Mateus 23
23
Susar Ba Ema Eskriba No Farizeu Sira
1 # 23:1-7 Haree Marcos 12:38-40 no Lucas 20:45-46. Depois Jesus koalia ba ema lubun nee, no ba Ninia eskolante sira. 2Nia dehan, “Ema eskriba no Farizeu sira tuur iha Moisés nia kadeira. 3Nunee halo tuir buat hotu nebee sira hatete ba imi. Maibee keta halo tuir buat nebee sira halo. Tanba sira koalia maibee sira rasik la halo tuir. 4Tanba sira futu naha todan nebee susar atu lori hodi tau iha ema nia kabaas. Maibee sira rasik lakohi hiit naha nee ho liman fuan ida. 5Sira halo buat hotu atu ema bele haree sira. Sira halo boot sira nia kaixa reen toos nian,#23:5 Ema Judeu sira hakerek Maromak nia liafuan no tau iha kaixa kiik hodi kesi ba reen toos. Ideia nee mai hosi Exodu 13:9,16 no Deuteronómiu 6:8. no halo naruk sira nia ropa ninin.
6Sira gosta tuur iha fatin importante iha festa sira no kadeira nebee diak liu iha sinagoga sira. 7Sira gosta simu kumprimentus iha merkadu. No sira hakarak ema bolu sira, ‘Rabi! Rabi!’#23:7 Rabi mak liafuan Ebreu nebee hatudu respeitu no iha sentidu katak ‘mestri’. Haree João 1:38. 8Maibee keta husik ema bolu imi ‘Rabi’. Tanba imi iha Mestri ida, nebee Kristu, no imi hotu mak maun-alin. 9No keta bolu ema ida iha mundu imi nia aman. Tanba imi iha Aman ida deit, nebee iha lalehan. 10No keta husik ema bolu imi mestri. Tanba imi iha Mestri ida deit, nee mak Kristu. 11Maibee nia nebee boot liu iha imi nia leet tenki sai imi nia atan. 12No ema nebee foti aan, Maromak sei hatuun nia. No nia nebee haraik aan, Maromak sei foti sae nia.#23:12 Gregu la dehan ‘Maromak’.
13Maibee susar ba imi, eskriba no Farizeu sira, ema laran makerek! Tanba imi taka reinu lalehan iha ema nia oin. Imi rasik la tama no imi la husik ema seluk nebee hakarak tama atu tama ba.#23:13 Manuskritu balu hakerek versíkulu 14: ‘Susar ba imi, ema eskriba no Farizeu sira, ema laran makerek! Tanba imi tolan feto faluk sira nia uma. No imi finji atu halo orasaun naruk. Nunee imi sei simu kastigu makaas liu.’ 15Susar ba imi, eskriba no Farizeu sira, ema laran makerek! Tanba imi hakur tasi no lao lemo rai hodi hetan sarani foun ida. No bainhira nia fiar ona, imi halo nia sai infernu nia oan, nebee aat liu fali imi ba dala rua.
16Susar ba imi, matadalan sira nebee matan delek! Imi dehan, ‘Se ema ruma jura hodi Templu, nee la buat ida; maibee se ema ruma jura hodi osan mean iha Templu, nia tenki kumpri duni.’ 17Beik-teen sira nebee matan delek! Ida nebee mak importante liu, osan mean ka Templu nebee halo santu osan mean nee? 18No imi dehan, ‘Ema ruma nebee jura hodi altár, nee la buat ida; maibee ema ruma nebee jura liu hosi oferta nebee iha leten, nia tenki kumpri duni.’ 19Beik-teen sira nebee matan delek! Ida nebee mak importante liu, oferta ka altár nebee halo santu oferta nee? 20Nunee ema nebee jura hodi altár, nia jura hodi altár no hodi buat hotu nebee iha altár leten nee. 21No ema nebee jura hodi Templu, nia jura hodi Templu no hodi Nia nebee hela iha Templu laran nee. 22No ema nebee jura hodi lalehan, nia jura hodi Maromak nia kadunan, no hodi Nia nebee tuur iha kadunan nee.
