Mateus 7
7
Keta Foo Sala
1Keta foo sala ba ema, atu nunee ema la foo sala ba imi.#7:1 Liafuan Gregu dehan, ‘Keta julga’ nebee atu tesi lia hodi dehan ema halo buat aat. Gregu la dehan ‘ema’, karik inklui mos Maromak nebee tesi lia ba ita. 2Tanba ema sei foo sala ba imi tuir dalan nebee imi foo sala ba sira. No ho sasukat nebee imi sukat ba ema seluk, nunee mos ema seluk sei sukat fali ba imi. 3Tanba saa mak o haree duut lahan ida nebee iha o nia maluk nia matan, maibee o la haree ai kabelak nebee iha o nia matan rasik? 4Ka oinsaa mak o bele dehan ba o nia maluk, ‘Husik hau hasai duut lahan ida nee hosi o nia matan,’ bainhira o sei iha ai kabelak iha o nia matan rasik? 5O mak ema laran makerek, hasai uluk ai kabelak nee hosi o nia matan, depois o bele haree ho matan moos hodi hasai duut lahan hosi o nia maluk nia matan.
6La bele foo buat nebee santu ba asu sira, no keta soe imi nia pérola#7:6 Haree Mateus 13:45 no nota. iha fahi sira nia oin. Keta halo be sira sama buat folin nee iha sira nia ain okos, no fila fali hodi ataka o.
Husu Hodi Hetan
7Husu ba, no imi sei simu; buka ba, no imi sei hetan; dere ba, no odamatan sei nakloke ba imi.#7:7 Iha versíkulu nee, buka, husu no dere mak liafuan iha lian Gregu nebee ita halo nafatin deit too hetan. 8Tanba ema hotu nebee husu sei simu; no ema nebee buka sei hetan; no ba ema nebee dere, odamatan nee sei nakloke ba nia. 9Ema ida nebee, se karik ninia oan husu paun, nia sei foo fali fatuk? 10Ou se karik oan nee husu ikan ida, aman nee sei foo fali samea ka? 11Nunee, se karik imi, maski imi aat, maibee imi hatene oinsaa atu foo prezenti diak ba imi nia oan sira, saa tan imi nia Aman iha lalehan sei foo duni buat nebee diak ba sira nebee husu ba Nia.
Halo Diak Ba Ema Seluk
12Nunee buat hotu nebee imi hakarak atu ema seluk halo ba imi, imi mos halo hanesan nee ba ema seluk. Tanba ida nee mak Lei no Profeta sira.#7:12 Lei nebee mai liu hosi Moisés. Haree Mateus 22:40.
13Tama liu hosi odamatan kloot. Tanba odamatan luan no dalan boot sei lori ema ba mate, no ema barak tama liu hosi dalan ida nee. 14Maibee odamatan kloot no dalan kiik sei lori ema ba moris, no ema uitoan deit mak hetan dalan ida nee.
Ai Horis No Nia Fuan
15Kuidadu ho profeta falsu sira, nebee mai ba imi no hatais aan hanesan bibi, maibee iha laran sira mak asu fuik nebee hamlaha loos. 16Imi sei hatene sira liu hosi sira nia fuan. Ema bele kuu uvas fuan hosi ai tarak ka? Ou ema bele kuu figeira fuan hosi duut tarak ka? 17Nee duni, ai horis ida-idak nebee saudavel sei foo fuan diak, maibee ai horis dodok sei foo fuan aat. 18Ai horis saudavel la bele foo fuan aat, no ai horis dodok la bele foo fuan diak. 19Ai horis hotu nebee la foo fuan diak, ema sei tesi tuun no soe ba ahi laran. 20Nunee imi sei konhese sira liu hosi sira nia fuan.
Hau La Konhese O
21Laos ema hotu nebee dehan mai Hau, ‘Nai, Nai,’ sei tama ba reinu lalehan, maibee nia deit nebee halo tuir Hau nia Aman iha lalehan nia hakarak. 22Ema barak sei dehan mai Hau iha loron nebaa, ‘Nai, Nai, laos ami foo sai profesia hodi O nia naran, no hodi O nia naran ami duni sai tiha diabu sira, no hodi O nia naran mos ami halo ona milagre barak?’ 23No Hau sei hatete ba sira, ‘Hau nunka konhese imi. Hadook tiha hosi Hau, imi nebee halo aat!’
Harii Uma Iha Fatuk Leten
24Nee duni, ema nebee rona Hau nia liafuan, no halo tuir buat sira nee, nia mak hanesan ema matenek ida, nebee harii ninia uma iha fatuk leten. 25Depois udan tuun, mota sae, no anin huu no baku uma nee. Maibee uma nee la monu tanba ema harii uma nee iha fatuk leten. 26No ema hotu nebee rona Hau nia liafuan, no la halo tuir buat sira nee, nia mak hanesan ema beik ida, nebee harii ninia uma iha rai henek leten. 27Depois udan tuun, mota sae, no anin huu no baku uma nee. No uma nee monu tiha, no nia rahun hotu.
Jesus Nia Kbiit
28No bainhira Jesus nia liafuan nee remata ona, ema lubun boot nee hakfodak ho Ninia hanorin. 29Tanba Nia hanorin sira hanesan ema ida nebee iha kbiit, laos hanesan ema eskriba sira.
Currently Selected:
Mateus 7: BK
Highlight
Copy
Compare
Share
Want to have your highlights saved across all your devices? Sign up or sign in
Copyright Kadi Timor. All rights reserved. Portions of scripture can be used without permission for the promotion of God's glory.