ᐊᐸᔅᑕᓚᒃ 14
14
ᐋᐃᑯᓂᐊᒥᒃ
1ᑮ ᐃᑭᓐ ᒫᑲ ᐊᓐᑕ ᐋᐃᑯᓂᐊᒥᒃ, ᑖᐱᔅᑯᒡ ᐁ ᑮ ᐱᑐᑫᒋᒃ ᒎᐗ ᐅᑦ ᐋᔭᒥᐁᐎᑲᒥᑯᓕᒃ ᓀᔥᑕ ᐁ ᑮ ᐃᔑ ᐊᔭᒥᒋᒃ, ᓈᔅᐱᒡ ᒥᒉᑦ ᑳ ᒪᐗᒋᐃᑐᓕᒋ, ᑖᐱᔅᑯᒡ ᒎᐗ ᓀᔥᑕ ᒃᕆᑲ ᑳ ᐅᒋ ᑖᐺᑕᒥᓕᒋ᙮ 2ᒫᑲ ᐊᓂᑭ ᒎᐗᒃ ᐁᑳ ᑳ ᑖᐺᑕᑭᒃ ᑮ ᒥᑯᔅᑳᒋᐁᐗᒃ ᒉᓐᑖᐃᓚ, ᓀᔥᑕ ᑮ ᑐᑕᐌᐗᒃ ᑭᒋ ᒪᒋ ᒫᒥᑐᓀᓕᒫᒋᒃ ᐊᓂᐃ ᑳ ᐎᒋᔖᓂᑐᓕᑭ᙮ 3ᐁᐗᑯ ᐅᒋ ᑭᓉᔥ ᑭ ᑕᔑᑫᐗᒃ ᐁ ᓱᑭᑌᐁᐎ ᐋᔭᒥᒋᒃ ᐅᑎᐯᓕᒋᑫᒃ, ᑳ ᑮ ᐋᑐᑕᒃ ᐅ ᔕᐌᓕᒋᑫᐎᓂ ᐋᔭᒥᐎᓐ, ᐁ ᑮ ᒥᓕᐌᑦ ᒫᑲ ᑭᔅᑭᓄᐗᒋᒋᑲᓇ ᓀᔥᑕ ᒫᒪᔅᑲᒋᐃᓯᒋᑫᐎᓇ ᑭᒋ ᑐᒋᑲᑌᓕᒋ ᐅᒋᒋᓕᒃ ᐅᒋ᙮ 4ᒫᑲ ᑳ ᒥᒉᑎᒋᒃ ᐃᓕᓕᐗᒃ ᐃᑖᐎᓂᒃ ᑳ ᐃᑖᒋᒃ ᑮ ᓂᔓᑣᑐᐗᒃ; ᐋᑎᑦ ᒫᑲ ᑮ ᐎᒋᐁᐗᒃ ᐊᓂᐃ ᒎᐗ, ᐋᑎᑦ ᓀᔥᑕ ᐊᓂᐃ ᐊᐸᔅᑕᓚ᙮
5ᐃᔅᐱ ᒫᑲ ᐗ ᒪᑯᓈᒋᒃ, ᑖᐱᔅᑯᒡ ᒉᓐᑖᐃᓚᒃ ᓀᔥᑕ ᒎᐗᒃ, ᐊᓯᒋ ᐅ ᑎᐯᓕᒋᑫᐎᓕᓕᒥᐙᐗ, ᑭᒋ ᒪᒋ ᑐᑕᐙᒋᒃ, ᓀᔥᑕ ᑭᒋ ᐱᒧᓯᓈᑕᐙᒋᒃ, 6ᑮ ᑭᔅᑫᓕᑕᒶᒃ, ᑮ ᐅᔑᒧᐗᒃ ᒫᑲ ᓕᔅᑦᕋᐃᒃ ᓀᔥᑕ ᑕᕐᐱᐃᒃ ᐃᔑ, ᐃᑖᐎᓇ ᓛᐃᑫᐅᓂᐊᐃᒃ ᑳ ᐃᑕᑾᑭ, ᓀᔥᑕ ᒥᓯᐌ ᐊᔅᑭᒃ ᐙᔅᑲ ᐊᓐᑕ: 7ᐁᑯᑕ ᒫᑲ ᐎᐋᐎᑕᑭᒃ ᒥᓗᐋᒋᒧᐎᓂᓕᐤ᙮
ᐊᓐᑕ ᓕᔅᑦᕋ ᓀᔥᑕ ᑕᕐᐱᐃᒃ
