Mateus 22
22
Ai Knanoik Kona Ba Festa Kazamentu
1Jesus koalia fali ba sira liu hosi ai knanoik sira. No Nia dehan, 2“Reinu lalehan mak hanesan liurai ida nebee halo festa kazamentu ba ninia oan mane. 3Nia haruka ninia atan sira atu bolu ema sira nebee nia konvida ona hodi mai tuir festa kazamentu nee. Maibee sira lakohi mai. 4Entaun nia haruka atan sira seluk, no dehan, ‘Foo hatene ba sira nebee hau konvida ona nee, “Tebes, hau prepara ona hau nia hahaan nee. Hau oho ona hau nia karau aman no karau oan sira nebee bokur, no buat hotu prontu ona. Mai tuir festa kazamentu nee.”’ 5Maibee sira lakohi hanoin ida nee. Sira halo tuir sira nia hakarak. Ida ba ninia toos no ida seluk ba ninia negósiu. 6Sira seluk nee kaer ninia atan sira. Sira hamoe no oho atan sira nee. 7Bainhira liurai rona ona, nia sai hirus tebes. Nia haruka ninia tropas sira no halakon oho door sira nee, no sunu sira nia sidade. 8Depois liurai dehan ba ninia atan sira, ‘Festa kazamentu nee prontu ona, maibee sira nebee hau konvida ona la merese atu mai. 9Nunee tama ba dalan boot nia kruzamentu. No see deit nebee imi hetan, bolu sira mai tuir festa kazamentu nee.’ 10Entaun atan sira nee tama ba dalan boot sira, no halibur ema hotu nebee sira hetan, inklui ema aat no ema diak. No fatin kazamentu nian sai nakonu ho bainaka sira.
11Bainhira liurai mai hodi haree bainaka sira, nia haree mane ida nebee la hatais ropa festa kazamentu nian. 12Nia dehan ba mane nee, ‘Kolega, oinsaa mak o tama mai iha nee no o la hatais ropa festa kazamentu nian?’ No mane nee nonook deit. 13Entaun liurai dehan ba atan sira, ‘Kesi ninia liman no ain, no lori nia sai, no soe nia ba liur iha fatin nakukun. Iha nebaa sira tanis no ruun nehan.’ 14Tanba Nai bolu ema barak, maibee Nia hili uitoan deit.”#22:14 Gregu la dehan ‘Nai’.
Selu Impostu Ba César
15 # 22:15-32 Haree Marcos 12:13-27 no Lucas 20:20-38. Depois ema Farizeu sira baa no halo enkontru kona ba oinsaa sira bele lasu Jesus liu hosi Ninia liafuan. 16Sira haruka sira nia eskolante sira ho ema Herodes sira ba Nia. No sira dehan, “Mestri, ami hatene katak Ita Boot mak loos no Ita Boot hanorin Maromak nia dalan ho lia loos. No Ita Boot la preokupa kona ba ema ida no la fihir ba ema nia oin. 17Nunee foo hatene mai ami, Ita Boot hanoin oinsaa? Ida nee loos atu foo osan impostu ba César#22:17 César mak liurai boot liu iha Roma. Ema Judeu balu hanoin tuir lo-loos la bele selu taxa nebee foo suporta ba governu Roma tanba ema Judeu sira hakarak ukun aan. ka lae?” 18Maibee Jesus hatene sira nia hahalok aat, no dehan, “Ema laran makerek sira, tanba saa mak imi koko Hau? 19Hatudu mai Hau osan impostu nian.” No sira lori osan denáriu#22:19 Osan nebee selu ba ema nebee servisu loron ida. ida ba Nia. 20Nia dehan ba sira, “Figura nee see nian no naran nee see nian?” 21Sira dehan ba Nia, “César nian.” Depois Nia dehan ba sira, “Nunee foo ba César buat nebee César nian, no foo ba Maromak buat nebee Maromak nian.” 22Bainhira sira rona tiha liafuan nee, sira admira. No sira husik Nia no baa deit.
Kona Ba Ema Moris Hias
23Iha loron nee mos, ema Saduseu sira nebee dehan la iha moris hias, baa hasoru Jesus. No sira husu Nia, 24“Mestri, Moisés dehan, ‘Se mane ida mate, no nia la iha oan, nunee ninia maun ka alin mane tenki kaben ho ninia feen, no hetan oan ba nia.’#22:24 Haree Deuteronómiu 25:5. 25Agora, iha ami nia leet iha maun-alin nain hitu. Mane ba dala ida hola feto ida, depois nia mate. No tanba oan la iha, nia husik ninia feen ba ninia alin mane. 26Nee hanesan ho alin ba dala rua, no alin ba dala tolu too alin ba dala hitu. 27Ikus mai, feto nee mos mate. 28Entaun, iha tempu nebee ema moris hias ona, feto ida nee sei sai feen ba mane ida nebee hosi nain hitu nee? Tanba sira hotu hola nia.”
29Jesus hataan, no dehan ba sira, “Imi halo sala, tanba imi la hatene Eskritura ka Maromak nia kbiit. 30Tanba bainhira sira moris hias ona, sira la kaben, no sira la foo feto atu kaben. Maibee sira sai hanesan anju sira iha lalehan. 31No kona ba moris hias hosi mate: imi seidauk lee liafuan nebee Maromak dehan ona ba imi ka? Nia dehan, 32‘Hau mak Abraão nia Maromak, no Isak nia Maromak, no Jacó nia Maromak.’? #22:32 Haree Exodu 3:6. Nia laos Maromak ba ema mate, maibee Maromak ba ema moris.” 33No bainhira ema lubun rona ona liafuan nee, sira hakfodak ho Ninia hanorin.
Ukun Fuan Boot Liu
34 # 22:34-40 Haree Marcos 12:28-33. Maibee bainhira ema Farizeu sira rona tiha katak Jesus halo ema Saduseu sira sai nonook, ema Farizeu sira nee halibur hamutuk. 35Depois ema ida hosi sira, nebee hatene Lei, husu pergunta ba Nia hodi koko Nia. Ema Farizeu nee dehan, 36“Mestri, ukun fuan ida nebee mak boot liu iha Lei?” 37Jesus dehan ba nia, “‘O sei hadomi Nai, o nia Maromak, ho o nia laran tomak, o nia klamar tomak, no o nia neon tomak.’ #22:37 Haree Deuteronómiu 6:5. 38Ida nee mak ukun fuan uluk liu no boot liu. 39No ida segundu mak hanesan ida nee, ‘O sei hadomi o nia maluk hanesan o nia aan rasik.’#22:39 Haree Levítiku 19:18. 40Lei no Profeta sira hotu nia huun mak ukun fuan rua nee.”
See Nia Oan Mak Kristu?
41 # 22:41-45 Haree Marcos 12:35-37 no Lucas 20:41-44. Bainhira ema Farizeu sira halibur hamutuk hela, Jesus husu pergunta ida ba sira. 42Nia dehan, “Imi hanoin saida kona ba Kristu? Nia mak oan mane hosi see?” Sira dehan ba Nia, “Nia mak oan mane hosi David.” 43Jesus dehan ba sira, “Entaun oinsaa David, liu hosi Espíritu, bolu Kristu nee Nai. Tanba David dehan,
44‘Nai dehan ba hau nia Nai,
Tuur iha Hau nia liman loos,
too Hau tau O nia inimigu sira iha O nia ain okos’?#22:44 Hosi Salmu 110:1.
45Se David rasik bolu Nia Nai, oinsaa mak Nia David nia oan mane?” 46No la iha ema ida nebee bele koalia liafuan ida hodi hataan ba Jesus. No hosi loron nee kedas, la iha ema ida nebee brani atu husu tan pergunta ida ba Nia.
Currently Selected:
Mateus 22: BK
Highlight
Copy
Compare
Share
Want to have your highlights saved across all your devices? Sign up or sign in
Copyright Kadi Timor. All rights reserved. Portions of scripture can be used without permission for the promotion of God's glory.