ᐊᐸᔅᑕᓚᒃ 13
13
ᐹᕐᓇᐸᔅ ᓀᔥᑕ ᓵᓪ ᐸᑳᓂᐊᑲᓂᐗᓄᒃ ᓀᔥᑕ ᑭᒋᑎᔕᐗᑲᓂᐎᐗᒃ
1ᐁᑯᔅᐱ ᑮ ᐃᑖᐗᒃ ᐊᓐᑕ ᐋᔭᒥᐁᐎᑲᒥᑯᒃ ᑳ ᐃᑕᑾᒃ ᐋᓐᑎᐊᑭᒃ ᐊᑎᑦ ᐅᑭᔅᑭᐙᐃᑫᐗᒃ ᓀᔥᑕ ᐅᑭᔅᑭᓄᐊᒫᑫᐗᒃ; ᐹᕐᓇᐸᔅ, ᓀᔥᑕ ᓯᒥᔭᓐ ᑳ ᐃᔑᓂᑳᓱᑦ ᓇᐃᑲᕐ, ᓀᔥᑕ ᓘᓯᐊᔅ, ᓴᐃᕆᓂᐃᒃ ᑳ ᐅᒌᑦ, ᓀᔥᑕ ᒣᓀᐃᓐ ᑳ ᑮ ᐎᒋᐅᐱᑭᒫᑦ ᐦᐁᕋᑕ ᑳ ᐅᑭᒫᐎᓕᒋ ᓀᔥᑕ ᓵᓪ᙮ 2ᒣᒀᒡ ᐁ ᐋᑐᔅᑫᔅᑕᐙᒋᒃ ᐅᑎᐯᓕᒋᑫᐗ, ᓀᔥᑕ ᐁ ᓂᑲᓱᒋᒃ, ᑳ ᐸᓓᑭᓯᑦ ᐊᒑᒃ ᑮ ᐃᑗᐤ, ᐹᑲᓇᒪᐎᒃ ᐹᕐᓇᐸᔅ ᓀᔥᑕ ᓵᓪ ᐊᓂᒪ ᐊᑐᔅᑫᐎᓐ ᐅᒋ ᑳ ᑮ ᐃᔑ ᓇᑐᒪᑭᒃ᙮
3ᐃᔅᐱ ᒫᑲ ᑳ ᑮ ᓂᑲᓱᒋᒃ ᓀᔥᑕ ᐋᔭᒥᐋᒋᒃ, ᓀᔥᑕ ᓵᓵᒥᓈᒋᒃ, ᑮ ᑭᒋᑎᔕᐌᐙᒃ᙮
ᓵᐃᑉᕋᓯᒃ
4ᐁᑯ ᒫᑲ ᐎᓚᐗᐤ, ᐁ ᑮ ᑭᒋᑎᔕᐅᑯᒋᒃ ᐸᓓᑭ ᐊᒑᑾ, ᑮ ᐃᑐᑌᐗᒃ ᓯᓘᓯᐊᐃᒃ; ᐊᓐᑕ ᒫᑲ ᐅᒋ ᑮ ᐃᑖᔑᐗᒃ ᓵᐃᑉᕋᓯᒃ᙮ 5ᐃᔅᐱ ᒫᑲ ᑳ ᐃᑖᒋᒃ ᐊᓐᑕ ᓵᓚᒥᓯᒃ, ᑮ ᐙᐎᑕᒬᐗᒃ ᑭᒋᒪᓂᑐᐗ ᐅᑦ ᐋᔭᒥᐎᓂᓕᐤ ᐱᒋ ᒎᐗ ᐅᑦ ᐋᔭᒥᐁᐎᑲᒥᑯᓕᒃ; ᑮ ᐊᔮᐌᐗᒃ ᒫᑲ ᐊᓂᐃ ᒑᓇ ᐊᓯᒋ ᑭᒋ ᐊᑑᔅᑫᔅᑳᑯᒋᒃ᙮
6ᐃᔅᐱ ᒫᑲ ᑳ ᑮ ᔕᐴᔥᑲᑭᒃ ᐊᓂᒪ ᒥᓂᔅᑎᒃ ᐯᐸᓯᒃ ᐃᔅᑯ, ᑮ ᒥᔅᑲᐌᐗᒃ ᐯᔭᒃ ᒥᑌᐗ, ᑭᓛᔅᑭᐎ ᐅᑭᔅᑭᐗᐃᑫᐗ, ᐁ ᒎᐎᓕᒋ, ᐹᕐᒌᓴᔅ ᑳ ᐃᔑᓂᑲᓱᓕᒋ; 7ᐊᓇ ᑳ ᑮ ᐎᒉᐙᑦ ᐊᓂᐃ ᑳ ᑎᐯᓕᑕᒥᓕᒋ ᐊᓂᐁᓕᐤ ᐊᔅᑭᓕᐤ, ᓴᕐᒋᐊᔅ ᐹᓚᔅ, ᐁ ᑲᑫᑕᐌᓕᑕᒃ ᐃᓕᓕᐤ: ᐊᓇ ᑳ ᑮ ᓇᑐᒫᑦ ᐊᓂᐃ ᐹᕐᓇᐸᔅ ᓀᔥᑕ ᓵᓪ, ᑮ ᓇᑕᐌᓕᑕᒻ ᒫᑲ ᑭᒋ ᐯᑕᒸᑦ ᑭᒋᒪᓂᑐᐗ ᐅᑦ ᐋᔭᒥᐎᓂᓕᐤ᙮ 8ᐃᓕᒪᔅ ᒫᑲ ᑳ ᒥᑌᐎᓖᓖᐎᑦ (ᐌᓴ ᐁᐗᒀᓂᒪ ᐁ ᐃᔑᓂᑳᑎᑦ ᐁ ᓈᐃᒧᓈᓂᐗᒃ) ᑮ ᓈᔅᑯᔥᑖᐌᐤ, ᐁ ᓇᑕᐌᓕᑕᒃ ᑭᒋ ᑴᔅᑭᓈᑦ ᐊᓂᐃ ᐅᑭᒫᐗ ᑖᐺᔦᓕᑕᒧᐎᓂᓕᐤ ᐅᒋ᙮ 9ᐁᑯ ᓵᓪ (ᐊᓇ ᐹᓪ ᐊᓯᒋ ᑳ ᐃᔑᓂᑲᑖᑲᓂᐎᑦ) ᐁ ᓵᑲᔅᑭᓀᔅᑲᑯᑦ ᐸᓓᑭ ᐊᒑᑾ, ᑮ ᑲᓇᐙᐸᒣᐤ, 10ᓀᔥᑕ ᑮ ᐃᑌᐤ, ᐆ ᑳ ᓵᑲᔅᑭᓀᔅᑳᑯᔭᓐ ᒥᓯᐌ ᑲᑳᔦᓕᓯᐎᓐ ᓀᔥᑕ ᒥᓯᐌ ᑭᔥᑴᐋᑎᓯᐎᓐ, ᑭᓚ ᑳ ᐅᑦ ᐊᐙᔑᒥᔑᒥᔉ ᒪᒋᒪᓂᑐ, ᑭᓚ ᑳ ᐎ ᓇᑎᓇᒪᓐ ᒥᓯᐌ ᒀᔭᔅᑭᑖᑎᓯᐎᓐ; ᓇᒪ ᓈ ᑭ ᑳ ᐳᓂᑖᓐ ᐁ ᓂᔑᐗᓈᒋᑖᐗᑦ ᐅ ᒀᔭᔉ ᐃᔑᑣᐎᓇ ᐅᑎᐯᓕᒋᑫᐤ? 11ᐊᓄᒡ ᒫᑲ, ᒫᑎᑲ, ᐅᒋᒋ ᐅᑎᐯᓕᒋᑫᐤ ᑮ ᐹᑕᑯᔥᑳᑯᐙᓐ, ᓀᔥᑕ ᓇᒪᐎᓚ ᑮ ᑳ ᐙᐱᓐ, ᓄᒪᑫᔥ ᐁᑳ ᐁ ᐙᐸᒪᑦ ᐱᓯᒻ᙮
ᑣᔦᒃ ᒫᑲ ᑮ ᐅᑎᑎᑯ ᐁ ᐱᑭᔐᔮᓕᒃ ᓀᔥᑕ ᐁ ᐗᓂᑎᐱᔅᑳᓕᒃ; ᑮ ᐸᐹᒧᑌᐤ ᒫᑲ ᐁ ᓈᓇᑐᓇᐙᑦ ᐊᐌᓕᐗ ᑭᒋ ᑕᑯᓂᔅᑫᑖᐃᑯᑦ᙮ 12ᐁᑯ ᒫᑲ ᐊᓇ ᐅᑭᒪᐤ, ᐃᔅᐱ ᐎᐋᐸᑕᒃ ᐊᓂᐁᓕᐤ ᑳ ᑮ ᑐᒋᑲᑌᓕᒃ, ᑮ ᑖᐺᑕᒻ, ᐁ ᒫᒪᔅᑲᑕᒸᑦ ᐅ ᑭᔅᑭᓄᐊᒫᑫᐎᓂᓕᐤ ᐊᑎᐯᓕᒋᑫᐗ᙮
ᐋᓐᑎᐊᒃ ᐊᓐᑕ ᐱᓯᑎᐊ
13ᐁᑯ ᐃᔅᐱ ᐹᓪ ᓀᔥᑕ ᐅ ᐎᒉᐙᑲᓇ ᑳ ᓇᑲᑕᑭᒃ ᐯᐸᔅ, ᑭ ᐯᒋ ᐃᑐᑌᐗᒃ ᐊᓐᑕ ᐸᕐᑲ ᐸᒻᐱᓕᐊᐃᒃ: ᒑᓐ ᒫᑲ ᐁ ᓇᑲᑖᑦ ᑮ ᑭᐌᐤ ᒋᕉᓴᓚᒥᒃ᙮ 14ᐃᔅᐱ ᒫᑲ ᑳ ᑭᑐᑌᒋᒃ ᐸᕐᑲᐃᒃ ᐅᒋ, ᑮ ᐯᒋ ᐃᑐᑌᐗᒃ ᐋᓐᑎᐊᑭᒃ ᐱᓯᑎᐊᐃᒃ ᑳ ᐃᑕᒀᒃ, ᓀᔥᑕ ᑮ ᐱᑐᑫᐗᒃ ᐋᔭᒥᐁᐎᑳᒥᑯᒃ ᐁ ᐋᔭᒥᐁᑭᔑᑳᓕᒃ, ᑮ ᓇᐊᐱᐗᒃ ᒫᑲ᙮ 15ᐃᔅᐱ ᒫᑲ ᑳ ᐳᓂ ᐋᔭᒥᑖᓂᐗᒃ ᐅᓚᔓᐌᐎᓐ ᓀᔥᑕ ᐅᑭᔅᑭᐗᐃᑫᐗ, ᐊᓂᑭ ᑳ ᑎᐯᓕᑕᑭᒃ ᐋᔭᒥᐁᐎᑲᒥᑯᓕᐤ ᑮ ᐃᔑᑎᔕᐊᒪᐌᐗᒃ, ᐁ ᐃᑖᒋᒃ, ᑭᓚᐗᐤ ᐃᓕᓕᑐᒃ ᓀᔥᑕ ᓂᒋᔖᓂᓈᓇᒃ, ᑮᔥᐱᓐ ᐊᔮᔦᒃ ᑲᑫᔅᑭᒥᐌᐎ ᐋᔭᒥᐎᓐ ᐃᓕᓕᐗᒃ ᑭᒋ ᐃᑌᑾᒃ, ᐁᑯᔑ ᐃᑗᒃ᙮ 16ᐁᑯ ᒫᑲ ᐹᓪ ᑳ ᐹᓯᑯᑦ, ᓀᔥᑕ ᐁ ᐗᐙᔅᑕᐃᑫᑦ ᐅᒋᒋ ᐅᒋ,
ᑮ ᐃᑌᐤ, ᑭᓚᐗᐤ ᐃᔅᕃᐃᓪ ᐃᓕᓕᑐᒃ, ᓀᔥᑕ ᑭᓚᐗᐤ ᑳ ᓇᓂᒋᔅᑕᐌᒃ ᑭᒋᒪᓂᑐ, ᓈᑐᑕᒧᒃ᙮ 17ᐅ ᑭᒋᒪᓂᑐᒥᐗᐗ ᐅᑯ ᐃᔅᕃᐃᓪ ᐃᓕᓕᐗᒃ ᑮ ᐗᐌᓓᓕᒣᐤ ᑰᑕᐙᓇᐗ, ᓀᔥᑕ ᑮ ᑭᔅᑌᓕᑖᑯᐁᐤ ᐊᓂᐃ ᐃᓕᓕᐗ, ᐃᔅᐱ ᑳ ᑖᔑᑫᓕᑭ ᑖᐱᔅᑯᒡ ᒫᓐᑌᐗ ᐊᓐᑕ ᐃᒋᑉᑦ ᐊᔅᑭᒃ, ᓀᔥᑕ ᑭᒋ ᒥᔅᐱᑐᓂᓕᐤ ᑮ ᐅᒋ ᐯᒋ ᐙᓚᐎᑕᐁᐤ ᐊᓐᑕ ᐅᒋ᙮ 18ᓈᓐᑕᐤ ᒫᑲ ᓀᒥᑕᓇᐤ ᐱᐳᓋ ᑮ ᔑᐯᓕᑕᒬᐤ ᐅᑦ ᐃᓯᒋᑫᐎᓂᓕᐗ ᐊᓐᑕ ᐸᒀᑕᔅᑲᒥᑳᒃ᙮ 19ᐃᔅᐱ ᒫᑲ ᑳ ᑮ ᓂᔑᐗᓈᒋᐋᑦ ᓃᔂᔅ ᐁ ᑕᑐᔅᑲᓀᓯᓕᒋ ᐃᓕᓕᐗ ᐊᓐᑕ ᑫᓇᓐ ᐊᔅᑭᒃ, ᑮ ᒫᑎᓇᒪᐌᐤ ᐅᑦ ᐊᔅᑭᓕᐤ ᐁ ᒪᐃᑲᓈᑎᑯᑳᓂᐗᒃ ᐅᒋ᙮ 20ᐋᔅᑕᒥᔅᐱ ᒫᑲ, ᑮ ᒥᓓᐤ ᐅᑎᐹᔅᑯᓂᑫᐗ, ᓈᓐᑕᐤ ᓀᐙᐤ ᒥᑖᑐᒥᑕᓇᐤ ᓂᔮᓚᓗᒥᑕᓇᐤ ᐱᐳᓋ ᐃᔥᐱᔥ, ᐱᓕᔥ ᓵᒻᔪᐊᓪ ᐅᑭᔅᑭᐗᐃᑫᐤ᙮ 21ᐹᑎᒪ ᒫᑲ ᑮ ᓇᑕᐌᓕᒣᐙᒃ ᑭᒋᐅᑭᒫᐙ: ᑭᒋᒪᓂᑐ ᒫᑲ ᑮ ᒥᓓᐤ ᐊᓂᐃ ᓵᓪ ᑭᔥ ᐅᑯᓯᓴ, ᐃᓕᓕᐗ ᐯᓐᒋᒥᓐ ᐅᑦ ᐊᐙᔑᒥᔑᓕᐗ ᑳ ᐅᒋᓕᒋ, ᓀᒥᑕᓇᐤ ᐱᐳᓋ ᐃᔥᐱᔥ᙮ 22ᐃᔅᐱ ᒫᑲ ᑳ ᑮ ᐃᑲᑌᓈᑦ ᐊᓂᐃ; ᑮ ᐸᓯᑯᓇᒪᐌᐤ ᑌᐱᑕ ᑭᒋ ᑭᒋᐅᑭᒫᒥᓕᒋ: ᐊᓂᐃ ᓀᔥᑕ ᑳ ᑮ ᑎᐹᒋᒫᑦ, ᐁ ᐃᑗᑦ ᒫᑲ, ᓂ ᑮ ᒥᔅᑲᐙᐤ ᑌᐱᑦ ᐅᑯᓯᓴ ᐊᓇ ᒉᓯ, ᐃᓕᓕᐤ ᑳ ᐎᒋᐃᔑᑌᐁᒥᑦ, ᑫ ᑎᐱᑐᑕᒃ ᒥᓯᐌ ᑳ ᐃᑌᓕᑕᒫᓐ᙮ 23ᐊᐗ ᐃᓕᓕᐤ ᐅᑦ ᐊᐙᔑᒥᔕ ᐅᒋ ᑭᒋᒪᓂᑐ, ᒬᒋ ᑳ ᑮ ᐃᔑ ᓈᔅᑯᒧᑦ, ᑮ ᐸᓯᑯᓇᒪᐌᐤ ᐊᓂᐃ ᐃᔅᕃᐃᓪ ᐅ ᐱᒫᒋᐃᐌᒪ, ᒋᓴᓴ; 24ᐃᔅᐱ ᒑᓐ ᓂᔥᑕᒻ ᑳ ᑮ ᑳᑫᔅᑭᒫᑦ, ᐸᒧᔑ ᑳ ᑖᑯᔑᓂᓕᒋ, ᐊᓂᐁᓕᐤ ᑴᔅᑳᑎᓯᐎᓂ ᓯᑲᐋᑖᑫᐎᓂᓕᐤ, ᒥᓯᐌ ᐊᓂᐃ ᐃᔅᕃᐃᓕᐎᓕᓕᐙ᙮ 25ᒣᒀᒡ ᒫᑲ ᒑᓐ ᐁ ᑎᐱᐹᓕᑖᑦ ᐅᑦ ᐊᑐᔅᑫᐎᓇ, ᑮ ᐃᑗᐤ, ᐊᐌᓇ ᐁᑌᓕᑕᒣᒃ ᓂᓚ ᐁ ᐋᐃᔮᓐ? ᓇᒪ ᓂᑦ ᐋᐐᓐ ᐎᓚ᙮ ᒫᑲ, ᒫᑎᑲ, ᐯᔭᒃ ᐊᐌᓇ ᓂ ᐯᒋ ᓄᔅᐱᓇᑎᒃ, ᐅ ᒪᔅᑭᓯᓇ ᓇᒪᐎᓚ ᓂᑦ ᐃᔅᐱᑌᓕᑖᑯᓯᓐ ᑭᒋ ᐋᐸᐊᒶᒃ᙮