23Susar ba imi, eskriba no Farizeu sira, ema laran makerek! Tanba imi foo porsentu sanulu hosi ruku, endru no kominhu,#23:23 Buat tolu nee mak modo tahan kiik nebee ema tau uitoan ba hahaan hodi halo gostu. Sira haketak porsentu sanulu hosi buat kamaan nee, maibee sira haluha buat importante ba Maromak. Levítiku 27:30. maibee imi haluha buat todan liu hosi Lei, hanesan justisa, laran luak no fidelidade. Lo-loos imi tenki halo tuir buat importante nee no la husik buat seluk nee. 24Matadalan sira nebee matan delek! Imi taes susuk ida maibee imi tolan kuda kamelu ida!#23:24 Ema Judeu sira iha regulamentu kona ba buat sira nebee sira bele haan no la bele haan. Kuda kamelu nee la bele haan. Haree Levítiku 11. Signifika katak sira bandu buat kiik liu maibee simu buat aat loos.
25Susar ba imi, eskriba no Farizeu sira, ema laran makerek! Tanba imi hamoos kopu no bikan nia liur, maibee iha laran sira nakonu ho hahalok kaan-teen no la kontrola aan. 26Farizeu sira nebee matan delek! Hamoos uluk kopu no bikan nia laran, atu nunee iha liur mos bele sai moos.
27Susar ba imi, eskriba no Farizeu sira, ema laran makerek! Tanba imi hanesan rate nebee pinta mutin. Maski iha liur haree furak, maibee iha laran sira nakonu ho mate ruin no buat nebee la moos. 28Hanesan nee mos, ema haree imi hanesan ema moris loos iha liur, maibee iha laran imi nakonu ho laran makerek no hahalok aat.
29Susar ba imi, eskriba no Farizeu sira, ema laran makerek! Tanba imi hada rate ba profeta sira, no hafurak osuáriu ba ema moris loos, 30no imi dehan, ‘Se ami moris iha ami nia bei-ala sira nia tempu, ami sei la hola parte ho sira iha sala nebee fakar profeta sira nia raan.’ 31Nunee imi sai sasin hasoru imi nia aan rasik. Tanba imi mak oan hosi ema sira nebee oho profeta sira. 32Entaun halo too hotu, tuir imi nia bei-ala sira. 33Oh samea sira, no samea nia oan sira. Oinsaa imi bele halai sees hosi kastigu infernu nian? 34Nunee tebes, Hau haruka profeta sira, ema matenek klean sira no eskriba sira ba imi. No ema balu nee imi sei oho no prega ba krús. Ema balu nee imi sei baku ho sikoti iha imi nia sinagoga sira. No imi sei hanehan sira hosi sidade ba sidade. 35Nunee imi sei lori todan hosi ema moris loos hotu nia raan nebee fakar ona iha mundu - hosi ema moris loos Abel nia raan#23:35 Bele lee kona ba Kain nebee oho Abel iha Jénesis 4:8. too iha Zakarias, oan mane hosi Barakias,#23:35 Zakarias, oan hosi Barakias, mak profeta ida (Zakarias 1:1). Manuskritu balu la hakerek ‘oan hosi Barakias’. Kompara ho Lucas 11:51. Liurai Joás oho Zakarias, saserdote Jehoida nia oan, iha Templu oin (2 Krónikas 24:18-22). nebee imi oho iha Templu no altár nia klaran. 36Tebes Hau dehan ba imi, buat sira nee hotu sei mai kona jerasaun nee.
Lamentasaun Kona Ba Jerusalém
37 # 23:37-39 Haree Lucas 13:34-35. Oh Jerusalém, Jerusalém, sidade nebee oho profeta sira, no tuda mate ho fatuk ema sira nebee Maromak haruka ba o! Dala hira ona mak Hau hakarak halibur hamutuk o nia oan sira hanesan manu inan halibur ninia oan sira iha ninia liras okos. Maibee o lakohi! 38Tebes, o nia uma sei sai mamuk. 39Tanba Hau dehan ba imi, katak imi sei la haree fali Hau, too imi dehan, ‘Bensaun ba Nia nebee mai hodi Nai nia naran.’”#23:39 Haree Salmu 118:26.
Currently Selected:
Mateus 23: BK
Highlight
Copy
Compare
Share
Want to have your highlights saved across all your devices? Sign up or sign in
Copyright Kadi Timor. All rights reserved. Portions of scripture can be used without permission for the promotion of God's glory.