ᓂᔥᑕᒻ ᑎᒧᑎ 1
1
1ᐹᓪ, ᐅᑦ ᐊᐸᔅᑕᓕᒪ ᒋᓴᔅ ᙭, ᐅᑲᑫᔅᑴᐎᓐ ᐅᒋ ᑭᒋᒪᓂᑐ ᑭ ᐱᒫᒋᐃᐌᒥᓇᐤ, ᓀᔥᑕ ᐅᑎᐯᓕᑫᐤ ᒋᓴᔅ ᙭, ᐁᐗᑯ ᑭᑦ ᐊᔅᐯᓕᒧᐎᓂᓇᐤ᙮
2ᐁ ᒪᓯᓇᐊᒪᐗᒃ ᑎᒧᑎ, ᑎᐱᓚᐌ ᓂᑯᓯᔅ ᑖᐺᔦᓕᑖᒧᐎᓂᒃ:
ᑭᔐᐙᑎᓯᐎᓐ, ᔕᐌᓕᒋᑫᐎᓐ, ᓀᔥᑕ ᑳᔮᒣᓕᑕᒧᐎᓐ, ᑭ ᑳ ᐎ ᐋᔮᓐ, ᑭᒋᒪᓂᑐ ᑯᑖᐎᓇᐤ ᐅᒋ, ᓀᔥᑕ ᒋᓴᔅ ᙭ ᑭ ᑎᐯᓕᒋᑫᒥᓇᐤ᙮
ᔮᑾᒥᐌᐎᓇ ᐁ ᓇᔅᐹᒋ ᑭᔅᑭᓄᐊᒫᑫᐊᒃ
3ᑳ ᐃᔑ ᐸᑯᓭᓕᒥᑖᓐ ᑫᔮᐸᒡ ᑭᒋ ᑕᔑᑫᔭᓐ ᐁᐱᓴᓯᒃ, ᐃᔅᐱ ᑳ ᐱᑐᑌᔮᓐ ᒫᓯᑐᓂᔭᐃᒃ, ᑭᒋ ᐃᑕᔓᒪᒋᒃ ᐋᑎᑦ ᐊᐌᓂᑭ ᐁᑳ ᑯᑕᑭᓕᐤ ᑭᔅᑭᓄᐊᒫᑫᐎᓂᓕᐤ ᑭᒋ ᑭᔅᑭᓄᐊᒫᑫᒋᒃ, 4ᐁᑳ ᓀᔥᑕ ᑭᒋ ᐱᓯᔅᑫᓕᑕᑭᒃ ᑭᓛᔅᑭᐙᒋᒧᐎᓇ ᓀᔥᑕ ᐁᑳ ᐎᔅᑳᑦ ᑳ ᐳᓂᐸᓕᑭ ᐊᔮᓂᔅᑫᐋᔭᒥᐎᓇ, ᑳ ᐅᒋ ᐅᒋᐸᓕᑭ ᑲᑴᒋᒥᑐᐎᓇ ᐊᐙᓯᑌ ᐃᔥᐱᔥ ᒪᓂᑐᐎ ᑭᔅᑭᓄᐊᒫᑫᐎᓐ ᑖᐺᔦᓕᑕᒧᐎᓂᒃ ᑳ ᐃᑕᑾᒃ᙮ 5ᐁ ᑭᔑᐹᒃ ᒫᑲ ᑲᑫᔅᑴᐎᓐ ᐁᐗᑯ ᓵᑭᐃᐌᐎᓐ ᐸᓓᑭ ᒥᑌᐃᒃ ᐁ ᐅᒋᐸᓕᒃ, ᓀᔥᑕ ᒥᓗ ᒥᑐᓀᓕᒋᑲᓂᒃ, ᓀᔥᑕ ᑳ ᑖᐺᔦᓕᑖᑾᒃ ᑖᐺᔦᓕᑕᒧᐎᓂᒃ; 6ᐊᓂᒪ ᐋᑎᑦ ᐁᑳ ᐁ ᑮ ᑯᒋ ᓄᔅᐱᓇᑕᑭᒃ, ᑮ ᐃᔑ ᐸᔅᑫᐗᒃ ᐸᑾᓐᑕᐤ ᐋᔑᑌᒥᑐᐎᓂᒃ; 7ᐁ ᐸᑯᓭᓂᒧᒋᒃ ᑭᒋ ᑭᔅᑭᓄᐊᒫᑫᒋᒃ ᐅᓚᔓᐌᐎᓂᓕᐤ; ᐁᑳ ᐁ ᓂᓯᑐᑕᑭᒃ ᑫᒀᓕᐤ ᑳ ᐃᑗᒋᒃ ᓀᔥᑕᐱᑯ ᑳ ᐋᓕᒧᑕᑭᒃ᙮
8ᒫᑲ ᑭᓚᓈᓇᐤ ᑭ ᑭᔅᑫᓕᑌᓈᓇᐤ ᐅᓚᔓᐌᐎᓐ ᐁ ᒥᓨᔑᒃ, ᑮᔥᐱᓐ ᐊᐌᓇ ᐃᓕᓕᐤ ᒥᓗ ᐋᐸᒋᑖᒋ; 9ᐅᒪ ᐁ ᑭᔅᑫᓕᒋᑳᑌᒃ, ᐅᓚᔓᐌᐎᓐ ᐁᑳ ᐁ ᑮ ᐅᔑᑕᒫᑦ ᑳ ᒀᔭᔅᑭᑖᑎᓰᑦ ᐃᓕᓕᐤ, ᒫᑲ ᐁᑳ ᑳ ᑲᓇᐌᓕᑕᑭᒃ ᐅᓚᔓᐌᐎᓂᓕᐤ, ᑳ ᔑᐱᑕᑭᒃ, ᐁᑳ ᑳ ᒪᓂᑐᐙᑎᓯᒋᒃ ᓀᔥᑕ ᑳ ᒪᒋᑣᒋᒃ, ᑳ ᒪᒑᑎᓯᒋᒃ, ᓀᔥᑕ ᑳ ᒪᒋᐃᑗᔅᑭᒋᒃ, ᑳ ᓂᐸᐋᒋᒃ ᐅᑖᐎᐗᐗ, ᓀᔥᑕ ᑳ ᓂᐸᐋᒋᒃ ᐅᑳᐎᐗᐗ, ᓀᔥᑕ ᑳ ᓂᐸᐋᒋᒃ ᐃᓕᓕᐗ, 10ᑳ ᐱᔑᒀᑎᓯᒋᒃ, ᓀᔥᑕ ᐊᓂᑭ ᐎᒋᐃᓕᓕᐗ ᑳ ᐅᒋ ᐎᓂᐃᑎᓱᒋᒃ, ᐊᓂᑭ ᑳ ᑭᒧᑎᒋᒃ ᐃᓕᓕᐗ, ᐅᑭᓛᔅᑭᔅᑲᒃ, ᐊᓂᑭ ᑳ ᑭᓛᔅᑭᐋᒋᒧᒋᒃ, ᓀᔥᑕ ᑮᔥᐱᓐ ᐁᑕᑾᓄᑴ ᑯᑕᒃ ᑫᒀᓐ ᑳ ᓇᔅᐹᓯᓈᑾᒃ ᑖᐺᐎ ᑭᔅᑭᓄᐊᒫᑫᐎᓂᒃ: 11ᐁ ᐃᔑ ᐃᑗᒪᑲᓂᓕᒃ ᐅ ᑭᔅᑌᓕᑖᑯᓯᐎ ᒥᓗᐋᒋᒧᐎᓐ ᑳ ᔕᐌᓕᑖᑯᓯᑦ ᑭᒋᒪᓂᑐ, ᑳ ᑮ ᐸᑭᑎᓇᒫᑲᐎᐗᒃ ᑭᒋ ᑲᓇᐌᓕᑕᒶᒃ᙮
ᓇᓈᔅᑯᒣᐤ ᑭᒋᒪᓂᑐᐗ ᐅᔕᐌᓕᒋᑫᐎᓇ ᐅᒋ
12ᓀᔥᑕ ᒫᑲ ᓂ ᓇᓈᔅᑯᒫᐤ ᙭ ᒋᓴᔅ ᑭ ᑎᐯᓕᒋᑫᒥᓇᐤ, ᑳ ᑮ ᑲᔥᑭᑕᒥᐃᑦ, ᒀᔭᔅᑭᑎᐤ ᐁ ᑮ ᐃᑕᑭᒥᑦ, ᐁ ᐸᑭᑎᓂᑦ ᐋᔭᒥᐋᐎ ᐊᑑᔅᑫᐎᓂᒃ; 13ᓂᓚ ᑳᔮᔥ ᑳ ᑮ ᐹᔅᑖᒥᐌᔅᑭᔮᓐ, ᓀᔥᑕ ᑳ ᑮ ᑲᒀᑕᑭᐃᐌᔮᓐ, ᓀᔥᑕ ᑳ ᑮ ᒪᒋᑐᑖᑫᔮᓐ; ᒫᑲ ᓂ ᑮ ᒥᓕᑲᐎᓐ ᔕᐌᓕᒋᑫᐎᓐ, ᐋᓉᔦᓕᑕᒧᐎᓂᒃ ᐁ ᑮ ᑐᑕᒫᓐ ᐁᑳ ᐁ ᑮ ᑭᔅᑫᓕᑕᒫᓐ᙮ 14ᓀᔥᑕ ᐅ ᔕᐌᓕᒋᑫᐎᓐ ᑭ ᑎᐯᓕᒋᑫᒥᓇᐤ ᓈᔅᐱᒡ ᑮ ᐌᓗᒋᐸᓕᓕᐤ, ᐊᓯᒋ ᑖᐺᔦᓕᑕᒧᐎᓐ ᓀᔥᑕ ᓵᑭᐃᐌᐎᓐ ᑳ ᐃᔑ ᐱᒋᔅᑳᑯᑦ ᙭ ᒋᓴᔅ᙮ 15ᐁᐗᑯ ᐅᒪ ᑎᐋᐺᒪᑲᒃ ᐃᑗᐎᓐ, ᓀᔥᑕ ᑌᐸᑫᓕᑖᑾᓐ ᒥᓯᐌ ᐃᔑ ᑭᒋ ᐅᑎᓂᑳᑌᒃ, ᙭ ᒋᓴᔅ ᐁ ᑮ ᐯᒋᐃᑐᑌᑦ ᐅᑕ ᐊᔅᑮᒃ ᑭᒋ ᐱᒫᒋᐋᑦ ᐅᒪᒋᑣᐗ; ᐁᐗᒀᓂᑭ ᐅᒋ ᓂᓚ ᓂ ᓂᑳᓀᓕᑖᑯᓯᓐ᙮ 16ᐁᓕᐌᒃ ᒫᑲ, ᐅᒪ ᐅᒋ ᓂ ᑮ ᒥᓕᑲᐎᓐ ᔕᐌᓕᒋᑫᐎᓐ, ᓂᓚ ᒪᐗᒋ ᓂᑳᓐ ᑭᒋ ᐅᒋ ᐙᐸᑎᓕᐌᑦ ᒥᓯᐌ ᔑᐱᓚᐌᓯᐎᓂᓕᐤ, ᑭᒋ ᑭᔅᑭᓄᐙᐸᑕᑭᒃ ᐊᓂᑭ ᐁᔥᑾ ᑫ ᑖᐺᔦᓕᒫᒋᒃ ᑳᑭᑫ ᐱᒫᑎᓯᐎᓂᒃ ᐃᔑ᙮ 17ᐁᑯ ᑭᒋᐅᑭᒪᐤ ᑳᑭᑫ ᑳ ᐃᑖᑦ, ᑳᑭᑫ ᑳ ᐱᒫᑎᓰᑦ, ᐁᑳ ᑳ ᓄᑯᓯᑦ, ᐎᓚ ᐱᑯ ᑳ ᑲᑫᑕᐌᓕᑕᒃ ᑭᒋᒪᓂᑐ, ᑲᑕ ᐎ ᑭᔅᑌᓕᒪᐤ ᓀᔥᑕ ᑲᑕ ᐎ ᑭᔅᑌᓕᑖᑯᐊᐤ ᑳᑭᑫ ᓀᔥᑕ ᑳᑭᑫ᙮ ᐁᒣᓐ᙮
18ᐅᒪ ᐃᑕᔓᐌᐎᓐ ᑭ ᐸᑭᑎᓇᒫᑎᓐ, ᓂᑯᓯᔅ ᑎᒧᑎ, ᐁ ᐃᑗᒪᑲᑭ ᐊᓂᐃ ᑭᔅᑭᐙᐃᑫᐎᓇ ᑳ ᑮ ᓂᑳᓄᑖᑯᔭᓐ, ᐁᐗᒀᓂ ᑭᒋ ᐅᒋ ᓄᑎᓂᑫᔭᓐ ᒥᓗ ᓄᑎᓂᑫᐎᓐ; 19ᐁ ᒥᒋᒥᓇᒪᓐ ᑖᐺᔦᓕᑕᒧᐎᓐ ᓀᔥᑕ ᒥᓗ ᒥᑐᓀᓕᒋᑲᓐ; ᐁᐗᒀᓂ ᐋᑎᑦ ᐁ ᑮ ᐃᑲᑌᔅᑖᒋᒃ, ᑖᐺᔦᓕᑕᒧᐎᓐ ᐅᒋ ᑭ ᐱᑯᓈᐱᒀᓀᔑᓋᒃ: 20ᐅᑯ ᐋᑎᑦ ᐁᐗᒀᓂᑭ ᐦᐊᐃᒥᓂᔭᔅ ᓀᔥᑕ ᐋᓕᒃᓵᓐᑕᕐ; ᑳ ᑮ ᐸᑭᑎᓇᒪᐗᒃ ᓭᑖᓐ, ᑭᒋ ᐎ ᑲᑴ ᑭᔅᑫᓕᑕᑭᒃ ᐁᑳ ᑭᒋ ᐹᔅᑕᒧᒋᒃ᙮
Currently Selected:
ᓂᔥᑕᒻ ᑎᒧᑎ 1: MCNT91
Highlight
Share
Copy
Want to have your highlights saved across all your devices? Sign up or sign in
The text of the Bible in Moose Cree is in the public domain.
Moose Cree New Testament © Canadian Bible Society, 1991.