26ᐃᓕᓕᑐᒃ ᓀᔥᑕ ᓂᒋᔖᓂᑐᒃ, ᑳ ᐅᑦ ᐊᐙᔑᒥᔑᒥᑖᒃ ᐊᓇ ᐁᑉᕃᐋᒻ, ᓀᔥᑕᐱᑯ ᐊᐌᓇ ᐁ ᐃᑕᔑᔦᒃ ᑳ ᓇᓂᒋᔅᑕᐙᑴ ᑭᒋᒪᓂᑐᐗ, ᑭᓚᐗᐤ ᐃᓴ ᑭᑦ ᐃᔑᑎᔕᐊᒪᑲᐎᓇᐗᐤ ᐅᒪ ᐱᒫᒋᐃᐌᐎᓂ ᐋᔭᒥᐎᓐ᙮ 27ᐌᓴ ᐊᓂᑭ ᑳ ᑕᔑᑫᒋᒃ ᒋᕉᓴᓚᒥᒃ, ᓀᔥᑕ ᐅᑦ ᐅᑭᒫᒥᐙᐗ, ᐁᑳ ᐁ ᑮ ᑭᔅᑫᓕᒫᒋᒃ ᐅᒋ, ᓀᔥᑕᐱᑯ ᐅᑦ ᐃᑗᐎᓂᓕᐗ ᐅᑭᔅᑭᐗᐃᑫᐗ ᑳ ᐋᔭᒥᑖᓂᐗᑭ ᑕᑡᐤ ᐋᔭᒥᐁᑭᔑᑳᓕᑭ, ᐎᓚᐗᐤ ᑮ ᑎᐱᑐᑕᒶᒃ ᐅᐅ ᐁ ᑮ ᓂᔑᐗᓈᒋᒫᒋᒃ᙮ 28ᐊᑕ ᒫᑲ ᐁᑳ ᑫᒀᓕᐤ ᐁ ᑮ ᒥᔅᑲᑭᒃ ᑫ ᐅᒋ ᓂᐸᐊᐙᔅᐸᓐ, ᑫᔮᐸᒡ ᑮ ᓇᑕᐌᓕᒣᐗᒃ ᐹᐃᓚᑕ ᑭᒋ ᑮ ᓂᐳᐃᒥᒋ᙮ 29ᐃᔅᐱ ᒫᑲ ᑳ ᑮ ᑎᐱᐸᓕᑖᒋᒃ ᒥᓯᐌ ᑳ ᒪᓯᓇᐃᑳᑌᓕᒃ ᐎᓚ ᐅᒋ, ᑮ ᓂᑎᓀᐗᒃ ᒥᔅᑎᑯᒃ ᐅᒋ, ᓀᔥᑕ ᑮ ᐱᒥᔑᒣᐗᒃ ᒋᐸᔨᑲᒥᑯᒃ᙮ 30ᑭᒋᒪᓂᑐ ᒫᑲ ᑮ ᐗᓂᔥᑲᓀᐤ ᐅᓂᐱᐗ ᐅᒋ: 31ᓀᔥᑕ ᑮ ᐗᐸᒥᑯ ᒥᒉᑐ ᑭᔑᑳᐗ ᐊᓂᐃ ᑳᓕᓕᒃ ᑳ ᑮ ᐅᒋ ᐯᒋ ᐎᒉᐎᑯᑦ ᒋᕉᓴᓚᒥᒃ ᐃᔅᑯ, ᐊᓂᑭ ᑳ ᑎᐸᒋᒧᔅᑕᐙᒋᒃ ᐃᓕᓕᐗ ᐁ ᐊᓕᒧᒫᒋᒃ᙮ 32ᓂᓚᓇᓐ ᒫᑲ ᑭ ᑎᐸᒋᒧᔅᑖᑎᓈᓐ ᒥᓗᐋᒋᒧᐎᓇ, ᐊᓂᒪ ᐊᔓᑕᒫᑫᐎᓐ ᑳ ᑮ ᐅᔑᑖᒫᒋᒃ ᐅᑖᐎᒫᐗᒃ, 33ᑭᒋᒪᓂᑐ ᐁ ᑮ ᑎᐱᐸᓕᑕᒫᑕᒃ ᐊᓂᒪ ᑭᓚᓈᓈᐤ ᐅᑦ ᐊᐙᔑᒥᔑᐙᐗ, ᒥᓇ ᐁ ᑮ ᐗᓂᔥᑲᓈᑦ ᒋᓴᓴ: ᒬᒋ ᓀᔥᑕ ᐁ ᐃᔑ ᒪᓯᓇᐃᑲᑌᓕᒃ ᓂᔓ ᓂᑲᒧᐎᓂᒃ, ᑭᓚ ᓂᑯᓯᔅ ᐊᓄᒡ ᐁ ᑭᔑᑳᒃ ᑭ ᑮ ᓂᑕᐎᑭᐃᑎᓐ᙮ 34ᐊᓂᒪ ᒫᑲ ᐅᒋ ᐁ ᑮ ᐗᓂᔥᑲᓈᑦ ᐅᓂᐱᐗ ᐅᒋ, ᐁᑯ ᐁᑳ ᒥᓇ ᑭᒋ ᑭᐌᓈᑕᒃ ᓂᔑᐗᓈᑎᓯᐎᓂᓕᐤ, ᐅᒪ ᑮ ᐃᑗᐤ, ᑭ ᑳ ᒥᓕᑎᓇᐗᐤ ᐅ ᑖᐺ ᔕᐌᓕᒋᑫᐎᓇ ᐊᓇ ᑌᐱᑦ᙮ 35ᐁᐗᑯ ᐌᒋ ᐃᑗᑦ ᑯᑕᒃ ᓂᑲᒧᐎᓂᒃ, ᓇᒪᐎᓚ ᑭ ᑳ ᐃᓕᓇᐗᐤ ᑭ ᐸᓓᑭᓯᒻ ᑭᒋ ᐗᐸᑕᒃ ᓂᔑᐗᓈᑎᓯᐎᓂᓕᐤ᙮ 36ᐌᓴ ᑌᐱᑦ, ᐃᔅᐱ ᑳ ᑮ ᐳᓂ ᐋᑐᔅᑲᐙᑦ ᐊᓂᐃ ᑳ ᑮ ᐎᒋ ᐱᒪᑎᓯᒫᑦ ᑭᒋᒪᓂᑐ ᐅᑦ ᐃᑌᓕᑕᒧᐎᓐ ᐅᒋ, ᑮ ᑳᐎᑯᔑᐤ, ᓀᔥᑕ ᐁ ᑮ ᐎᒋᔑᓄᒫᑦ ᐅᑖᐎᔭ, ᑮ ᐗᐸᑕᒻ ᒫᑲ ᓂᔑᐗᓈᑎᓯᐎᓂᓕᐤ: 37ᒫᑲ ᐎᓚ ᒥᓇ ᑳ ᑮ ᐗᓂᔥᑲᓂᑯᑦ ᑭᒋᒪᓂᑐᐗ, ᓇᒪ ᐎᓚ ᑮ ᐙᐸᑕᒻ ᓂᔑᐗᓈᑎᓯᐎᓂᓕᐤ᙮ 38ᐁᐗᑯ ᐅᒋ ᑭᔅᑫᓕᑕᒧᒃ ᑭᓚᐗᐤ, ᐃᓕᓕᑐᒃ ᓀᔥᑕ ᓂᒋᔖᓂᑐᒃ, ᐊᐗ ᐃᓕᓕᐤ ᐅᒋ ᐁ ᐎᑕᒫᑲᐎᔦᒃ ᐁ ᐌᐯᓕᒋᑳᑌᑭ ᒪᒋᑣᐎᓇ᙮ 39ᓀᔥᑕ ᐎᓚ ᐅᒋ, ᒥᓯᐌ ᑳ ᑖᐺᑕᑭᒃ ᒥᓗᑡᐌᓕᒪᑲᓂᐎᐗᒃ ᒥᓯᐌ ᑫᒀᓂᒃ ᐃᔑ, ᐊᓂᒪ ᐁᑳ ᒧᓯᔅ ᐅᑦ ᐅᓚᔓᐌᐃᓐ ᑫ ᑮ ᐅᒋ ᒥᓗᑡᐌᓕᒥᑲᐎᔦᒃ᙮ 40ᔮᒀᒥᓯᒃ ᒫᑲ, ᐁᑳ ᐊᓂᒪ ᑭᒋ ᐅᑎᑎᑯᔦᒃ, ᑳ ᑮ ᐊᓕᒧᑕᑭᒃ ᐅᑭᔅᑭᐗᐃᑫᐗᒃ; 41ᐙᐸᑕᒧᒃ, ᑭᓚᐗᐤ ᒫᓓᓕᒋᑫᔅᑲᒃ, ᒫᒪᔅᑳᑕᒧᒃ ᒫᑲ, ᓀᔥᑕ ᓂᔑᐗᓈᑎᓯᒃ: ᐌᓴ ᓂᑦ ᐋᑐᔅᑳᑌᓐ ᐋᑐᔅᑫᐎᓐ ᒣᒀᒡ ᑭ ᑭᔑᑳᒥᐙᐗ, ᐋᑐᔅᑫᐎᓐ ᐁᑳ ᒥᑐᓂ ᑫ ᑖᐺᑕᒣᒃ, ᐋᑕ ᐃᓕᓕᐤ ᐁ ᐗᐎᑕᒫᑖᒃ᙮
