ᐊᐸᔅᑕᓚᒃ 12
12
ᐅᑖᐺᑕᒧᐗᒃ ᑲᒀᑕᑭᐋᑲᓂᐎᐗᒃ ᒥᓇ
1ᓈᓐᑕᐤ ᐊᓂᒪ ᐃᔅᐱ ᒫᑲ ᐦᐁᕋᑦ ᑳ ᑭᒋᐅᑭᒫᐎᑦ ᑮ ᔓᐎᓂᔅᑫᓕᐤ ᑭᒋ ᒥᑯᔅᑳᒋᐋᑦ ᐋᑎᑦ ᐊᓂᐃ ᒫᒪᐎᐋᔭᒥᐋᐗ᙮ 2ᑮ ᓂᐸᐁᐤ ᒫᑲ ᒉᒻᓴ ᒑᓐ ᐎᒋᔕᓂᓕᐗ ᔑᒫᑲᓂᓕᐤ ᐅᒋ᙮ 3ᐁ ᐙᐸᑕᒃ ᒫᑲ ᐁ ᓇᐁᓕᑕᒥᐃᑯᒋᒃ ᒎᐗᒃ, ᐊᐙᓯᑌ ᑮ ᑐᑕᒻ ᐱᑕᕋ ᓀᔥᑕ ᐁ ᐅᑎᓈᑦ᙮ ᐁᑯᔅᐱ ᐁᐗᒀᓂᐃ ᐁᑳ ᐁ ᐅᐱᓱᑦ ᐊᓚᑯᓇᐤ ᑭᔑᑳᐗ᙮ 4ᐃᔅᐱ ᒫᑲ ᑳ ᑮ ᐅᑎᑎᓈᑦ, ᑮ ᐸᑭᑎᓀᐤ ᑭᐹᐅᑐᐎᑲᒥᑯᒃ, ᑮ ᐸᑭᑎᓇᒪᐌᐤ ᒫᑲ ᓀᐗᐤ ᐁᓇᓀᐎᓕᒋ ᒫᔑᑫᐎᓕᓕᐗ ᑭᒋ ᑲᓇᐌᓕᒥᑯᓕᒋ, ᐁ ᐃᑌᓕᑕᒃ ᑭᐃᔥᑾ ᐃᔅᑕᕐ ᑭᒋ ᐯᒋ ᐗᓚᐎᑕᑐᐗᑦ ᐊᓂᐃ ᐃᓕᓕᐗ᙮ 5ᐁᐗᑯ ᐅᒋ ᐱᑕᕐ ᑮ ᑭᐸᐙᑲᓂᐎᐤ ᑭᐹᐅᑐᐎᑲᒥᑯᒃ; ᒫᑲ ᒫᒪᐎᐊᔭᒥᐋᐗᒃ ᑕᑭᓀ ᑮ ᓇᓈᑐᒣᐗᒃ ᑭᒋᒪᓂᑐᐗ ᐎᓚ ᐅᒋ᙮
ᐲᑕᕐ ᐸᑭᑎᓈᑲᓂᐎᐤ ᑭᐸᐅᑐᐎᑲᒥᑯᒃ ᐅᒋ
6ᐃᔅᐱ ᒫᑲ ᐦᐁᕋᑦ ᑳ ᐎ ᐯᒋ ᐗᓚᐎᑕᐋᔅᐸᓐ, ᐊᓂᒪ ᐁ ᑎᐱᔅᑳᒃ ᐲᑕᕐ ᑮ ᓂᐸᐤ ᐁ ᐃᑕᐎᔑᓄᔅᑖᑯᑦ ᓂᔓ ᒪᔑᑫᐎᓕᓕᐗ, ᐁ ᒫᒫᒋᑯᐱᓱᑦ ᓂᔓ ᐱᐙᐱᔅᑴᐋᐱᐊ ᐅᒋ; ᐊᓂᑭ ᒫᑲ ᑳ ᑲᓇᐌᓕᑕᑭᒃ ᐗᓚᐎᑎᒥᒃ ᐃᔥᒀᑌᒥᒃ ᑮ ᑲᓇᐌᓕᑕᒶᒃ ᑭᐹᐅᑐᐎᑲᒥᑯᓕᐤ᙮ 7ᒫᑎᑲ, ᒫᑲ ᐅᑎᐯᓕᒋᑫᐤ ᐅᑦ ᐁᓐᒐᓕᒪ ᑮ ᐯᒋ ᐆᑎᑎᑯᓕᐗ ᐗᔅᑌᐎᓐ ᒫᑲ ᑮ ᐙᓯᑌᓕᐤ ᐱᒋ ᑭᐹᐅᑐᐎᑲᒥᑯᒃ, ᑮ ᐅᑕᒪᐌᐤ ᒫᑲ ᐱᑕᕋ ᐆᔅᐱᑲᓕᒃ, ᑮ ᐸᓯᑯᓀᐤ ᒫᑲ, ᐁ ᐃᑗᑦ, ᑭᓕᐱ ᐗᓂᔥᑲ᙮ ᐅ ᐱᐗᐱᔅᑴᐊᐱᒪ ᒫᑲ ᑮ ᐸᑭᑎᓂᓕᐗ ᐅᒋᒋᒃ ᐅᒋ᙮ 8ᐊᓇ ᐁᓐᒐᓪ ᒫᑲ ᑮ ᐃᑌᐤ, ᐸᑯᑌᐅ, ᐳᔅᑕᔅᑭᓯᓀ ᒫᑲ᙮ ᑮ ᑐᑕᒻ ᒫᑲ᙮ ᑮ ᐃᑌᐤ ᓀᔥᑕ, ᐴᔅᑕᑰᐯ, ᓄᓱᓀᐅᓐ ᒫᑲ᙮ 9ᑮ ᐗᓚᐎᐤ ᒫᑲ, ᓀᔥᑕ ᑮ ᓄᓱᓀᐌᐤ; ᓇᒪᐎᓚ ᒫᑲ ᑮ ᑭᔅᑫᓕᑕᒻ ᑖᐺ ᐁ ᐃᑭᓂᓕᒃ ᐊᓂᐁᓕᐤ ᑳ ᑮ ᑐᑕᒥᓕᒋ ᐊᓂᐃ ᐁᓐᒐᓚ, ᒫᑲ ᓂᑦ ᐃᔑᓀᓐ ᑮ ᐃᑌᓕᑕᒻ᙮ 10ᐃᔅᐱ ᒫᑲ ᑳ ᒥᔮᔥᑲᑭᒃ ᐊᓂᒪ ᓂᔥᑕᒻ ᓀᔥᑕ ᐊᓂᒪ ᓂᔓ ᐃᔥᒀᑌᒻ, ᑮ ᐅᑎᑕᒸᒃ ᐊᓂᒪ ᐱᐙᐱᔅᑯ ᐃᔥᒀᑌᒻ ᑳ ᐗᓚᐎᒧᒃ ᐃᑖᐎᓂᒃ ᐃᔑ; ᐊᓂᒪ ᑎᐱᓚᐌ ᔐᔥᑾᑦ ᑳ ᐸᔅᑭᑌᐸᓕᒃ: ᑮ ᐗᓚᐎᐗᒃ ᒫᑲ, ᓀᔥᑕ ᐁ ᐊᑎ ᑭᑐᑌᒋᒃ ᑮ ᔓᐳᔥᑲᒶᒃ ᐯᔭᒃ ᐱᒧᑌᔅᑲᓈᓕᐤ: ᑣᔦᒃ ᒫᑲ ᐊᓂᐃ ᐁᓐᒐᓚ ᑮ ᓇᑲᑎᑯ᙮
11ᐃᔅᐱ ᒫᑲ ᐱᑕᕐ ᒥᐋᒥᑐᓀᓕᑕᒃ, ᑮ ᐃᑗᐤ, ᐁᑯ ᓂ ᑭᔅᑫᓕᑌᓐ ᑫᒋᓈᔥ ᐅᑎᐯᓕᒋᑫᐤ ᐁ ᑮ ᐃᔑᑎᔕᐙᑦ ᐅᑦ ᐁᓐᒐᓕᒪ, ᐁ ᑮ ᐱᒫᒋᐃᑦ ᒫᑲ ᐦᐁᕋᑕ ᐅᒋᒋᓕᒃ ᐅᒋ, ᓀᔥᑕ ᒥᓯᐌ ᒎᐎ ᐃᓕᓕᐗ ᐁ ᐃᔑ ᓇᑕᐌᓕᑕᒥᓕᒋ ᐅᒋ᙮
12ᐃᔅᐱ ᒫᑲ ᐅᒪ ᑳ ᒫᒥᑐᓂᓕᑕᒃ, ᑮ ᐯᒋ ᐃᑐᑌᐤ ᐊᓐᑕ ᒣᕆᐊ ᐎᑭᓕᒃ ᐅᑳᐎᔭ ᐊᓇ ᒑᓐ, ᑳ ᐊᔅᐱᓂᑳᓱᑦ ᒪᕐᒃ; ᐃᑕ ᒥᒉᑦ ᑳ ᒫᒪᐎ ᒫᐗᒋᐃᑐᓕᒋ ᐁ ᐋᔭᒥᐋᓕᒋ᙮ 13ᒣᒀᒡ ᒫᑲ ᐱᑕᕐ ᑳ ᐹᐹᐗᐊᒃ ᐃᔥᒀᑌᒥᓕᐤ, ᐅᔥᑭᓂᑭᔅᑴᐤ ᑮ ᐯᒋ ᐃᑐᑌᐤ ᑭᒋ ᓇᑐᑕᒃ ᕈᑕ ᐁ ᐃᔑᓂᑳᓱᑦ᙮ 14ᐃᔅᐱ ᒫᑲ ᓀᓯᑐᑕᐙᑦ ᐱᑕᕋ, ᓇᒪᐎᓚ ᐅᒋ ᐋᐸᐊᒻ ᐃᔥᒀᑌᒥᓕᐤ ᐁ ᐃᔅᐱᒋ ᓯᑭᓓᓯᑦ, ᒫᑲ ᑮ ᐱᑐᑫᐸᑖᐤ, ᓀᔥᑕ ᑮ ᐎᑕᒻ ᐱᑕᕋ ᐁ ᓂᐸᐎᓕᒋ ᐅᑎᔥᑲᐤ ᐃᔥᒀᑌᒥᒃ᙮ 15ᑮ ᐃᑌᐙᒃ ᒫᑲ, ᑭ ᑭᔥᒀᓐ᙮ ᒫᑲ ᐋᒋᐱᑯ ᑮ ᐋᔨᒋ ᐃᑗᐤ ᐁ ᑖᐺᑦ᙮ ᐁᑯ ᑳ ᐃᑗᒋᒃ, ᐁᐗᒀᓂᐃ ᐅᑦ ᐁᓐᒐᓕᒪ᙮
16ᐱᑕᕐ ᒫᑲ ᑫᔮᐸᒡ ᑮ ᐹᐹᐗᐃᑫᐤ: ᐃᔅᐱ ᒫᑲ ᑳ ᑮ ᐋᐸᐊᑭᒃ ᐃᔥᒀᑌᒥᓕᐤ, ᓀᔥᑕ ᐎᐋᐸᒫᒋᒃ, ᑮ ᒫᒪᔅᑳᑌᓕᑕᒶᒃ᙮ 17ᐎᓚ ᒫᑲ, ᐁ ᐙᐙᔅᑎᓇᒪᐗᑦ ᐅᒋᒋ ᐅᒋ ᐁᑳ ᑭᒋ ᑭᑐᓕᒋ, ᑮ ᐙᐎᑕᒪᐌᐤ ᑖᓂ ᑳ ᐃᔑ ᐙᓚᐎᑕᐃᑯᑦ ᐅᑎᐯᓕᒋᑫᐗ ᑭᐹᐊᑐᐎᑲᒥᑯᒃ ᐅᒋ᙮ ᑮ ᐃᑌᐤ ᒫᑲ, ᑭᑐᑌᒃ, ᐙᐸᑎᓕᒃ ᒉᒻᔅ ᐅᐅ ᑫᒀᓇ, ᓀᔥᑕ ᐊᓂᑭ ᑭᒋᔖᓂᓇᐗᒃ᙮ ᑮ ᑭᑐᑌᐤ ᒫᑲ, ᓀᔥᑕ ᐱᑐᔥ ᐃᑕ ᑮ ᐃᑐᑌᐤ᙮
18ᐁᑯ ᐎᐸᒡ ᑳ ᐊᑎ ᑭᔑᑳᒃ, ᓇᒪᐎᓚ ᐋᐱᔑᔥ ᑮ ᒥᑯᔥᑳᑌᓕᑕᒶᒃ ᒫᔑᑫᐎᓕᓕᐗᒃ ᑖᓂ ᑳ ᐃᑎᓕᒋ ᐊᓂᐃ ᐱᑕᕋ᙮ 19ᐃᔅᐱ ᒫᑲ ᐦᐁᕋᑦ ᑳ ᑮ ᓈᓈᑐᓇᐙᑦ, ᐁᑳ ᒫᑲ ᐁ ᒥᔅᑲᐙᑦ, ᑮ ᑳᑴᒋᐁᐤ ᐊᓂᐃ ᑳ ᑲᓇᐌᓕᒥᑯᓕᑭ, ᑮ ᐅᓚᔓᐌᐤ ᒫᑲ ᑭᒋ ᓂᐸᐊᑲᓂᐎᓕᒋ᙮
ᐁ ᑭᑐᑌᑦ ᒫᑲ ᒎᑎᐊᐃᒃ ᐅᒋ ᓯᓴᕆᐊᐃᒃ ᑮ ᐃᑐᑌᐤ, ᐁᑯᑕ ᒫᑲ ᑳ ᑕᔑᑫᑦ᙮
ᐅᓂᐱᐎᓐ ᐦᐁᕋᑦ
20ᐦᐁᕋᑦ ᒫᑲ ᓈᔅᐱᒡ ᑮ ᓇᔦᑕᐌᓕᒣᐤ ᐊᓂᐃ ᑖᐃᕐ ᓀᔥᑕ ᓵᐃᑕᓂᒃ ᑳ ᐃᑖᓕᒋ: ᒫᑲ ᑮ ᐯᒋ ᒫᒪᐎ ᓈᑌᐗᒃ: ᐁ ᑮ ᑐᑕᐙᒋᒃ ᒫᑲ ᑉᓛᔅᑕᔅ ᑭᒋ ᐅᑭᒪᐗ ᐅᑦ ᐊᑐᔅᑫᓛᑲᓂᒪ ᑭᒋ ᐅᑑᑌᒥᒥᑯᒋᒃ, ᑮ ᓇᑕᐌᓕᑕᒶᒃ ᑳᔭᒣᐎᓯᐎᓂᓕᐤ: ᐌᓴ ᐅᑦ ᐊᔅᑭᐗᐤ ᑮ ᐅᒋ ᐱᒫᑕᓐ ᑭᒋᐅᑭᒪᐤ ᐅᑦ ᐊᔅᑭᓕᐤ ᐅᒋ᙮
21ᐯᔭᒀᐤ ᐁ ᑭᔑᑳᒃ ᒫᑲ ᐦᐁᕋᑦ, ᐁ ᑭᑭᔥᑲᒃ ᑭᒋᐅᑭᒫᐎ ᐎᓛᒋᑲᓇ, ᑮ ᐊᐱᐤ ᐅᑦ ᐅᑭᒪᐗᐱᐎᓂᒃ, ᑭᐙᔭᒥᐁᐤ ᒫᑲ᙮ 22ᐊᓂᑭ ᐃᓕᓕᐗᒃ ᒫᑲ ᑮ ᑌᐺᐗᒃ ᐁ ᐃᑗᒋᒃ, ᒪᓂᑐ ᑳ ᐃᑎᑖᑯᓯᑦ, ᓇᒪᔦᐤ ᒫᑲ ᐃᓕᓕᐤ᙮ 23ᑣᔦᒃ ᒫᑲ ᐅᑎᐯᓕᒋᑫᐤ ᐅᑦ ᐁᓐᒐᓕᒪ ᑮ ᐅᑖᒪᐅᑯ, ᐌᓴ ᓇᒪᐎᓚ ᐅᒋ ᒥᓓᐤ ᑭᒋᒪᓂᑐᐗ ᑭᔅᑌᓕᑕᑯᓯᐎᓂᓕᐤ: ᑮ ᒧᐎᑯ ᒫᑲ ᒪᓂᒍᔕ, ᓀᔥᑕ ᑮ ᓂᐱᐤ᙮
24ᒫᑲ ᑭᒋᒪᓂᑐ ᐅᑦ ᐋᔭᒥᐎᓐ ᑮ ᓂᑕᐎᑭᒪᑲᓂᓕᐤ ᓀᔥᑕ ᑮ ᓚᑭᐆᒪᑲᓂᓕᐤ᙮
25ᐹᕐᓇᐸᔅ ᒫᑲ ᓀᔥᑕ ᓵᓪ ᒋᕉᓴᓚᒥᒃ ᑮ ᐅᒋ ᑭᐌᐗᒃ ᐃᔅᐱ ᑳ ᑭᔑᑖᒋᒃ ᐅᑦ ᐃᑖᐸᑎᓯᐎᓂᐗᐤ; ᑮ ᐅᑎᓀᐗᒃ ᑭᒋ ᐎᒉᐎᑯᒋᒃ ᒑᓇ ᑳ ᐊᔅᐱᓂᑳᓱᑦ ᒫᕐᒃ᙮
Currently Selected:
ᐊᐸᔅᑕᓚᒃ 12: MCNT91
Highlight
Copy
Compare
Share
Want to have your highlights saved across all your devices? Sign up or sign in
The text of the Bible in Moose Cree is in the public domain.
Moose Cree New Testament © Canadian Bible Society, 1991.
