Mateus 8
8
Jesus Kura Moras Lepra
1Bainhira Jesus tuun hosi foho, ema lubun boot lao tuir Nia. 2#8:2 Bele lee iha Marcos 1:40-44 no Lucas 7:1-10.No tebes, ema ida ho moras lepra#8:2 Liafuan iha lian Gregu refere ba moras sira nebee kona kulit. mai no hakneak iha Nia oin, no dehan, “Nai, se O hakarak, O bele halo hau sai moos.” 3Jesus lolo liman no kona ema ida nee, no dehan, “Hau hakarak, sai moos ba.” No mane nee sai moos kedas hosi moras lepra. 4Jesus dehan ba nia, “Keta koalia ho ema ida, maibee baa hatudu aan ba saserdote. Foo oferta nebee Moisés manda ona,#8:4 Haree lei kona ba moras lepra iha Levítiku 13-14. hodi sai testemunha ba sira.”
Komandante Roma Nia Fiar
5 # 8:5 Bele lee iha Lucas 7:1-10. Bainhira Jesus tama tiha ba iha Kafarnaum, komandante#8:5 Komandante ba soldadu, naran ‘senturiaun’, nebee xefi ba soldadu nain atus ida. ida mai hasoru Nia, no husu favór ida hosi Nia. 6Komandante nee dehan, “Nai, hau nia atan toba hela iha uma ho moras isin maten, no nia iha terus makaas.” 7Jesus dehan ba nia, “Hau sei baa no kura nia.” 8Maibee komandante nee hataan dehan, “Nai, hau la merese katak Ita Boot tama mai iha hau nia uma. Maibee koalia deit, no hau nia atan sei sai diak. 9Tanba hau mak mane ida nebee tuir autoridade iha hau nia leten, no hau iha soldadu sira iha hau nia okos. Hau dehan ba ida, ‘Baa!’ no nia baa; no hau dehan ba ida seluk, ‘Mai!’ no nia mai. No ba hau nia atan, ‘Halo ida nee!’ no nia halo tuir.” 10Bainhira Jesus rona tiha liafuan nee, Nia admira, no dehan ba sira nebee lao tuir Nia, “Tebes Hau dehan ba imi, Hau seidauk hetan ema ho fiar nebee boot hanesan nee iha Israel. 11Hau dehan ba imi katak ema barak sei mai hosi parte lorosae no parte loromonu no sira sei tuur iha meza hamutuk ho Abraão, Isak, no Jacó, iha reinu lalehan. 12Maibee Maromak#8:12 Gregu la dehan ‘Maromak’. sei soe reinu nia oan sira ba liur iha fatin nakukun liu, iha fatin nebee ema tanis no ruun nehan.” 13No Jesus dehan ba komandante nee, “Lao ba, no o sei hetan tuir o nia fiar.” No komandante nia atan sai isin diak kedas iha oras nebaa.
Jesus Kura Pedro Nia Banin Feto
14 # 8:14 Bele lee iha Marcos 1:29-34, Lucas 4:38-41. Bainhira Jesus tama iha Pedro nia uma, Nia haree katak Pedro nia banin feto toba ho moras isin manas. 15Jesus kaer nia liman, no isin manas sai kedas hosi nia. Feto nee hamriik no hahuu serví Jesus. 16Bainhira kalan mai ona, ema lori mai ema barak nebee diabu domina ba Jesus. Nia duni sai espíritu sira nee ho liafuan ida. No Nia kura ema hotu nebee moras. 17Nunee Nia kumpri liafuan nebee dehan nanis ona liu hosi profeta Isaias, katak: “Nia simu ita nia frakeza no lori ita nia moras.”#8:17 Haree Isaias 53:4.
Folin Atu Tuir Jesus
18Bainhira Jesus haree ema lubun boot nebee haleu Nia, Nia foo orden atu baa tasi nia sorin ba. 19#8:19 Bele lee iha Lucas 9:57-62.No ema eskriba ida mai, no dehan ba Nia, “Mestri, hau sei lao tuir Ita Boot ba fatin nebee deit Ita Boot baa.” 20No Jesus dehan ba nia, “Asu fuik kiik iha rai kuak, no manu iha loro leten iha knuuk, maibee Ema Nia Oan#8:20 Jesus uza fraze ‘Ema Nia Oan’ hodi refere ba Ninia aan rasik. Haree Ezekiel 2:1, Daniel 7:13-14, no Apokalipse 1:13. la iha fatin ida hodi hatoba Ninia ulun.” 21Depois eskolante ida fali dehan ba Nia, “Nai, husik hau baa hakoi lai hau nia aman.” 22Maibee Jesus dehan ba nia, “Tuir Hau, no husik ema mate hakoi sira nia ema mate.”
Jesus No Laloran Boot
23 # 8:23 Bele lee iha Marcos 4:35-41, Lucas 8:22-25. Tuir mai Jesus sae roo ida no Ninia eskolante sira tuir Nia. 24No tebes, tasi sai siak makaas too laloran halo bee tama ba roo. Maibee Jesus toba dukur hela. 25Ninia eskolante sira baa fanu Nia no dehan, “Nai, salva ami! Ami atu mate!” 26Nia dehan ba sira, “Tanba saa mak imi tauk, Oh imi nebee fiar kiik?” Depois Nia hamriik hodi siak anin no tasi. No buat hotu sai hakmatek.#8:26 Jesus halo hanesan Maromak iha Isaias 51:15. Kompara ho lian Aramaiku. 27Maibee ema sira nee admira no dehan, “See mak ema ida nee, nebee anin no tasi halo tuir Nia?”
Jesus Kura Ema Nain Rua
28 # 8:28 Bele lee iha Marcos 5:1-21, Lucas 8:26-39. Bainhira Jesus too tiha tasi sorin ba, iha rai Gadara,#8:28 Manuskritu balu dehan Gergesenes ou Gerasenes. ema nain rua nebee diabu domina mai hasoru Nia. Ema nain rua nee sai hosi rate fatin. Sira siak tebes no ema la bele liu hosi dalan nee. 29No tebes, sira hakilar, no dehan, “Ami halo saida ba O, Oh Jesus, Maromak Nia Oan? O mai atu foo terus mai ami molok tempu too ka?” 30Iha tempu nebaa, iha fahi lubun boot ida nebee haan hela iha fatin nebee dook hosi sira. 31Entaun diabu sira nee husu lisensa hosi Jesus no dehan, “Se O atu duni sai ami, entaun husik ami bele baa no tama iha fahi lubun boot nee.” 32No Nia dehan ba sira, “Baa!” No bainhira sira sai, sira tama ba iha fahi lubun nee. No tebes, fahi lubun tomak nee halai tuun liu hosi rai lolon no tama tasi. No sira mate iha bee laran. 33Ema sira nebee hein fahi nee halai, no tama ba iha sidade laran. No sira foo sai kona ba buat hotu nebee akontese inklui buat nebee akontese ba ema nebee iha diabu sira nee. 34No tebes, sidade tomak sai ba hodi hasoru Jesus. No bainhira sira haree Nia, sira husu ba Nia atu sai hosi sira nia rai.
Currently Selected:
Mateus 8: BK
Highlight
Copy
Compare
Share
Want to have your highlights saved across all your devices? Sign up or sign in
Copyright Kadi Timor. All rights reserved. Portions of scripture can be used without permission for the promotion of God's glory.