42ᐃᔅᐱ ᒫᑲ ᒎᐗᒃ ᑳ ᐅᒋ ᐗᓚᐎᒋᒃ ᐋᔭᒥᐁᐎᑲᒥᑯᒃ, ᒉᓐᑖᐃᓚᒃ ᑮ ᐸᑯᓭᓕᒣᐗᒃ ᐅᐅ ᐋᔭᒥᐎᓇ ᑭᒋ ᑭ ᑭᔅᑭᓄᐊᒫᒋᒃ ᒥᓇ ᐋᔭᒥᐁᑭᔑᑲᓕᑫ᙮ 43ᐃᔅᐱ ᒫᑲ ᐊᓂᑭ ᑳ ᒫᐗᒋᐃᑐᒋᒃ ᑳ ᑭᑐᑌᒋᒃ, ᒥᒉᑦ ᐊᓂᑭ ᒎᐗᒃ ᓀᔥᑕ ᑳ ᐋᔭᒥᐁᐗᑎᓯᐎ ᐅᑴᔅᑳᑎᓴᒃ ᑮ ᓄᓱᓀᐌᐗᒃ ᐹᓚ ᓀᔥᑕ ᐹᕐᓇᐸᓴ; ᐊᓂᐃ, ᐁ ᐋᔭᒥᐃᑯᒋᒃ ᑮ ᔑᑭᒥᑯᐗᒃ ᑭᒋ ᐄᑖᒋᒃ ᑭᒋᒪᓂᑐᐗ ᐅ ᔓᐌᓂᒋᑫᐎᓂᓕᒃ᙮
44ᒥᓇ ᒫᑲ ᐁ ᐋᔭᒥᐁᑭᔑᑲᓕᒃ ᑫᑳᑦ ᒥᓯᐌ ᑳ ᐃᑕᓯᒋᒃ ᐃᑖᐎᓂᒃ ᑮ ᐯᒋ ᒫᒪᐎ ᐃᑐᑌᐙᒃ ᑭᒋ ᐯᑕᒸᒋᒃ ᑭᒋᒪᓂᑐᐗ ᐅᑦ ᐋᔭᒥᐎᓂᓕᐤ᙮ 45ᐃᔅᐱ ᒫᑲ ᒎᐗᒃ ᐎᐋᐸᒫᒋᒃ ᑳ ᒫᐗᒋᐃᑑᓕᒋ ᐃᓕᓕᐗ, ᑮ ᓵᑲᔅᑭᓀᐗᒃ ᐅᑌᓕᑕᒧᐃᓂᓕᐤ, ᓀᔥᑕ ᐁ ᒪᒋ ᐋᓕᒧᑕᑭᒃ ᐊᓂᐃ ᑫᒀᓇ ᑳ ᑎᐹᑐᑕᒥᓕᒋ ᐹᓚ, ᐁ ᐋᓉᑖᑫᒋᒃ ᓀᔥᑕ ᐁ ᐹᔅᑖᒧᒋᒃ᙮ 46ᐁᑯ ᐹᓪ ᓀᔥᑕ ᐸᕐᓇᐸᔅ ᑳ ᐊᑎ ᓱᑫᓕᒧᒋᒃ, ᑮ ᐃᑗᐗᒃ ᒫᑲ, ᑮ ᓇᑕᐌᓕᑖᑾᓐ ᑭᒋᒪᓂᑐ ᐅᑦ ᐋᔭᒥᐎᓐ ᑭᓚᐙᐤ ᓃᔥᑕᒻ ᑭᒋ ᑮ ᐋᓕᒧᑕᒫᑲᐎᔦᒃ: ᐁ ᓄᑾᒃ ᒫᑲ ᐁ ᐃᑲᑌᓇᒫᓱᔦᒃ, ᓀᔥᑕ ᐁ ᐃᑌᓕᒥᑎᓱᔦᒃ ᐁᑳ ᐁ ᑌᐸᑫᓕᑖᑯᓯᔦᒃ ᑳᑭᑫ ᐱᒫᑎᓯᐎᓐ ᑭᒋ ᐋᔮᔦᒃ, ᒫᑎᑲ ᓂ ᓈᑕᓈᓈᒃ ᒉᓐᑖᐃᓚᒃ᙮ 47ᐌᓴ ᐁᑯ ᑳ ᐃᔑ ᐅᓚᔓᐗᔑᔭᒥᑦ ᐅᑎᐯᓕᒋᑫᐤ, ᐁ ᐃᑗᑦ, ᑭ ᑮ ᐸᑭᑎᓂᑎᓐ ᑭᒋ ᐙᔅᑌᓇᒪᐗᒋᒃ ᒉᓐᑖᐃᓚᒃ, ᑭᓚ ᑭᒋ ᐱᒫᒋᐃᐌᐎᓂᐎᔭᓐ ᐁᔅᑾᔅᑲᒥᑳᒃ ᐃᔅᑯ᙮
