ᐊᐸᔅᑕᓚᒃ 11
11
ᑖᓂ ᑳ ᐃᑖᑦ ᐲᑕᕐ ᐅᑖᐺᑕᒧᐗᒃ ᐃᑕ ᒋᕉᓴᓚᒥᒃ
1ᐊᐸᔅᑕᓚᒃ ᒫᑲ ᓀᔥᑕ ᑳ ᐎᒋᔖᓂᑐᒋᒃ ᑳ ᐃᑖᒋᒃ ᒎᑎᐊᐃᒃ ᑮ ᐯᑕᒶᒃ ᐊᓂᐃ ᒉᓐᑖᐃᓚ ᐊᓯᒋ ᐁ ᑮ ᐅᑎᓇᒸᓕᒋ ᑭᒋᒪᓂᑐᐗ ᐅᑦ ᐋᔭᒥᐎᓂᓕᐤ᙮ 2ᐃᔅᐱ ᒫᑲ ᐱᑕᕐ ᑳ ᑕᑯᔑᒃ ᐊᓐᑕ ᒋᕉᓴᓚᒥᒃ ᐊᓂᑭ ᑳ ᑭᔅᑭᓄᐙᒋᔣᑲᓂᐎᒋᒃ ᑮ ᐋᔑᑌᒣᐗᒃ, 3ᐁ ᐃᑗᒋᒃ, ᑭ ᑮ ᐱᑐᑲᐙᐗᒃ ᐃᓕᓕᐗᒃ ᐁᑳ ᑳ ᑭᔅᑭᓄᐙᒋᔣᑲᓂᐎᒋᒃ, ᓀᔥᑕ ᑭ ᑮ ᐎᒋᒥᒋᓱᒫᐗᒃ᙮ 4ᒫᑲ ᐱᑕᕐ ᑮ ᐎᑕᒻ ᐊᓂᒪ ᑳ ᑮ ᐃᑭᒃ ᓃᔥᑕᒻ ᐅᒋ, ᓀᔥᑕ ᐯᔭᑕᒃ ᑮ ᑎᐸᒋᒧᔅᑕᐌᐤ, ᐁ ᐃᑗᑦ,
5ᓂ ᑮ ᐃᑖᓐ ᒐᐸ ᐃᑖᐎᓂᒃ ᐁ ᐋᔭᒥᐋᔮᓐ; ᓀᔥᑕ ᐁ ᐸᐙᒧᒀᒥᔮᓐ ᓂ ᑮ ᐙᐸᑌᓐ ᐙᐸᑎᓕᐌᐎᓐ, ᐯᔭᒃ ᐊᓱᐗᒋᑲᓐ ᐁ ᓛᔑᐸᓕᒃ, ᑖᐱᔅᑯᒡ ᐁ ᒥᔐᑲᒃ ᐊᓚᑲᔥᑫᑭᓐ, ᐁ ᓀᐅ ᑭᑫᔮᒃ ᐁ ᐅᒋ ᓚᔑᓂᑳᑌᒃ ᑭᒋᑭᔑᑯᒃ ᐅᒋ; ᓀᔥᑕ ᐙᐙᒡ ᓂᓚ ᓂ ᑮ ᐯᒋ ᓈᑎᑯᓐ, 6ᐊᓂᒪ, ᐃᔅᐱ ᑳ ᑮ ᑲᓇᐙᐸᑕᒫᓐ ᓂ ᑮ ᒫᒥᑐᓀᓕᑌᓐ, ᓀᔥᑕ ᓂ ᑮ ᐙᐸᒫᐗᒃ ᑳ ᓀᐅᓯᑌᒋᒃ ᐊᐌᓯᓴᒃ ᐊᔅᑭᒃ ᐅᒋ, ᓀᔥᑕ ᑳ ᐋᒀᑎᓱᒋᒃ ᐊᐌᓯᓴᒃ, ᓀᔥᑕ ᑳ ᐸᐱᒥᑖᒋᒧᒋᒃ ᑐᐎᑳᓇᒃ, ᓀᔥᑕ ᐱᓓᓯᐗᒃ ᐃᔥᐱᒥᒃ ᑳ ᐸᐹᒥᓛᒋᒃ᙮ 