8ᑮ ᐊᐱᐤ ᒫᑲ ᐯᔭᒃ ᐃᓕᓕᐤ ᐊᓐᑕ ᓕᔅᑦᕋᐃᒃ, ᐁ ᒫᔅᑭᓯᑌᑦ, ᑳ ᒫᔅᑭᓯᑦ ᐃᔅᑯᓇᒃ ᐅᑳᐎᔭ ᑳ ᓂᑖᐎᑭᐃᑯᑦ, ᐁᑳ ᐎᔅᑳᑦ ᑳ ᑮ ᐱᒧᑌᑦ: 9ᐁᐗᑯ ᑮ ᐯᑕᐌᐤ ᐹᓚ ᐁ ᐋᔭᒥᓕᒋ: ᓲᑲ ᑳ ᑲᓇᐙᐸᒥᑯᑦ, ᓀᔥᑕ ᐁ ᓂᓯᑖᐎᓈᑯᑦ ᐁ ᐊᔮᑦ ᑖᐺᔦᓕᑕᒧᐎᓂᓕᐤ ᑭᒋ ᒥᓇᐗᒋᐋᑲᓂᐎᑦ, 10ᑮ ᐃᑌᐤ ᐁ ᑭᔗᐌᑦ, ᒀᔭᔉ ᓂᐸᐎ ᑭᓯᑎᒃ᙮ ᑮ ᒀᔅᑯᑎᐤ ᒫᑲ ᓀᔥᑕ ᑮ ᐱᒧᑌᐤ᙮ 11ᐃᔅᐱ ᒫᑲ ᐃᓕᓕᐗᒃ ᑳ ᐙᐸᑕᑭᒃ ᐊᓂᐁᓕᐤ ᐹᓪ ᑳ ᑮ ᑐᑕᒥᓕᒋ, ᑮ ᑌᐺᐗᒃ ᐁ ᐃᑗᒋᒃ ᓛᐃᑫᐅᓂᐊ ᐃᔑᑭᔗᐎᓂᒃ, ᒪᓂᑐᐗᒃ ᑭ ᑮ ᓛᔑᔅᑕᑯᓇᐗᒃ ᐃᓕᓕᐗᒃ ᐅᑦ ᐃᔑᓇᑯᓯᐎᓂᐙᒃ᙮ 12ᐹᕐᓇᐸᔅ ᒫᑲ ᑮ ᐃᔑᓂᑳᑌᐗᒃ ᒎᐱᑕᕐ; ᓀᔥᑕ ᐹᓪ, ᒪᕐᑰᕆᐊᔅ, ᐌᓴ ᐎᓚ ᒫᐗᒡ ᑮ ᓂᑖ ᐋᔭᒥᐤ 13ᐁᑯ ᒎᐱᑕᕐ ᐅ ᓵᓵᑭᐎᓕᐌᐎᓕᓕᒪ, ᐅᑎᔥᑾᐤ ᐅᑦ ᐃᑖᐎᓂᐙᒃ ᑳ ᐃᑖᓕᒋ, ᑮ ᐯᔑᐌᐤ ᒥᔅᑐᓴ ᓀᔥᑕ ᐙᐱᑾᓂᐊ ᐃᔥᒀᑌᒥᒃ, ᓀᔥᑕ ᑲᑕ ᑮ ᓵᓵᑭᐎᓕᐌᔅᑕᐌᐸᓐ ᐊᓯᒋ ᐊᓂᑭ ᐃᓕᓕᐗᒃ᙮
14ᐃᔅᐱ ᐊᐸᔅᑕᓚᒃ, ᐹᕐᓇᐸᔅ ᓀᔥᑕ ᐹᓪ ᐊᓂᐁᓕᐤ ᐱᐁᑕᑭᒃ, ᑮ ᑖᑐᐱᑕᒶᒃ ᐅ ᐎᓛᒋᑲᓂᐙᐗ, ᓀᔥᑕ ᑮ ᒧᔅᑭᔅᑕᐌᐗᒃ ᐃᓕᓕᐗ, ᐁ ᑌᐺᒋᒃ, 15ᐁ ᐃᑗᒋᒃ ᒫᑲ, ᐅᑭᒫᑐᒃ, ᑖᓀᑭ ᐌᒋ ᑐᑕᒣᒃ ᐅᐅ ᑫᒀᓇ? ᓂᓚᓈᓐ ᓀᔥᑕ ᓂᑦ ᐃᓕᓕᐎᓈᓐ ᐁ ᐃᔑᓈᑯᓯᔮᒃ ᑖᐱᔅᑯᒡ ᑭᓚᐙᐤ, ᑭ ᑲᑫᔅᑭᒥᑎᓈᓐ ᒫᑲ, ᑭᒋ ᑮ ᓇᑲᑕᒣᒃ ᐅᐅ ᐸᑾᓐᑕᐤ ᑫᒀᓇ, ᑭᒋ ᑴᔅᑭᔅᑕᐌᒃ ᑳ ᐱᒫᑎᓯᑦ ᑭᒋᒪᓂᑐ, ᑳ ᑮ ᐅᔑᑖᑦ ᑭᒋᑭᔑᑯᓕᐤ, ᓀᔥᑕ ᐊᔅᑭᓕᐤ, ᓀᔥᑕ ᑭᒋᑲᒥᓕᐤ, ᓀᔥᑕ ᒥᓯᐌ ᑫᒀᓇ ᐊᓐᑕ ᑳ ᐃᑕᑾᓂᓕᑭ; 