ᐊᐸᔅᑕᓚᒃ 10
10
ᐱᑕᕐ ᓇᑕᐙᐸᒣᐤ ᑲᕐᓃᓕᔭᓴ
1ᑮ ᐃᑖᐤ ᐯᔭᒃ ᐃᓕᓕᐤ ᐊᓐᑕ ᓯᓴᕆᐊᐃᒃ, ᑲᕐᓂᓕᔭᔅ ᐁ ᐃᔑᓂᑳᓱᑦ, ᐅ ᓇᑐᐸᓕᐎ ᐅᑭᒫᒥᐗᐗ ᐊᓂᑭ ᐃᑕᓕᔭᓐ ᓇᑐᐸᓕᐎᓕᓕᐗᒃ ᑳ ᐃᔑᓂᑲᓱᒋᒃ᙮ 2ᐁ ᐋᔭᒥᐁᐙᑎᓯᑦ ᐃᓕᓕᐤ, ᓀᔥᑕ ᐊᐌᓇ ᑳ ᓇᓂᒔᔅᑕᐙᑦ ᑭᒋᒪᓂᑐᐗ ᐊᓯᒋ ᒥᓯᐌ ᑳ ᐃᑕᔑᑦ ᐎᑭᒃ, ᒥᔅᑕᐃ ᒥᓕᐌᐎᓇ ᑳ ᒥᓛᑦ ᐃᓕᓕᐗ, ᓀᔥᑕ ᒧᔕᒃ ᑳ ᐋᔭᒥᐁᔅᑕᐙᑦ ᑭᒋᒪᓂᑐᐗ᙮ 3ᑮ ᐙᐸᒣᐤ ᐸᐙᒧᐎᓂᒃ ᓈᓐᑕᐤ ᔖᑭᑖᑦ ᑎᐸᐃᑲᓐ ᐱᓯᒧᑳᓂᒃ ᐁ ᑭᔑᑳᓕᐤ ᐯᔭᒃ ᑭᒋᒪᓂᑐ ᐅᑦ ᐁᓐᒐᓕᒪ ᐁ ᐯᒋ ᐱᑐᑳᑯᑦ, ᓀᔥᑕ ᐁ ᐃᑎᑯᑦ, ᑲᕐᓂᓕᔭᔅ᙮
4ᐃᔅᐱ ᒫᑲ ᑳ ᑲᓇᐙᐸᒫᑦ, ᑮ ᓭᑭᓯᐤ, ᓀᔥᑕ ᑭ ᐃᑗᐤ, ᑫᒀᓐ, ᑌᐯᓕᒋᑫᔭᓐ?
ᑮ ᐃᑎᑯ ᒫᑲ, ᑭᑦ ᐊᔭᒥᐋᐎᓇ ᓀᔥᑕ ᑭ ᒥᓕᐌᐎᓇ ᑮ ᐯᒋ ᐅᑎᒋᐸᓕᐗ ᑭᒋ ᑭᔅᑭᓯᑐᒋᑲᑌᑭ ᐅᑎᔥᑲᐤ ᑭᒋᒪᓂᑐ᙮ 5ᐊᓄᒡ ᒫᑲ ᐃᔑᑎᔕᐅᒃ ᐃᓕᓕᐗᒃ ᐊᓐᑕ ᒐᐸᐃᒃ, ᓇᑐᒻ ᒫᑲ ᓵᐃᒪᓐ, ᑳ ᐊᔅᐱᓂᑳᓱᑦ ᐱᑕᕐ: 6ᐎᒋᑕᔑᑫᒣᐤ ᐊᐌᓕᐗ ᓵᐃᒪᓐ ᐅᐸᔅᑴᑭᓄᑫᐗ, ᐊᓇ ᐅ ᐎᑭᓕᐤ ᔑᔓᑌᐤ ᐎᓂᐯᑯᒃ ᑳ ᐃᑕᑾᓂᓕᒃ: ᐎᓚ ᑭ ᑳ ᐎᑕᒫᒃ ᑫᒀᓐ ᑫ ᑐᑕᒪᐸᓐ᙮ 7ᐃᔅᐱ ᒫᑲ ᐁᓐᒐᓪ ᑳ ᐋᔭᒥᐊᑦ ᑲᕐᓂᓕᔭᓴ ᑳ ᑭᑐᑌᑦ, ᑮ ᓇᑐᒣᐤ ᓂᔓ ᑎᐱᓚᐌ ᐅᑦ ᐊᑐᔅᑫᓛᑲᓂᒪ, ᓀᔥᑕ ᐯᔭᒃ ᑳ ᐋᔭᒥᐁ ᐋᑎᓯᓕᒋ ᓇᑐᐸᓕᐎᓕᓕᐗ ᐊᓂᐃ ᐅᒋ ᑕᑭᓀ ᑳ ᐊᑐᔅᑳᑯᑦ; 8ᐃᔅᐱ ᒫᑲ ᑳ ᑮ ᐎᑕᒪᐗᑦ ᒥᓯᐌ ᐅᐅ ᑫᒀᓇ, ᑮ ᐃᔑᑎᔕᐌᐤ ᐊᓐᑕ ᒐᐸᐃᒃ᙮
9ᐎᔮᐸᒃ ᒫᑲ, ᒣᒀᒡ ᐁ ᐊᑎ ᐱᒧᑌᒋᒃ, ᓀᔥᑕ ᐁ ᐊᑎ ᐯᔣᐸᑕᑭᒃ ᐃᑖᐎᓂᓕᐤ, ᐱᑕᕐ ᑮ ᑯᔅᐹᑕᐎᐤ ᑕᑯᒡ ᐙᔅᑳᔨᑲᓂᒃ ᑭᒋ ᐋᔭᒥᐋᑦ, ᓈᓐᑕᐤ ᓂᑯᑣᔅ ᑎᐸᐃᑲᓐ ᐱᓯᒧᑳᓂᒃ: 10ᓈᔅᐱᒡ ᒫᑲ ᑮ ᐎ ᒥᒋᓱ, ᓀᔥᑕ ᑲᑕ ᑮ ᒥᒋᓱᐳᓐ: ᒫᑲ ᒣᒀᒡ ᐁ ᐗᐌᓚᔅᑕᓕᑭ, ᑮ ᐊᑎ ᐃᔑᓇᐌᐤ᙮ 11ᑮ ᐙᐸᑕᒻ ᒫᑲ ᑭᒋᑭᔑᑯᓕᐤ ᐁ ᐸᔅᑭᑌᓂᑲᑌᓕᒃ, ᓀᔥᑕ ᐯᔭᒃ ᐊᓱᐗᒋᑲᓂᓕᐤ ᐁ ᐯᒋ ᓛᔑᔥᑖᑯᑦ, ᑖᐱᔅᑯᒡ ᐁ ᒥᔐᑲᒃ ᐅᓚᑲᔥᑫᑭᓐ ᐁ ᐃᔑᓈᑾᓂᓕᒃ, ᐁ ᐊᐱᑲᑌᒃ ᐁ ᓀᐅ ᑭᑫᔮᒃ, ᓀᔥᑕ ᑮ ᓛᔑᓂᑲᑌᓕᐤ ᐊᔅᑭᒃ; 12ᐁᑯᑕ ᑳ ᐃᑖᒋᒃ ᒥᓯᐌ ᓇᓈᑲᐤ ᐊᐌᓯᓴᒃ ᑳ ᓀᐅᑳᑌᒋᒃ ᐊᔅᑭᒃ ᑳ ᐃᑖᒋᒃ, ᓀᔥᑕ ᑳ ᐋᒀᑎᓯᒋᒃ ᐊᐌᓯᓴᒃ, ᓀᔥᑕ ᑳ ᐸᐱᒥᑖᒋᒧᒋᒃ ᑐᐎᑳᓇᒃ, ᓀᔥᑕ ᐱᓓᓯᐙᒃ ᐃᔥᐱᒥᒃ ᑳ ᐸᐸᒥᓚᒋᒃ᙮ 13ᑮ ᐯᒋ ᐅᑎᑎᑯ ᒫᑲ ᐃᑗᐎᓂᓕᐤ ᐁ ᐃᑎᑯᑦ, ᐗᓂᔥᑳ ᐱᑕᕌ, ᓂᐹᑖᑫ ᒥᒋᓱ ᒫᑲ᙮
