Mateus 24
24
Aban-bainrua Templu Lakon
1Bainhira Jesus sai dadaun hosi Templu, Ninia eskolante sira hakbesik Nia hodi hatudu Templu nia uma sira ba Nia. 2Jesus dehan ba sira, “Imi haree buat sira nee hotu ka? Tebes Hau dehan ba imi, aban-bainrua sei la hela fatuk ida iha fatuk seluk nia leten. Ema sei sobu hotu.”
Sinál Ba Mundu Nia rohan
3Bainhira Nia tuur iha Foho Oliveira no ema seluk la iha, eskolante sira hakbesik ba Nia no husu, “Foo hatene mai ami, bainhira mak buat sira nee sei akontese? No sinál saida mak hatudu katak O atu mai fali, no hatudu mundu nia rohan?”#24:3 Iha lian Gregu, ‘mundu’ mak aion, nebee ‘tempu’. 4Jesus hataan no dehan ba sira, “Kuidadu atu ema la lohi imi. 5Tanba ema barak sei mai hodi Hau nia naran, no dehan, ‘Hau mak Kristu,’ no sira sei lohi ema barak. 6Imi sei rona kona ba funu sira, no lia anin kona ba funu sira. Kuidadu katak imi la sai tauk. Tanba buat hotu nee tenki akontese, maibee tempu rohan seidauk too. 7Tanba nasaun ida sei hamriik hasoru nasaun seluk, no reinu ida sei hasoru reinu seluk. Rai hamlaha no rai nakdoko sei akontese iha fatin oi-oin. 8Buat hotu nee hatudu katak tempu susar#24:8 Lian Gregu uza liafuan nebee refere ba moras tuur ahi nian. foin hahuu.
9Depois sira sei entrega imi ba terus, no sira sei oho imi. No nasaun hotu sei odi imi tanba Hau nia naran. 10Ema barak sei monu ba sala. Sira sei faan malu no odi malu. 11Profeta falsu barak sei mosu, no sira sei lohi ema barak. 12Ema barak nia domin sei sai malirin tanba hahalok aat nebee aumenta ba beibeik. 13Maibee ema nebee tahan too rohan sei hetan salvasaun. 14Ema sei haklaken evanjelhu kona ba reinu iha mundu tomak nudar testemunha ba nasaun sira hotu. Depois nee, mundu nia rohan sei mai.
Buat Foer Liu Nebee Estraga
15Nunee bainhira imi haree buat foer liu nebee estraga, nebee profeta Daniel foo sai nanis ona,#24:15 Haree Daniel 11:31. hamriik iha Fatin Santu (husik nia nebee lee bele kompriende), 16iha tempu nebaa, husik sira nebee iha Judeia halai ba foho. 17Ema nebee iha uma leten keta tuun hodi foti sasaan hosi ninia uma. 18Ema nebee iha toos laran keta fila fali hodi foti ninia ropa. 19Susar ba feto sira nebee isin rua, no ba sira nebee sei foo susu iha tempu nebaa! 20Halo orasaun atu imi la presiza halai iha tempu malirin ka loron Sabdu. 21Tanba iha tempu nebaa terus makaas sei mosu mai. Terus hanesan nee seidauk akontese dezde mundu hahuu, no sei la akontese fali iha tempu tuir mai. 22Se karik Maromak la halo badak tempu nee, la iha ema ida nebee bele hetan salvasaun. Maibee Nia sei halo badak tempu nee tanba sira nebee Nia hili tiha ona. 23Entaun se ema ruma dehan ba imi, ‘Tebes, Kristu mak nee!’ ka ