Mateus 9
9
Jesus Kura Ema Ho Ain Aat
1Entaun Jesus sae roo ida hodi hakur ba tasi sorin. No Nia mai too Ninia sidade rasik. 2#9:2 Bele lee iha Marcos 2:1-12, Lucas 9:57-62.No tebes, sira lori ba Nia ema ida nebee isin mate, nebee latan hela iha toba fatin. Bainhira Jesus haree sira nia fiar, Nia dehan ba ema isin mate nee, “Oan, aten brani ba! O nia sala hetan perdaun ona.” 3No tebes, ema eskriba balu dehan iha sira nia laran, “Mane nee hatete aat Maromak.” 4Jesus hatene sira nia hanoin, no Nia dehan, “Tanba saa mak imi hanoin aat iha imi nia fuan laran? 5Ida nebee mak fasil liu, atu dehan, ‘O nia sala hetan perdaun’, ka atu dehan, ‘Hamriik no lao ba’? 6Maibee hodi imi bele hatene katak Ema Nia Oan iha kbiit iha mundu atu foo perdaun ba sala,” Nia dehan ba ema nebee moras ho isin mate, “Hamriik ba, foti o nia toba fatin, no fila fali ba o nia uma.” 7Nunee ema nee hamriik, no fila fali ba ninia uma. 8Bainhira ema lubun boot nee haree ida nee, sira admira no foo glória ba Maromak nebee foo kbiit hanesan nee ba ema.
Jesus Bolu Mateus
9 # 9:9 Bele lee iha Marcos 2:13-22, Lucas 5:27-39. Bainhira Jesus lao sai hosi fatin nee, Nia haree mane ida, naran Mateus, nebee tuur hela iha fatin nebee ema selu taxa. Jesus dehan ba nia, “Tuir Hau.” No nia hamriik kedas no tuir Jesus.
10Bainhira Jesus tuur hodi haan iha uma, tebes, kobradór impostu barak no sala nain sira mai no tuur hamutuk ho Nia no Ninia eskolante sira. 11No bainhira ema Farizeu sira haree ida nee, sira dehan ba Ninia eskolante sira, “Tanba saa mak imi nia Mestri haan hamutuk ho kobradór impostu sira no sala nain sira?” 12Maibee bainhira Jesus rona liafuan nee, Nia dehan ba sira, “Ema nebee isin diak la presiza doutór, maibee sira nebee moras. 13Maibee baa no aprende liafuan nee katak saa, ‘Hau hakarak laran luak, laos sakrifísiu.’#9:13 Hosi Oseias 6:6. Tanba Hau mai laos atu bolu ema nebee moris loos, maibee sala nain sira.”
Pergunta Kona Ba Jejún
14Depois João nia eskolante sira baa hasoru Jesus no sira husu, “Tanba saa mak ami no ema Farizeu sira halo jejún,#9:14 Manuskritu balu aumenta ‘beibeik’. maibee Ita Boot nia eskolante sira la halo jejún?” 15Jesus hataan ba sira, “Noivu nia belun sira bele tristi durante tempu kazamentu bainhira noivu sei hamutuk hela ho sira ka? Maibee tempu atu mai bainhira ema foti noivu nee hosi sira, depois sira sei halo jejún.
16Ema la taka kuak iha ropa tuan ho hena foun. Tanba hena foun bele lees fali ropa no halo kuak nee aat liu tan. 17No mos, ema la tau tua uvas foun iha tua kulit tuan,#9:17 Iha tempu nebaa sira prepara bibi nia kulit tomak no suku metin hodi hatama bee ka tua. tanba se sira halo nunee tua kulit nee bele naklees no fakar tua uvas no tua kulit nee sai aat hotu. Maibee ema tau tua uvas foun iha tua kulit foun, no buat rua nee bele diak hela.”
Labarik Feto Moris Hias
18 # 9:18 Bele lee iha Marcos 5:21-43, Lucas 8:40-56. Bainhira Jesus koalia hela ho sira kona ba buat sira nee, tebes, ukun nain ida mai no hakneak iha Nia oin, no dehan, “Hau nia oan feto foin mate. Maibee mai tau liman ba nia, no nia bele moris fali.” 19Entaun Jesus hamriik, no Nia lao tuir ema ida nee, hamutuk ho Ninia eskolante sira.
20No tebes, iha feto ida nebee moras raan suli nebee la para durante tinan sanulu resin rua. Feto nee mai hakbesik iha Jesus nia kotuk hodi kona Jesus nia ropa ninin. 21Tanba feto hanoin iha ninia laran, “Se hau bele kona deit Ninia ropa, hau sei hetan kura.” 22Maibee Jesus fila oin, no bainhira Nia haree feto nee, Nia dehan, “Oan feto, aten brani ba. O nia fiar salva ona o.” No hosi tempu nee kedas feto nee sai diak#9:22 Liafuan ‘salva’ no ‘sai diak’ nee mai hosi liafuan ‘salva’ iha lian Gregu. Haree liafuan hanesan ba feto iha Lucas 7:50. fali. 23Jesus mai too iha ukun nain nia uma. Nia haree ema huu flauta#9:23 Sira huu flauta hodi tuir kultura tanis lelir nian bainhira ema mate ona. no ema lubun boot halo barulhu. 24Nia dehan ba sira, “Imi sai tiha, tanba labarik feto nee la mate, maibee nia toba deit.” No sira hamnasa Nia.
25Maibee bainhira ema haruka povu nee sai tiha ona, Jesus tama ba. Nia foti labarik feto nia liman, no feto nee hadeer. 26No ema fahe istória kona ba hahalok nee iha rai tomak iha nebaa.
Jesus Kura Ema Matan Delek
27Bainhira Jesus sai hosi fatin nee, ema matan delek nain rua tuir Nia. Sira hakilar no dehan, “David Nia Oan Mane,#9:27 Sira uza naran nee katak Jesus mak jerasaun hosi liurai David. hatudu laran luak mai ami.” 28Bainhira Nia tama uma, ema matan delek nain rua nee tama tuir Nia. No Jesus dehan ba sira, “Imi fiar katak Hau bele halo buat nee ka?” Sira dehan ba Nia, “Sin, Nai.” 29Depois Nia tau liman ba sira nia matan, no dehan, “Tuir imi nia fiar, nunee imi sei hetan.” 30No sira nia matan nee nakloke. Jesus bandu makaas sira, no dehan, “La bele foo hatene kona ba buat nee ba ema ida.” 31Maibee bainhira sira sai tiha, sira konta istória kona ba Nia iha rai tomak iha nebaa.
Jesus Kura Ema Monok
32Bainhira sira sai dadauk, tebes, ema seluk lori ba Nia ema monok ida nebee diabu domina. 33No bainhira Jesus duni sai tiha diabu, ema monok nee koalia. Ema lubun sira nee admira no dehan, “Ita nunka haree buat ida hanesan nee iha Israel.” 34Maibee ema Farizeu sira dehan, “Nia bele duni sai diabu sira liu hosi diabu sira nia nain.”
Toos Boot Maibee Ema La Too
35Jesus lao ba sidade no aldeia hotu. Nia hanorin iha sira nia sinagoga sira, no haklaken evanjelhu kona ba reinu nee. No Nia kura moras hotu no isin fraku hotu. 36Maibee bainhira Nia haree ema lubun sira nee, Nia hanoin ho laran luak ba sira. Tanba sira fraku no lao arbiru deit, hanesan bibi nebee bibi atan la iha. 37No Nia dehan ba Ninia eskolante sira, “Loos duni, toos nee boot, maibee ema hodi servisu mak uitoan deit. 38Nunee halo orasaun ba Toos Nain hodi Nia bele haruka ema hodi servisu iha Ninia toos.”#9:37-38 Toos nee refere ba rezultadu nebee presizu koa no halibur. Liafuan nee liga ba ema nebee atu tama Maromak nia reinu, maibee Maromak nia atan sira atu halibur ema nee mak uitoan. Haree Lucas 10:2, João 4:35-38.
Currently Selected:
Mateus 9: BK
Highlight
Copy
Compare
Share
Want to have your highlights saved across all your devices? Sign up or sign in
Copyright Kadi Timor. All rights reserved. Portions of scripture can be used without permission for the promotion of God's glory.