
7Jak'a ri Dios chuqa' kan itzel xutz'et ronojel re', y xuteq-pe jun ruk'ayewal pa kiwi' ri winaqi' israelita. 8K'ari' ri David xuq'alajirisaj chire ri Dios chi rija' man utz ta xuben chuwech, y roma ri' ri David xuk'utuj kuyubel rumak chuwech, y xubij k'a: Kan jun nimalej mak ri xinben. Y nink'utuj chawe richin takuyu' ri itzel banobel ri xinben chawech yin ri in asamajel, roma xinben chi achi'el xa ta in jun nakanik chawech rat, xcha'.
9K'ari' ri Jehová xuteq rik'in ri David, ri q'alajirisey ruch'abel rubini'an Gad. 10Y xubij chire chi tubij chire ri David chi ri Jehová nusuj oxi' ruk'ayewal ri nuya-pe pa ruwi'. Y ri David tucha' k'a ri más utz nuben chuwech. 11Ri Gad xbe k'a rik'in ri David, y xubij chire: Kere' rubin-pe ri Jehová chuwe richin chi ninbij chawe rat: 12Tacha' jun chike re oxi' ruk'ayewal re' ri xtinbij-apo chawe: Ri nabey, oxi' juna' wayjal; ri ruka'n, oxi' ik' ri yixch'akatej koma ri etzelanel iwichin; y ri rox, oxi' q'ij ri kan ja ri Jehová ri xtuya-pe ri tijoj-poqonal rik'in ri ru-espada. Toq rija' xtutzeqej ri ru-espada, kan jari' xtiqaqa jun nimalej yabil pa kiwi' konojel ri winaqi'. Yin Jehová xtinkusaj ri nu-ángel richin xtuk'en-pe kamik pa ruwi' chijun ruwach'ulew Israel, nicha' ri Jehová. Roma ri', rat David tach'obo' k'a jebel ri achike nabij-el, richin keri' yin xtinbenbij chire ri Jehová ri in taqayon-pe, xcha' ri Gad.
13K'ari' ri David xuk'uluba' ri ruch'abel ri Gad: Yin ink'o pa jun nimalej bis. Más ta utz ja ta ri Jehová xtiya'on ri ruk'ayewal pa nuwi', y man ta xkiqaqa pa kiq'a' ri e etzelanel wichin, roma más k'o joyowanik rik'in ri Jehová ke chikiwech rije', xcha'.
14Roma ri' ri Jehová xuya' k'a pe jun nimalej yabil pa kiwi' ri achi'a' israelita, y xeken, e 70,000. 15K'ari' ri Jehová xuteq k'a pe ri ru-ángel richin nuk'is ri Jerusalem. Jak'a toq ri ángel najin chire ri kamik, ri Jehová xq'axon rik'in, y xubij chire: Xaxe kela'. Man ye'akamisaj ta chik más, xcha'.
Chupan k'a ri ramaj ri' ri ru-ángel ri Jehová k'o pa kaq'iq' pa ruwi' ri akuchi nuch'ey-wi trigo ri Ornán ri jebuseo. 16Toq ri David xtzu'un-q'anej, jari' toq xutz'et ri ángel k'o pa kinik'ajal ri ruwach'ulew y ri kaj, y ruk'uan jun espada relesan-el pa ruk'ojelibal richin nuq'ijuj ri Jerusalem. Ri David y ri e tata'al ri ek'o rik'in kan jari' xkilukuba-qa-ki' pan ulew. Y rije' kikusan ri tzieq richin bis. 17K'ari' ri David xubij chire ri Dios: ¡Ja yin ri xibin chi ke'ajlex ri achi'a'! ¡Ja yin ri ximakun y xinben janila itzel! ¿K'o kami kimak xkiben re achi'a' re' chawech? Wajaw nu-Dios, nink'utuj utzil chawe richin chuwij yin tiqaqa-wi ri ruk'ayewal y chikij ri e aj pa rachoch kan ri nata', jak'a man jun chik taben chire ri atinamit, xcha'.
Ri Dios man xuya' ta chik ruk'ayewal
(2 Sam 24:18-25)
18K'ari' ri ángel richin ri Jehová xubij chire ri Gad chi tubij chire ri David chi tiberubana' jun porobel ri akuchi nich'ayon-wi trigo ri Ornán ri jebuseo. 19Y ri David kan xjote' k'a el chupan ri ulew ri', achi'el xubij ri Gad chire, roma kan ja ri Jehová biyon chire. 20Rokik ronojel re' ri Ornán nich'ayon trigo. Y toq xtzu'un chirij, jari' toq xutz'et ri ángel. Jak'a ri e kaji' ruk'ajol ri ek'o rik'in rija' xa xkewaj-ki'. 21Toq ri David xapon akuchi k'o-wi ri Ornán, ri Ornán kan xaxe toq xutz'et ri David, xel-pe chiri' richin xxuke-qa chuwech. 22K'ari' ri David xubij chire: Tak'ayij chuwe re awulew re' rik'in jun utzilej rajel richin yin xtinpaba-q'anej jun porobel richin ninsuj kamelabel chuwech ri Jehová, richin keri' ri Jehová xtrelesaj-el re nimalej yabil re' ri qajineq pa ruwi' ri qatinamit, xcha'.
23Y ri Ornán xubij k'a chire ri David: Takusaj, nu-rey, y tabana' ri niqa' chawech. Yin yenya' ri bóyix richin ye'aporoj chijun, ri ch'ayibel trigo richin nok si', y ri trigo richin sipanik. Ronojel re' yenya' chawe nu-rey, xcha'.
24Jak'a ri David xubij: Janila ninmatioxij chawe, jak'a kan k'o chi ninloq' chawe rik'in utz rajel, roma yin man xtinsuj ta kamelabel chuwech ri Jehová ri xa man yin ta in loq'oyon; y man xtinporoj ta chikop ri xa man nutojon ta rik'in méro, xcha'.
25K'ari' ri David xuya' k'a wolajuj libra q'anapueq chire ri Ornán richin xutojbej ri ulew ri'. 26Y ri David xupaba-q'anej jun porobel richin ri Jehová, y xerusuj chikopi' ri yeporox chijun, y xusuj sipanik richin nuq'alajirisaj chi junan ruwech rik'in ri Dios. Xeri' xch'on rik'in ri Jehová, y ri Dios xuk'uluba-pe ri ruch'abel rik'in q'aq'. Y ri q'aq' ri' peteneq chila' chikaj, y xqaqa pa ruwi' ri porobel. 27K'ari' ri Jehová xubij chire ri ángel chi tuyaka' k'a ri ru-espada. Y ri ángel kan keri' xuben.
28Y toq ri David xutz'et chi ri Jehová kan xrak'axaj ri ruch'owen, chiri' ri akuchi k'o-wi ri rulew ri Ornán aj-Jebús, jari' toq jantape' xerusuj kamelabel chiri'. 29Jak'a ri porobel richin yesuj chikopi' y ri rachoch ri Jehová ri xuben kan ri Moisés pa tz'iran ruwach'ulew; re' ye'ilitej-q'anej pa tinamit Gabaón. 30Jak'a ri David man xtikir ta xbe k'a chiri' pa Gabaón richin nuya' ruq'ij ri Dios, roma kan janila xuxibij-ri' y xuch'ob chi wi xtel-el chiri', ri Dios nukamisaj rik'in ri espada ri'.
Currently Selected:
1 Crón 21: KQC
Highlight
Copy
Compare
Share
Want to have your highlights saved across all your devices? Sign up or sign in
Kaqchikel Bible © Bible Society in Guatemala, 2003.