48ᐃᔅᐱ ᒫᑲ ᒉᓐᑖᐃᓚᒃ ᐅᒪ ᐱᐁᑕᑭᒃ ᑭ ᓯᑭᓓᓯᐗᒃ, ᓀᔥᑕ ᑭ ᑭᔅᑌᓕᑕᒶᒃ ᐅᑎᐯᓕᒋᑫᐗ ᐅᑦ ᐊᔭᒥᐎᓂᓕᐤ: ᒥᓯᐌ ᒫᑲ ᑳ ᑮ ᐃᑕᑭᒥᒋᒃ ᑳᑭᑫ ᐱᒫᑎᓯᐃᓂᒃ ᐃᔑ, ᑮ ᑖᐺᑕᒶᒃ᙮
49ᐅᑎᐯᓕᒋᑫᐤ ᐅᑦ ᐋᔭᒥᐎᓐ ᒫᑲ ᑮ ᐋᓕᒧᒋᑲᑌᓕᐤ ᒥᓯᐌ ᐊᓂᒪ ᐊᔅᑮᒃ᙮ 50ᒎᐗᒃ ᒫᑲ ᑮ ᔑᑭᐁᐗᒃ ᑳ ᐋᔭᒥᐁᐙᑎᓯᓕᒋ ᓀᔥᑕ ᑳ ᑭᔅᑌᓕᑕᑯᓯᓕᒋ ᐃᔅᑴᐗ, ᓀᔥᑕ ᑭᒋ ᐃᓕᓕᐗ ᐃᑖᐎᓂᒃ ᑳ ᐃᑖᓕᒋ, ᑳ ᑮ ᐅᒋ ᑲᒀᑕᑭᐋᒋᒃ ᐊᓂᐃ ᐹᓚ ᓀᔥᑕ ᐸᕐᓇᐸᓴ, ᓀᔥᑕ ᐅᑦ ᐊᔅᑭᐙᒃ ᑮ ᐅᒋ ᑭᒋᑎᔕᐌᐗᒃ᙮ 51ᒫᑲ ᑮ ᐸᐸᐎᐸᓕᑕᒪᐌᐗᒃ ᐊᔑᔥᑭᓕᐤ ᐅᓯᑎᐙᒃ ᐅᒋ, ᓀᔥᑕ ᑮ ᐯᒋ ᐃᑐᑌᐗᒃ ᐋᐃᑯᓂᐊᒥᒃ᙮ 52ᑭᔅᑭᓄᐊᒪᐗᑲᓇᒃ ᒫᑲ ᑭ ᓵᑲᔅᑭᓀᔅᑲᑯᐗᒃ ᓯᑭᓓᓯᐎᓂᓕᐤ, ᓀᔥᑕ ᑳ ᐸᓓᑭᓯᓕᒋ ᐊᒑᑾ᙮
Currently Selected:
ᐊᐸᔅᑕᓚᒃ 13: MCNT91
Highlight
Copy
Compare
Share
Want to have your highlights saved across all your devices? Sign up or sign in
The text of the Bible in Moose Cree is in the public domain.
Moose Cree New Testament © Canadian Bible Society, 1991.