14ᒫᑲ ᐱᑕᕐ ᑮ ᐃᑗᐤ, ᓇᒪᐎᓚ ᐁᑯᔑ, ᑌᐯᓕᒋᑫᔭᓐ; ᐌᓴ ᓇᒪᐎᓚ ᐎᔅᑳᑦ ᓂ ᑮ ᒥᒋᓐ ᑫᒀᓐ ᐸᑾᓐᑕᐤ ᑳ ᐃᑌᓕᑖᑾᒃ, ᓀᔥᑕᐱᑯ ᐁᑳ ᑳ ᐸᓓᑲᒃ᙮
15ᐃᑗᐎᓐ ᒫᑲ ᑮ ᐃᑎᑯ ᒥᓇ ᐁᑯ ᓂᔡᐤ, ᐊᓂᒪ ᑭᒋᒪᓂᑐ ᑳ ᐸᓓᑭᑖᑦ, ᐁᑳᐎᓚ ᒫᓛᑕᓐ ᐃᔑᓂᑳᑕ᙮ 16ᐅᒪ ᓂᔅᑡᐤ ᑮ ᑐᒋᑳᑌᐤ: ᓀᔥᑕ ᐊᓂᒪ ᐊᓱᐗᒋᑲᓐ ᒥᓇ ᑮ ᐅᑎᓂᑳᑌᐤ ᑭᒋᑭᔑᑯᒃ ᐃᔑ᙮
17ᐁᑯ ᒣᒀᒡ ᐱᑕᕐ ᑳ ᐙᐙᓀᓕᑕᒥᐃᑎᓱᑦ ᑖᓂ ᐁᑌᓕᑖᑾᓂᓕᒃ ᐅᒪ ᐸᐙᒧᐎᓐ ᑳ ᑮ ᐋᐸᑕᒃ, ᒫᑎᑲ, ᐊᓂᑭ ᐃᓕᓕᐗᒃ ᑳ ᑮ ᐯᒋᑎᔕᐅᑯᒋᒃ ᑲᕐᓂᓕᔭᓴ ᑮ ᑲᑴᒋᑫᒧᐒᒃ ᓵᐃᒪᓇ ᐅ ᐎᑭᓕᒃ, ᑮ ᓂᐸᐎᐗᒃ ᒫᑲ ᐃᔥᒀᑌᒥᒃ, 18ᓀᔥᑕ ᐁ ᑌᐺᒋᒃ, ᑮ ᑲᑴᒋᑫᒧᐗᒃ ᑮᔥᐱᓐ ᓵᐃᒪᓐ, ᑳ ᐊᔅᐱᓂᑳᓱᑦ ᐱᑕᕐ, ᐊᓐᑕ ᑌᔑᑫᓕᑴ᙮
19ᒣᒀᒡ ᒫᑲ ᐱᑕᕐ ᒥᐋᒥᑐᓀᓕᑕᒃ ᐅᒪ ᐸᐙᒧᐎᓐ, ᐊᒑᑾ ᑮ ᐃᑎᑯ, ᒫᑎᑲ, ᓂᔅᑐ ᐃᓕᓕᐗᒃ ᑮ ᓇᑐᓈᑾᒃ᙮ 20ᐁᐗᑯ ᐅᒋ ᐗᓂᔥᑳ, ᓂᔖᑕᐎ ᒫᑲ, ᓀᔥᑕ ᐎᒉᐎᒃ, ᐁᑳ ᐗᔦᔥ ᐁ ᐃᑌᓕᑕᒪᓐ: ᐌᓴ ᓂ ᑮ ᐯᒋᑎᔕᐙᐗᒃ᙮ 21ᐁᑯ ᐱᑕᕐ ᓂᔮᑖᑦ ᐊᓂᐃ ᐃᓕᓕᐗ ᑳ ᑮ ᐃᔑᑎᔕᐊᒫᑯᑦ ᑳᕐᓂᓕᔭᓴ; ᓀᔥᑕ ᑮ ᐃᑌᐤ, ᒫᑎᑲ, ᓂᓚ ᐁᐗᑯ ᑳ ᓇᑑᓇᐌᒃ: ᑫᒀᓐ ᒫᑲ ᐌᒋ ᐯᒋ ᐃᑐᑌᔦᒃ᙮