7ᓂ ᑮ ᐯᑎᓐ ᒫᑲ ᐃᑗᐎᓐ ᐁ ᐃᑎᑯᔮᓐ, ᐸᓯᑯ, ᐱᑕᕐ: ᓂᐸᑖᑫ ᓀᔥᑕ ᒥᒋᓱ᙮ 8ᓂ ᑮ ᐃᑣᓐ ᒫᑲ, ᐁᑯᔑ ᐁᑳ ᑌᐯᓕᒋᑫᔭᓐ; ᐌᓴ ᓇᒪᐎᓚ ᐸᑾᓐᑕᐤ ᑫᒀᓐ ᓀᔥᑕ ᐁᑳ ᑳ ᐸᓓᑲᒃ ᐎᔅᑳᑦ ᑮ ᐱᒋᐸᓕᐤ ᓂᑐᓂᒃ᙮ 9ᒫᑲ ᐃᑗᐎᓐ ᒥᓇ ᓂ ᑮ ᓇᔥᑴᐗᔑᐃᑯᓐ ᑭᒋᑭᔑᑯᒃ ᐅᒋ, ᐊᓂᒪ, ᑭᒋᒪᓂᑐ ᑳ ᑮ ᐸᓓᑭᑖᑦ, ᐁᑳ ᐎᓚ ᒫᓛᑕᓐ ᐃᔑᓂᑳᑕ᙮ 10ᐅᒪ ᒫᑲ ᓂᔅᑡᐤ ᑭ ᑐᒋᑳᑌᐤ, ᐁᑯ ᒥᓇ ᒥᓯᐌ ᑳ ᐃᔅᑯᐱᒋᑳᑌᑭ ᑭᒋᑭᔑᑯᒃ᙮ 11ᒫᑎᑲ, ᒫᑲ ᑣᔦᒃ ᓂᔅᑐ ᐃᓕᓕᐗᒃ ᐋᔕᔾ ᑮ ᑕᑯᔑᓋᒃ ᐊᓐᑕ ᐙᔅᑳᔨᑲᓂᒃ ᑳ ᐃᔑ ᐃᑖᔮᓐ, ᐁ ᐃᔑᑎᔕᐊᒫᑲᐎᔮᓐ ᓯᓴᕆᐊᐃᒃ ᐅᒋ᙮ 12ᐊᒑᒃ ᒫᑲ ᓂ ᑮ ᐃᑎᒃ ᑭᒋ ᐎᒉᐗᑭᒃ, ᐁᑳ ᐁ ᐙᐙᓀᓕᑕᒫᓐ᙮ ᓀᔥᑕ ᐅᑯ ᓂᑯᑣᔅ ᑭᒋᔖᓂᓇᐗᒃ ᓂ ᑮ ᐎᒉᐎᑾᒃ, ᓂ ᑮ ᐱᑐᑳᓈᓐ ᒫᑲ ᐊᓇ ᐃᓕᓕᐤ ᐎᑭᒃ: 13ᓂ ᑮ ᐙᐸᑎᓕᑯᓈᓐ ᒫᑲ ᑳ ᐃᔑ ᐙᐸᒫᑦ ᐁᓐᒐᓚ ᐱᒋ ᐎᑭᒃ, ᑳ ᓂᐸᐎᓕᒋ ᓀᔥᑕ ᑳ ᐃᑎᑯᑦ, ᐃᔑᑎᔕᐅᒃ ᐃᓕᓕᐗᒃ ᐊᓐᑕ ᒐᐸᐃᒃ, ᓇᑐᒻ ᒫᑲ ᓵᐃᒪᓐ ᑳ ᐊᔅᐱᓂᑳᓱᑦ ᐱᑕᕐ; 14ᐊᓇ ᑫ ᐎᑕᒫᔉ ᐋᔭᒥᐎᓇ, ᑫ ᐅᒋ ᐱᒫᒋᐅᔭᓐ ᑭᓚ ᓀᔥᑕ ᒥᓯᐌ ᑭᑭᒃ ᑳ ᐃᑕᔑᔭᓐ᙮ 15ᒣᒀᒡ ᒫᑲ ᐁ ᒫᒋ ᐋᔭᒥᔮᓐ, ᐸᓓᑭ ᐊᒑᑾ ᑮ ᐅᑎᑎᑯᐗᒃ, ᑖᐱᔅᑯᒡ ᑭᓚᓈᓇᐤ ᐅᔅᑲᒡ᙮ 16ᐁᑯ ᑫᔅᑭᓯᔮᓐ ᐅᑎᐯᓕᒋᑫᐤ ᐅᑦ ᐋᔭᒥᐎᓐ, ᑳ ᐃᔑ ᐃᑗᑦ, ᒑᓐ ᑖᐺ ᓂᐱ ᐅᒋ ᑮ ᓯᑲᐊᑖᑫᐤ; ᒫᑲ ᑭᓚᐗᐤ ᑳ ᐹᓓᑭᓯᑦ ᐊᒑᒃ ᑭ ᑳ ᐅᒋ ᓯᑲᐊᑖᑳᐎᓇᐗᐤ᙮ 17ᐁᐗᑯᒪ ᐅᒋ ᑭᒋᒪᓂᑐ ᐁ ᑮ ᒥᓛᑦ ᐁ ᐯᔭᑾᓂᓕᒃ ᒥᓕᐌᐎᓂᓕᐤ ᑖᐱᔅᑯᒡ ᑳ ᑮ ᑐᑖᑕᒃ ᑭᓚᓈᓇᐤ, ᐃᔅᐱ ᑳ ᑖᐺᔦᓕᒪᒃ ᐅᑎᐯᓕᒋᑫᐤ ᒋᓴᔅ ᙭; ᐊᐌᓇ ᒫᑲ ᓂᓚ, ᑫ ᑮ ᓇᔅᑯᔅᑕᐗᑭᐸᓐ ᑭᒋᒪᓂᑐ?
18ᐃᔅᐱ ᐱᐯᑕᑭᒃ ᐅᐅ ᑫᒀᓇ, ᑭ ᑭᐱᑐᐌᐗᒃ, ᑮ ᑭᔅᑕᒋᒣᐗᒃ ᒫᑲ ᑭᒋᒪᓂᑐᐗ ᐁ ᐃᑗᒋᒃ, ᐁᑴᒋᑲ ᑭᒋᒪᓂᑐ ᓀᔥᑕ ᑳ ᒥᓛᑦ ᐊᓂᐃ ᒉᓐᑖᐃᓚ ᑴᔅᑳᑎᓯᐎᓂᓕᐤ ᐱᒫᑎᓯᐎᓂᒃ ᐃᔑ᙮
ᐅᑖᐺᑕᒧᐗᒃ ᐊᓐᑕ ᐋᓐᑎᐊᑭᒃ
19ᐁᑯ ᐊᓂᑭ ᑳ ᑮ ᐗᓴᓶᑎᔕᐙᑲᓂᐎᒋᒃ ᐊᓂᒪ ᑲᒀᑕᑭᐃᐌᐎᓐ ᑳ ᑮ ᐃᑭᒃ ᐊᓇ ᔅᑎᐱᓐ ᐅᒋ, ᑮ ᐃᑐᑌᐗᒃ ᐱᓇᐃᓯᐃᒃ ᐃᔅᑯ, ᓀᔥᑕ ᓵᐃᑉᕋᓯᒃ, ᓀᔥᑕ ᐋᓐᑎᐊᑭᒃ, ᐁᑳ ᐊᐌᓕᐗ ᐁ ᑲᑫᔅᑭᒫᒋᒃ ᐋᔭᒥᐎᓂᓕᐤ ᐱᑯ ᐊᓂᐃ ᒎᐗ᙮ 20ᐋᑎᑦ ᒫᑲ ᐁ ᐃᑕᓯᒋᒃ ᑮ ᓵᐃᑉᕋᓯᐎᓕᓕᐎᐗᒃ ᓀᔥᑕ ᓴᐃᕆᓂᐎᓕᓕᐎᐗᒃ, ᐊᓂᑭ, ᐃᔅᐱ ᑳ ᑕᑯᔑᑭᒃ ᐊᓐᑎᐊᑭᒃ, ᑮ ᐋᔭᒥᐁᐗᒃ ᐊᓂᐃ ᒃᕆᓯᐊᓇ, ᐁ ᑲᑫᔅᑭᒥᐌᒋᒃ ᐅᑎᐯᓕᒋᑫᐗ ᒋᓴᓴ᙮ 21ᐅᑎᐯᓕᒋᑫᐤ ᐅᒋᒋᓕᐤ ᒫᑲ ᑮ ᐎᒋᐃᑯᐗᒃ: ᓈᔅᐱᒡ ᒥᒉᑦ ᒫᑲ ᑮ ᑖᐺᑕᒶᒃ, ᓀᔥᑕ ᑮ ᑴᔅᑲᑎᓯᔅᑕᐌᐗᒃ ᐅᑎᐯᓕᒋᑫᐗ᙮
22ᐁᑯ ᐁ ᑎᐹᑐᒋᑲᑌᑭ ᐅᐅ ᑫᒀᓇ ᑮ ᐯᑕᒶᒃ ᒫᒪᐎᐋᔭᒥᐋᐗᒃ ᒋᕉᓴᓚᒥᒃ ᑳ ᐃᑖᒋᒃ: ᓀᔥᑕ ᑭ ᑭᒋᑎᔕᐌᐗᒃ ᐸᕐᓇᐸᓴ ᑭᒋ ᐃᑐᑌᓕᒋ ᐊᓐᑎᐊᑭᒃ ᐃᔅᑯ᙮ 23ᐊᓇ, ᐃᔅᐱ ᑳ ᑕᑯᔑᒃ, ᓀᔥᑕ ᑳ ᑮ ᐙᐸᑕᒸᑦ ᑭᒋᒪᓂᑐᐗ ᐅ ᔕᐌᓕᒋᑫᐎᓂᓕᐤ, ᑮ ᓯᑭᓓᓯᐤ, ᓀᔥᑕ ᑮ ᑲᑫᔅᑭᒣᐤ ᒥᓯᐌ, ᐅᑌᐃᓕᒃ ᐅᒋ ᑭᒋ ᒥᒋᒥᓈᓕᒋ ᐅᑎᐯᓕᒋᑫᐗ᙮ 24ᐌᓴ ᑮ ᒥᓗ ᐃᓕᓕᐎᐤ, ᓀᔥᑕ ᑮ ᓵᑲᔅᑭᓀᔅᑳᑯ ᐸᓓᑭ ᐊᒑᑾ ᓀᔥᑕ ᑖᐺᔦᓕᑕᒧᐎᓂᓕᐤ: ᒥᒉᑦ ᒫᑲ ᐃᓕᓕᐗ ᑮ ᑕᑯᑕᒪᐙᑲᓂᐎᐤ ᐅᑎᐯᓕᒋᑫᐤ᙮
25ᐁᑯ ᑫᑐᑌᑦ ᐸᕐᓇᐸᔅ ᑖᕐᓴᓯᒃ ᐃᔑ, ᑭᒋ ᓇᑐᓇᐙᑦ ᓵᓚ; 26ᐃᔅᐱ ᒫᑲ ᑳ ᑮ ᒥᔅᑲᐙᑦ, ᑮ ᐯᔑᐌᐤ ᐊᓐᑕ ᐊᓐᑎᐊᑭᒃ᙮ ᑮ ᐃᑭᓐ ᒫᑲ ᒥᑐᓂ ᐯᔭᑾᐤ ᐁ ᐱᐳᒃ ᑮ ᒫᐗᒋᐃᑐᐗᒃ ᐊᓯᒋ ᒫᒪᐎᐋᔭᒥᐋᐗ, ᓀᔥᑕ ᑮ ᑭᔅᑭᓄᐊᒪᐌᐗᒃ ᒥᒉᑦ ᐃᓕᓕᐗ᙮ ᑭᔅᑭᓄᐊᒪᐗᑲᓇᒃ ᒫᑲ ᓃᔥᑕᒻ ᒃᕆᔅᑎᔮᓇᒃ ᑮ ᐃᔑᓂᑲᑖᑲᓂᐎᐗᒃ ᐊᓐᑕ ᐊᓐᑎᐊᑭᒃ᙮
27ᒣᒀᒡ ᒫᑲ ᐅᐅ ᑭᔑᑳᐗ ᑮ ᐯᒋ ᐃᑐᑌᐗᒃ ᐅᑭᔅᑭᐗᐃᑫᐗᒃ ᐊᓐᑎᐊᑭᒃ ᒋᕉᓴᓚᒥᒃ ᐅᒋ᙮ 28ᑭ ᐸᓯᑯ ᒫᑲ ᐯᔭᒃ ᐁ ᐃᑕᓯᒋᒃ ᐋᑲᐸᔅ ᑳ ᐃᔑᓂᑳᓱᑦ, ᑮ ᐎᑕᒻ ᒫᑲ ᐊᒑᑾ ᐅᒋ, ᓈᔅᐱᒡ ᑭᒋ ᑲᐗᑲᑖᓂᐗᓂᓕᒃ ᒥᓯᐌ ᐁ ᐃᔥᐱᔖᒃ ᐊᔅᑭᒃ: ᐊᓂᒪ ᑳ ᑮ ᐃᑭᓂᓕᒃ ᒣᒀᒡ ᐅ ᑭᔑᑳᒪ ᒃᓚᑎᐊᔅ ᓯᓴᕐ᙮ 29ᐁᑯ ᑭᔅᑭᓄᐊᒪᐙᑲᓇᒃ, ᒥᓯᐌ ᑕᑐ ᐃᓕᓕᐤ ᐁ ᐃᔑ ᑲᔥᑭᑖᑦ, ᑮ ᐃᑌᓕᑕᒶᒃ ᑭᒋ ᐃᔑᑎᔕᐊᒪᐙᒋᒃ ᐅᒋᔅᑕᒫᑫᐎᓂᓕᐤ ᐊᓂᐃ ᑳ ᐎᒋᔕᓂᑐᓕᒋ ᒎᑎᐊᐃᒃ ᑳ ᐃᑖᓕᒋ: 30ᐊᓂᐁᓕᐤ ᓀᔥᑕ ᑳ ᑮ ᑐᑕᑭᒃ, ᑮ ᐃᔑᑎᔕᐊᒪᐌᐗᒃ ᒫᑲ ᐊᓂᐃ ᑳ ᓂᑳᓀᓕᑖᑯᓯᓕᒋ ᐅᒋᒋᐙᒃ ᐅᒋ ᐊᓂᑭ ᐸᕐᓇᐸᔅ ᓀᔥᑕ ᓵᓪ᙮
Currently Selected:
ᐊᐸᔅᑕᓚᒃ 11: MCNT91
Highlight
Copy
Compare
Share
Want to have your highlights saved across all your devices? Sign up or sign in
The text of the Bible in Moose Cree is in the public domain.
Moose Cree New Testament © Canadian Bible Society, 1991.