16ᐊᓇ ᐌᔅᑲᒡ ᑳ ᑮ ᐃᓕᓇᐗᑦ ᒥᓯᐌ ᐁ ᑕᑐᔅᑳᓀᓕᒋ ᐃᓕᓕᐗ ᑭᒋ ᐱᒧᑌᓕᒋ ᑎᐱᓚᐌ ᐅᑦ ᐃᔑᑣᐎᓂᓕᒃ᙮ 17ᐊᓕᐌᒃ ᓇᒪᐎᓚ ᐅᒋ ᓇᑲᑎᑎᓱ ᐁᑳ ᑭᒋ ᐋᓕᒧᒥᑦ, ᐁ ᑮ ᒥᓗ ᑐᑖᑫᑦ, ᓀᔥᑕ ᐁ ᑮ ᒥᓕᑕᒃ ᑭᒥᐗᓈᐳ ᑭᒋᑭᔑᑯᒃ ᐅᒋ, ᓀᔥᑕ ᐁ ᒥᓂᔑᐗᑭ ᐁ ᑴᔅᑲᔮᐙᑭ, ᐁ ᓵᑲᔅᑭᓇᑖᑦ ᑭᑌᐃᓇᐗ ᒥᒋᓱᐎᓂᓕᐤ ᓀᔥᑕ ᓯᑭᓓᓯᐎᓂᓕᐤ ᐅᒋ᙮ 18ᐅᐅ ᒫᑲ ᐃᑗᐎᓇ ᐅᒋ ᐊᑳᐗᒡ ᑭ ᑭᐱᒋᐁᐗᒃ ᐃᓕᓕᐗ, ᐁᑳ ᑭᒋ ᓵᓵᑭᐎᓕᐌᔅᑖᑯᒋᒃ᙮
19ᐁᑯᑕ ᒫᑲ ᑌᑯᔑᑭᒃ ᐊᑎᑦ ᒎᐗᒃ ᑳ ᐅᑐᑌᒋᒃ ᐊᓐᑎᐊᑭᒃ ᓀᔥᑕ ᐋᐃᑯᓂᐊᒥᒃ, ᑮ ᔕᑯᒋᒣᐗᒃ ᐃᓕᓕᐗ, ᓀᔥᑕ, ᐁ ᑮ ᐱᒧᓯᓈᑕᐙᒋᒃ ᐹᓚ, ᑭ ᐗᓚᐎ ᑖᐹᑌᐗᒃ ᐃᑖᐎᓂᒃ ᐅᒋ, ᓂᐱᐤ ᐁ ᑮ ᐃᑌᓕᒫᒋᒃ᙮ 20ᐁᓕᐌᒃ ᒫᑲ, ᒣᒀᒡ ᑭᔅᑭᓄᐊᒪᐗᑲᓇ ᐁ ᐙᔅᑲᑳᐸᐎᔅᑖᑯᑦ, ᑮ ᐗᓂᔥᑳᐤ, ᓀᔥᑕ ᑮ ᐯᒋ ᐱᑐᑫᐤ ᐃᑖᐎᓂᒃ: ᐎᐋᐸᒃ ᒫᑲ ᑭᑐᑌᐤ ᐊᓯᒋ ᐹᕐᓇᐸᔅ ᑕᕐᐱᐃᒃ ᐃᔑ᙮
ᐹᓪ ᓀᔥᑕ ᐹᕐᓇᐸᔅ ᑭᐌᐗᒃ ᐋᓐᑎᐊᑭᒃ ᐊᓐᑕ ᓰᕆᔭ ᐊᔅᑮᒃ
21ᐃᔅᐱ ᒫᑲ ᑳ ᑮ ᐙᐎᑕᑭᒃ ᒥᓗᐋᒋᒧᐎᓂᓕᐤ ᐊᓂᒪ ᐃᑖᐎᓂᒃ, ᓀᔥᑕ ᒥᒉᑦ ᐁ ᑮ ᑭᔅᑭᓄᐊᒪᐙᒋᒃ, ᑮ ᑭᐌᐗᒃ ᒥᓇ ᓕᔅᑕᕋᐃᒃ ᐃᔑ, ᓀᔥᑕ ᐋᐃᑯᓂᐊᒥᒃ ᓀᔥᑕ ᐋᓐᑎᐊᑭᒃ, 22ᐁ ᐊᔨᒋᐃᒫᒋᒃ ᐅᑦ ᐊᒑᑯᐗᐗ ᑭᔅᑭᓄᐊᒪᐙᑲᓇᒃ, ᓀᔥᑕ ᐁ ᔖᔑᑭᒫᒋᒃ ᓲᑲ ᑭᒋ ᒥᒋᒥᓇᒥᓕᒋ ᑖᐺᔦᓕᑕᒧᐎᓂᓕᐤ, ᓀᔥᑕ ᒥᔅᑕᐃ ᐊᓕᒥᓯᐎᓐ ᑭᒋ ᑮ ᐅᒋ ᐱᑐᑫᐗᒃ ᑭᒋᒪᓂᑐ ᐅᑦ ᐅᑭᒫᐎᐎᓂᒃ᙮ 23ᐃᔅᐱ ᒫᑲ ᑳ ᑮ ᐸᑲᓂᐋᒋᒃ ᐅᓂᑳᓀᓕᑖᑯᓯᐗ ᒥᓯᐌ ᑕᑐ ᐋᔭᒥᐁᐎᑲᒥᑯᒃ ᓀᔥᑕ ᐁ ᑮ ᐋᔭᒥᐋᒋᒃ ᐁ ᓂᑲᓱᒋᒃ, ᑮ ᐸᑭᑎᓇᒪᐌᐗᒃ ᐅᑎᐯᓕᒋᑫᐗ, ᐊᓂᐃ ᑳ ᑖᐺᔦᓕᒫᓕᒋ᙮
24ᐃᔅᐱ ᒫᑲ ᑳ ᑮ ᔖᐳᔥᑲᑭᒃ ᐱᓯᑎᐊᐃᓕᐤ, ᑭ ᐯᒋ ᐃᑐᑌᐗᒃ ᐹᒻᐱᓕᐊᐃᒃ᙮ 25ᓀᔥᑕ ᐃᔅᐱ ᑳ ᑮ ᐙᐎᑕᑭᒃ ᐋᔭᒥᐎᓂᓕᐤ ᐊᓐᑕ ᐸᕐᑲ, ᑮ ᐃᑐᑗᐗᒃ ᐋᑌᓕᐊᐃᒃ; 26ᐊᓐᑕ ᒫᑲ ᐅᒋ ᑮ ᐃᑕᔑᐗᒃ ᐋᓐᑎᐊᑭᒃ, ᐃᑕ ᑳ ᑮ ᐅᒋ ᐸᑳᓂᐃᒋᒃ ᑭᒋᒪᓂᑐ ᐅ ᔕᐌᓕᒋᑫᐎᓂᒃ ᐊᓂᒪ ᐊᑐᔅᑫᐎᓐ ᐅᒋ ᑳ ᑮ ᑎᐱᑐᑕᑭᒃ᙮
27ᐃᔅᐱ ᒫᑲ ᑳ ᑕᑯᔑᑭᒃ, ᓀᔥᑕ ᑳ ᒫᒪᐎ ᒫᐗᒋᐋᒋᒃ ᒫᒪᐎᐋᔭᒥᐋᐗ ᑮ ᑎᐹᑐᑕᒶᒃ ᒥᓯᐌ ᑭᒋᒪᓂᑐᐗ ᑳ ᑮ ᑐᑕᒫᑯᒋᒃ, ᓀᔥᑕ ᑳ ᐃᔑ ᐋᐸᐊᒪᐙᑦ ᑖᐯᔦᓕᑕᒧᐎᓂ ᐃᔥᒀᑌᒥᓕᐤ ᐊᓂᐃ ᒉᓐᑖᐃᓚ᙮ 28ᐊᓐᑕ ᒫᑲ ᑭᓉᔥ ᑮ ᐎᒋᑕᔑᑫᒬᐊᒃ ᐊᓂᐃ ᑭᔅᑭᓄᐊᒪᐗᑲᓇ᙮
Currently Selected:
ᐊᐸᔅᑕᓚᒃ 14: MCNT91
Highlight
Copy
Compare
Share
Want to have your highlights saved across all your devices? Sign up or sign in
The text of the Bible in Moose Cree is in the public domain.
Moose Cree New Testament © Canadian Bible Society, 1991.