22ᑮ ᐃᑗᐗᒃ ᒫᑲ, ᑳᕐᓂᓕᔭᔅ ᑳ ᓇᑐᐸᓕᐎ ᐅᑭᒫᐎᑦ, ᒀᔭᔉ ᑳ ᐃᑎᑦ ᐃᓕᓕᐤ, ᓀᔥᑕ ᐊᐌᓇ ᑳ ᓇᓂᒋᔅᑕᐙᑦ ᑭᒋᒪᓂᑐᐗ, ᓀᔥᑕ ᑳ ᒥᓨᒋᒥᑯᑦ ᒥᓯᐌ ᒫᒪᐤ ᐁ ᑕᑐᔅᑲᓀᓯᓕᒋ ᐊᓂᐃ ᒎᐗ, ᑮ ᐎᑕᒫᑯ ᑭᒋᒪᓂᑐᐗ ᐸᓓᑭ ᐁᓐᒐᓚ ᐅᒋ, ᑭᒋ ᓇᑐᒥᔉ ᐊᓐᑕ ᐅ ᐎᑭᓕᒃ, ᑭᒋ ᐯᑕᒃ ᒫᑲ ᐋᔭᒥᐎᓇ ᑭᓚ ᐅᒋ᙮ 23ᐁᑯ ᑳ ᐱᑐᑫ ᓇᑐᒫᑦ, ᓀᔥᑕ ᑮ ᐎᒋᑕᔑᑫᒥᑯ᙮
ᐎᐋᐸᒃ ᒫᑲ ᐱᑕᕐ ᑮ ᐎᒉᐌᐤ, ᓀᔥᑕ ᐋᑎᑦ ᑳ ᐎᒋᔖᓂᑐᒋᒃ ᒐᐸᐃᒃ ᐅᒋ ᑭ ᐎᒉᐎᑯ᙮ 24ᒥᓇ ᒫᑲ ᐎᐋᐸᒃ ᑮ ᐱᑐᑫᐗᒃ ᓯᓴᑎᐊᐃᒃ᙮ ᑳᕐᓂᓕᔭᔅ ᒫᑲ ᑮ ᐯᐁᐤ, ᓀᔥᑕ ᑮ ᓇᑐᒣᑯᐸᓐ ᐅ ᐙᑯᒫᑲᓇ ᓀᔥᑕ ᐯᔓᒋ ᑳ ᐙᑯᒫᑦ᙮ 25ᒣᒀᒡ ᒫᑲ ᐱᑕᕐ ᑳ ᐯᒋ ᐱᑐᑫᑦ, ᑳᕐᓂᓕᔭᔅ ᑮ ᓇᑭᔥᑲᐌᐤ, ᑮ ᐸᑭᔑᓐ ᒫᑲ ᐅᓯᑎᓕᒃ, ᓀᔥᑕ ᑮ ᓇᐗᑮᔅᑕᐌᐤ᙮ 26ᒫᑲ ᐱᑕᕐ ᑮ ᐸᓯᑯᓀᐤ, ᐁ ᐃᑗᑦ, ᐸᓯᑯ; ᓂᓚ ᓀᔥᑕ ᓂᑦ ᐃᓕᓕᐎᓐ᙮ 27ᒣᒀᒡ ᒫᑲ ᑳ ᐋᔭᒥᐋᑦ, ᑮ ᐱᑐᑫᐤ, ᓀᔥᑕ ᑮ ᒥᔅᑲᐌᐤ ᒥᒉᑦ ᑳ ᑮ ᐯᒋ ᒫᐗᒋᐃᑐᓕᒋ᙮ 28ᑮ ᐃᑌᐤ ᒫᑲ, ᑭ ᑭᔅᑫᓕᑌᓈᐗᐤ ᐁ ᐃᔑ ᓇᔦᑖᐗᒃ ᐃᓕᓕᐤ ᑳ ᒎᐎᑦ ᑭᒋ ᐎᒉᐙᑦ, ᓀᔥᑕᐱᑯ ᑭᒋ ᐱᑐᑲᐙᑦ ᐊᓂᐃ ᐊᔭᒡ ᑳ ᐃᑕᔅᑲᓀᓯᓕᒋ; ᒫᑲ ᑭᒋᒪᓂᑐ ᓂ ᑮ ᐙᐸᑎᓕᒃ ᐁᑳ ᐊᐌᓇ ᐃᓕᓕᐤ ᐋᓉᔦᓕᑖᑯᓯᐤ ᓀᔥᑕ ᓇᒪᐎᓚ ᐸᓓᑭᓯᐤ ᑭᒋ ᐃᑕᒃ᙮ 29ᐁᐗᑯ ᐅᒋ ᑭ ᑮ ᐯᒋ ᓈᑎᑎᓐ ᐁᑳ ᐁ ᐋᓉᑕᒫᓐ, ᑣᔦᒃ ᑳ ᓇᑐᒥᑲᐎᔭᓐ: ᑭ ᑲᑴᒋᑫᒧᓐ ᒫᑲ, ᑫᒀᓐ ᐌᒋ ᑮ ᓇᑐᒥᔦᒃ?
30ᑳᕐᓂᓕᔭᔅ ᒫᑲ ᑮ ᐃᑗᐤ, ᓀᐤ ᑭᔑᑳᐗ ᐊᔅᐱᓐ ᓇᒪᐎᓚ ᓂ ᑮ ᒥᒋᓱᑕᐃ ᐱᓕᔥ ᐅᒪ ᑎᐸᐃᑲᓐ ᐱᓯᒧᑳᓂᒃ: ᓀᔥᑕ ᔖᑭᑕᑦ ᑎᐸᐃᑲᓐ ᐱᓯᒧᑳᓂᒃ ᓂ ᑮ ᐋᔭᒥᐋᓐ ᐱᒋ ᓂᑭᒃ; ᒫᑎᑲ, ᒫᑲ ᐃᓕᓕᐤ ᓂ ᑮ ᐅᑎᔥᑲᐎᑳᐸᐎᔅᑕᒃ ᐁ ᐙᐱᐅᑦ, 31ᑮ ᐃᑗᐤ ᒫᑲ, ᑳᕐᓂᓕᔭᔅ, ᑭᑦ ᐋᔭᒥᐋᐎᓐ ᐯᒋᑳᑌᐤ, ᓀᔥᑕ ᑭ ᒥᓕᐌᐎᓇ ᑭᔅᑭᓯᑐᒋᑳᑌᐗ ᐁ ᐙᐸᑕᒃ ᑭᒋᒪᓂᑐ᙮ 32ᐁᐗᑯ ᐅᒋ ᐃᔑᑎᔕᐅᐌ ᒐᐸᐃᒃ, ᓀᔥᑕ ᓇᑐᒻ ᐅᑕ ᓵᐃᒪᓐ, ᐊᓇ ᑳ ᐊᔅᐱᓂᑳᓱᑦ ᐱᑕᕐ: ᑕᔑᑫᐤ ᐅ ᐎᑭᓕᒃ ᐊᐌᓕᐗ ᓵᐃᒪᓐ ᐅᐸᔅᑴᑭᓄᑫᐗ, ᔑᔓᑌᐤ ᐎᓂᐯᑯᒃ; ᐎᓚ, ᐃᔅᐱ ᑕᑯᔑᑫ, ᑭ ᑳ ᐋᔭᒥᐃᒃ᙮ 33ᑣᔦᒃ ᒫᑲ ᑭ ᑮ ᐃᔑᑎᔕᐊᒫᑎᓐ: ᓀᔥᑕ ᒀᔭᔉ ᑭ ᑮ ᑐᑌᓐ ᐁ ᑕᑯᔑᓂᔭᓐ᙮ ᐊᓄᒡ ᒫᑲ ᒥᓯᐌ ᐅᑕ ᓂᑦ ᐃᑖᓈᓐ ᐅᑎᔥᑲᐤ ᑭᒋᒪᓂᑐ, ᑭᒋ ᐯᑕᒫᒃ ᒥᓯᐌ ᑫᒀᓇ ᑳ ᐃᑕᔓᐙᑎᔉ ᑭᒋᒪᓂᑐ᙮
ᐲᑕᕐ ᑎᐹᒋᒣᐤ ᒋᓴᓴ
34ᐁᑯ ᐱᑕᕋ ᑳ ᐋᐸᐊᒃ ᐅᑐᓐ, ᑮ ᐃᑗᐤ ᒫᑲ, ᑖᐺ ᐃᓴ ᓂ ᐙᐸᑌᓐ ᑭᒋᒪᓂᑐ ᐁᑳ ᐁ ᐹᐱᑐᔥ ᐃᑌᓕᒫᑦ ᐊᐌᓕᐗ: 35ᒫᑲ ᒥᓯᐌ ᐁ ᑕᑐᔅᑲᓀᓯᓕᒋ ᐃᓕᓕᐗ ᐅᒋ ᐊᓂᐃ ᑳ ᓇᓂᒋᔅᑖᑯᑦ, ᓀᔥᑕ ᑳ ᑐᑕᒥᓕᒋ ᒀᔭᔅᑭᑖᑎᓯᐎᓂᓕᐤ, ᐁᐗᒀᓂᐃ ᐌᑎᓈᑦ᙮ 36ᐊᓂᒪ ᐋᔭᒥᐎᓐ ᑭᒋᒪᓂᑐ ᑳ ᑮ ᐃᔑᑎᔕᐊᒪᐙᑦ ᐃᔅᕃᐃᓪ ᐅᑦ ᐊᐙᔑᒥᔕ, ᐁ ᐙᐎᑕᒃ ᑳᔭᒣᓕᑕᒧᐎᓂᓕᐤ ᐎᓚ ᐅᒋ ᒋᓴᔅ ᙭; ᐊᓇ ᒥᓯᐌ ᑳ ᑎᐯᓕᒋᑫᑦ᙮ 37ᐊᓂᒪ ᐋᔭᒥᐎᓐ, ᓂᑦ ᐃᑡᓐ, ᑭ ᑭᔅᑫᓕᑌᓇᐗᐤ ᑳ ᑮ ᑎᐸᑐᒋᑲᑌᒃ ᒥᓯᐌ ᒍᑎᐊᐃᒃ, ᓀᔥᑕ ᑳᓚᓕᒃ ᑳ ᒫᒋ ᐎᒋᑲᑌᒃ, ᐹᑎᒪ ᐊᓂᒪ ᓯᑲᐊᑖᑫᐎᓐ ᒑᓐ ᑳ ᐙᐎᑕᒃ; 38ᑭᒋᒪᓂᑐ ᑳ ᐃᔑ ᑕᒫᔅᑯᓈᑦ ᒋᓴᓴ ᓈᓴᕋᑎᒃ ᑳ ᐅᒌᓕᒋ ᑳ ᐸᓓᑭᓯᓕᒋ ᐊᒑᑾ ᓀᔥᑕ ᓱᑳᑎᓯᐎᓂᓕᐤ ᐅᒋ; ᐊᓇ ᑳ ᐸᐹᐃᑐᑌᑦ ᐁ ᒥᓗᑐᑖᑫᑦ, ᓀᔥᑕ ᐁ ᒥᓇᐙᒋᐋᑦ ᒥᓯᐌ ᐊᓂᐃ ᑳ ᓇᓀᑳᒋᐃᑯᓕᒋ ᒪᒋᒪᓂᑐᐗ: ᐌᓴ ᑭᒋᒪᓂᑐᐗ ᑮ ᐎᒉᐎᑯ᙮ 39ᓂᓚᓈᓐ ᒫᑲ ᓂ ᑎᐹᑐᑌᓈᓐ ᒥᓯᐌ ᑫᒀᓇ ᑳ ᑮ ᑐᑕᒃ, ᑖᐱᔅᑯᒡ ᐅᑦ ᐊᔅᑭᐙᒃ ᒎᐗᒃ, ᓀᔥᑕ ᒋᕉᓴᓚᒥᒃ; ᐊᓇ ᑳ ᑮ ᓂᐸᐃᑯᑦ ᓀᔥᑕ ᑳ ᑮ ᐊᑯᓖᑯᑦ ᒥᔅᑎᑯᒃ᙮ 40ᐎᓚ ᑭᒋᒪᓂᑐ ᑮ ᐗᓂᔥᑲᓀᐤ ᑳ ᓂᔅᑐ ᑭᔑᑳᓕᒃ, ᓀᔥᑕ ᒧᔑᔐ ᑮ ᓄᑯᐁᐤ; 41ᓇᒪᐎᓚ ᒥᓯᐌ ᐃᓕᓕᐗ, ᒫᑲ ᐅᑎᐸᒋᒧᐗ ᓂᔮᑲᓇ ᑳ ᑮ ᐗᐌᓚᐸᒥᑯᓕᒋ ᑭᒋᒪᓂᑐᐗ, ᐙᐙᒡ ᓂᓚᓈᓐ, ᑳ ᑮ ᐎᒋᒥᒋᓱᒪᑭᑦ ᓀᔥᑕ ᐎᒋᒥᓂᑴᒪᑭᑦ ᐸᑎᒪ ᑳ ᐗᓂᔥᑳᑦ ᐅᓂᐱᐗ ᐅᒋ᙮ 42ᓂ ᑮ ᐅᓚᔓᐗᑎᑯᓈᓐ ᒫᑲ ᑭᒋ ᑲᑫᔅᑭᒪᑭᒋᒃ ᐃᓕᓕᐗᒃ, ᓀᔥᑕ ᑭᒋ ᑎᐹᑐᑕᒫᒃ ᐎᓚ ᐁᐗᑯ ᑳ ᑮ ᐊᐌᓛᐸᒥᑯᑦ ᑭᒋᒪᓂᑐᐗ ᑭᒋ ᑎᐸᔅᑯᓈᑦ ᑳ ᐱᒪᑎᓯᓕᑭ ᓀᔥᑕ ᑳ ᓂᐱᓕᒋ᙮ 43ᐎᓚ ᑎᐹᒋᒥᑯ ᒥᓯᐌ ᐅᑭᔅᑭᐗᐃᑫᐗ, ᐎᓚ ᐅᑦ ᐃᔑᓂᑳᓱᐎᓐ ᐅᒋ ᐱᑯ ᐊᐌᓇ ᑫ ᑖᐺᔦᓕᒫᑴ ᑲᑕ ᒥᓛᑲᓂᐎᐤ ᐊᔐᓇᒫᑫᐎᓐ ᒪᒋᑣᐎᓇ ᐅᒋ᙮
ᒉᓐᑖᐃᓚᒃ ᐯ ᓈᑎᑯᐗᒃ ᐸᓓᑭ ᐊᒑᑯ
44ᒣᒀᒡ ᐱᑕᕐ ᑫᔮᐸᒡ ᐁᔭᒥᑦ ᐅᐅ ᐋᔭᒥᐎᓇ, ᐸᓓᑭ ᐊᒑᑾ ᑮ ᐅᑎᑎᑯᐗᒃ ᒥᓯᐌ ᐊᓂᑭ ᑳ ᐯᑕᑭᒃ ᐋᔭᒥᐎᓂᓕᐤ᙮ 45ᐊᓂᑭ ᒫᑲ ᑳ ᑭᔅᑭᓄᐗᒋᔣᑲᓂᐎᒋᒃ ᑳ ᑖᐺᑕᑭᒃ ᑮ ᒫᒪᔅᑲᑕᒶᒃ, ᒥᓯᐌ ᐊᓂᑭ ᑳ ᐯᒋ ᐎᒋᐙᒋᒃ ᐱᑕᕋ, ᐊᓂᑭ ᒉᓐᑖᐃᓚᒃ ᐊᓯᒋ ᐁ ᑮ ᓯᑭᓇᒫᒋᒃ ᐊᓂᒪ ᒥᓕᐌᐎᓐ ᑳ ᐸᓓᑭᓯᑦ ᐊᒑᒃ᙮ 46ᐌᓴ ᑮ ᐯᑕᐌᐗᒃ ᐁ ᐋᔭᒥᓕᒋ ᓇᓈᑲᐤ ᑭᔗᐎᓂᒃ, ᓀᔥᑕ ᐁ ᑭᔅᑖᒋᒫᒋᒃ ᑭᒋᒪᓂᑐᐗ᙮ ᐁᑯ ᓀᔥᑴᐗᔑᐃᐌᑦ ᐱᑕᕐ, 47ᐊᐌᓇ ᐃᓕᓕᐤ ᓈ ᑲᑕ ᑮ ᐅᒋᐃᐌᐤ ᓂᐱᓕᐤ, ᐅᑯ ᐁᑳ ᑭᒋ ᑮ ᓯᑲᐊᑕᐗᑲᓂᐃᒋᒃ, ᑳ ᑮ ᒥᓛᑲᓂᐎᒋᒃ ᐸᓓᑭ ᐊᒑᑾ ᑖᐱᔅᑯᒡ ᑭᓚᓈᓇᐤ? 48ᑮ ᐅᓚᔓᐌᐤ ᒫᑲ ᑭᒋ ᓯᑲᐋᑕᐗᑲᓂᐎᓕᒋ ᐅᑎᐯᓕᒋᑫᐗ ᐅᑦ ᐃᔑᓂᑳᓱᐎᓂᓕᒃ᙮ ᐁᑯ ᓀᑐᑕᒪᐙᒋᒃ ᑭᒋ ᐎᒋᑕᔑᑫᒥᑯᒋᒃ ᐋᑎᑦ ᑭᔑᑳᐗ᙮
Currently Selected:
ᐊᐸᔅᑕᓚᒃ 10: MCNT91
Highlight
Copy
Compare
Share
Want to have your highlights saved across all your devices? Sign up or sign in
The text of the Bible in Moose Cree is in the public domain.
Moose Cree New Testament © Canadian Bible Society, 1991.
