ᓂᔥᑕᒻ ᑎᒧᑎ 3
3
ᑫ ᐃᔑ ᐱᒫᑎᓯᔅᐸᓐ ᑭᒋ ᐊᔭᒥᐁᐎᑭᒪᐤ
1ᐁᐗᑯ ᐅᒪ ᑎᐋᐺᒪᑲᒃ ᐃᑗᐎᓐ: ᑮᔥᐱᓐ ᐊᐌᓇ ᐃᓕᓕᐤ ᓇᑕᐌᓕᑕᑫ ᑭᒋᐋᔭᒥᐁᐎᑭᒪᐤ ᐅᑦ ᐃᑖᐸᑎᓯᐎᓐ, ᓇᑕᐌᓕᑕᒻ ᒥᓗ ᐊᑑᔅᑫᐎᓂᓕᐤ᙮ 2ᑭᒋᐋᔭᒥᐁᐎᑭᒪᐤ ᒫᑲ ᑫᒋᓈᔥ ᑲᑕ ᒥᓗᐃᑌᓕᑖᑯᓯᐤ, ᐁ ᐅ ᓈᐯᒥᒥᑯᑦ ᐯᔭᒃ ᐃᔅᑴᐗ, ᐁ ᑭᓯᓴᐎᓰᑦ, ᐁ ᐯᑳᒡ ᐃᑖᑎᓰᑦ, ᐁ ᒥᓦᑎᓰᑦ ᑭᔐᐙᑐᑕᐙᑦ ᒫᓐᑌᐗ, ᐁ ᑲᔥᑭᑖᑦ ᑭᒋ ᑭᔅᑭᓄᐊᒫᑫᑦ; 3ᐁᑳ ᐁ ᐅᓵᒥᓂᑴᑦ ᔓᒥᓈᐳᓕᐤ, ᐁᑳ ᐁ ᓄᑎᓂᑫᑦ, ᐁᑳ ᐁ ᓵᑭᐋᑦ ᔔᓕᐋᓇ; ᒫᑲ ᐁ ᔑᐱᓚᐌᓯᑦ, ᐁᑳ ᐁ ᒀᓗᑐᑖᑫᑦ, ᐁᑳ ᐁ ᒧᔅᑌᓇᒫᑫᑦ; 4ᐊᐌᓇ ᒀᔭᔉ ᑳ ᑎᐯᓕᑕᒃ ᑎᐱᓚᐌ ᐎᑭ, ᐁ ᑎᐯᓕᒫᑦ ᐅᑦ ᐊᐙᔑᒥᔕ ᒥᓯᐌ ᓕᑆᑳᐙᑎᓯᐎᓂᒃ; 5ᐌᓴ ᑮᔥᐱᓐ ᐊᐌᓇ ᐁᑳ ᑭᔅᑫᓕᑕᒃ ᑫ ᐃᔑ ᑎᐯᓕᑕᒃ ᑎᐱᓚᐌ ᐎᑭ, ᑖᓂ ᑫ ᐃᔑ ᑲᓇᐌᓕᒥᒫᑦ ᑭᒋᒪᓂᑐ ᐅ ᒫᒪᐎᐋᔭᒥᐋᒪ? 6ᐁᑳ ᐊᓄᒋᑫ ᑳ ᑮ ᐯᒋ ᑕᐺᔦᓕᑕᒃ, ᒫᔅᑯᒡ ᐅᑐᑫ ᐁ ᓵᑲᔅᑭᓀᔅᑳᑯᑦ ᑭᔅᑌᓕᒥᑎᓱᐎᓂᓕᐤ, ᑲᑕ ᐸᑭᔑᓐ ᐅ ᓂᔑᐗᓈᒋᒥᐌᐎᓂᓕᒃ ᒪᒋᒪᓂᑐᐗ᙮ 7ᓀᔥᑕ ᒫᑲ, ᑲᑕ ᒥᓗ ᐊᓕᒧᒥᑯ ᐊᓂᐃ ᐗᓚᐎᑎᒥᒃ ᑳ ᐃᑖᓕᒋ, ᒫᔅᑯᒡ ᐅᑐᑫ ᑳᑕ ᐸᑭᔑᓐ ᑭᑐᑎᑯᓯᐎᓂᒃ ᓀᔥᑕ ᐅ ᓇᒀᑲᓂᓕᒃ ᒪᒋᒪᓂᑐᐗ᙮
ᑫ ᐃᔑ ᐱᒫᑎᓯᐗᔅᐸᓐ ᐊᔭᒥᐁᐎᑭᒫᐗᒃ
8ᑖᐱᔅᑯᒡ ᓀᔥᑕ ᑫᒋᓈᔥ ᐋᔭᒥᐁᐎᑭᒪᐗᒃ ᑲᑕ ᓕᑆᑲᐗᒃ, ᐁᑳ ᐁ ᓂᔓᑌᓕᓕᒋᒃ, ᐁᑳ ᒥᔅᑕᐃ ᐁ ᒥᓂᑴᒋᒃ ᔓᒥᓈᐳᓕᐤ, ᐁᑳ ᐁ ᓵᑭᐋᒋᒃ ᔔᓕᐋᓇ; 9ᐁ ᒥᒋᒥᓇᑭᒃ ᐁ ᐃᔑ ᒫᒪᔅᑳᑌᓕᑖᑾᓂᓕᒃ ᑖᐺᔦᓕᑕᒧᐎᓂᓕᐤ ᐸᓓᑭ ᒥᑐᓀᓕᒋᑲᓂᒃ᙮ 10ᐁᑯᔑ ᒫᑲ ᐅᑯ ᓃᔥᑕᒻ ᑲᑕ ᑲᑴᒋᐋᐗᒃ; ᐁᑯᔑ ᒫᑲ ᐁᑯ ᑫ ᐋᐸᒋᑖᒋᒃ ᐋᔭᒥᐁᐎᑭᒪᐤ ᐅᑦ ᐃᑖᐸᑎᓯᐎᓐ, ᐁ ᒥᔅᑲᐙᑲᓂᐎᒋᒃ ᐁ ᒀᔭᔅᑭᑎᒋᒃ᙮ 11ᐁᑯᔑ ᒫᑲ ᑖᐱᔅᑯᒡ ᐎᐎᐙᐗ, ᑫ ᐃᔑ ᓕᑆᑳᓕᒋ, ᐁᑳ ᐁ ᐸᑾᓄᒥᐌᓕᒋ, ᐁ ᐯᑳᒡ ᐃᑖᑎᓯᓕᒋ, ᐁ ᒀᔭᔅᑭᑎᓕᑭ ᒥᓯᐌ ᐃᔑ᙮ 12ᐁᑯᔑ ᒫᑲ ᐋᔭᒥᐁᐎᑭᒪᐗᒃ ᑲᑕ ᐅ ᓈᐯᒥᒥᑯᐗᒃ ᐯᔭᒃ ᐃᔅᑴᐗ, ᐁ ᒥᓓ ᑎᐯᓕᒫᑦ ᑎᐱᓚᐌ ᐅᑦ ᐊᐙᔑᒥᔑᐙᐗ ᓀᔥᑕ ᐎᑭᐙᐗ᙮ 13ᐌᓴ ᐊᓂᑭ ᒀᔭᔉ ᑳ ᑮ ᐋᐸᒋᑖᒋᒃ ᐋᔭᒥᐁᐎᑭᒪᐤ ᐅᑦ ᐃᑖᐸᑎᓯᐎᓐ, ᑲᔥᑭᑕᒫᓱᐗᒃ ᒥᓗ ᓂᐸᐎᐎᓐ, ᓀᔥᑕ ᑭᒋ ᓱᑫᓕᒧᐎᓐ ᑖᐺᔦᓕᑕᒧᐎᓂᒃ ᑳ ᐋᔭᑦ ᙭ ᒋᓴᔅ᙮
ᐊᓂᒪ ᑭᒋ ᑭᔅᑫᓕᑖᑫᐎᓐ
14ᐅᐅ ᑭ ᒪᓯᓇᐊᒫᑎᓐ, ᐁ ᐸᑯᓭᓕᒧᔮᓐ ᐎᐸᒡ ᑭᒋ ᓈᑎᑖᓐ: 15ᒫᑲ ᑮᔥᐱᓐ ᑭᓉᔥ ᐃᑖᐱᒋᔮᓀ, ᑭᒋ ᑭᔅᑫᓕᑕᒪᓐ ᑫ ᐃᑖᑎᓯᔭᓐ ᑭᒋᒪᓂᑐ ᐅ ᐙᔅᑳᔨᑲᓂᒥᒃ, ᐁᐗᑯ ᐅ ᒫᒪᐎᐋᔭᒥᐋᒪ ᐯᒫᑎᓰᑦ ᑭᒋᒪᓂᑐ, ᑳ ᐅᒋ ᓯᑐᓂᑳᑌᒃ ᓀᔥᑕ ᐋᔨᒋᑖᓂᐗᒃ ᑖᐺᐎᓐ᙮ 16ᓀᔥᑕ ᐁᑳ ᐁ ᑶᑕᐎᐃᑌᓕᒋᑳᑌᒃ ᑭᔅᑌᓕᑖᑾᓐ ᐁ ᐃᔑ ᒫᒪᔅᑳᑌᓕᑖᑾᒃ ᒪᓂᑐᐙᑎᓯᐎᓐ: ᑭᒋᒪᓂᑐ ᑮ ᓄᑯᐊᐤ ᐎᔮᓯᒃ, ᑭ ᒀᔭᔅᑲᑎᓯᐊᐤ ᐊᒑᑯᒃ, ᑮ ᐙᐸᒥᑯ ᐁᓐᒐᓚ, ᑮ ᐋᓕᒧᑕᒧᐗᐗᒃ ᒉᓐᑖᐃᓚᒃ, ᑮ ᑖᐺᔦᓕᒪᐤ ᐊᔅᑮᒃ, ᐃᔥᐱᒥᒃ ᑮ ᐅᑎᓇᐤ ᑭᔅᑌᓕᑖᑯᓯᐎᓂᒃ᙮
Currently Selected:
ᓂᔥᑕᒻ ᑎᒧᑎ 3: MCNT91
Highlight
Share
Copy
Want to have your highlights saved across all your devices? Sign up or sign in
The text of the Bible in Moose Cree is in the public domain.
Moose Cree New Testament © Canadian Bible Society, 1991.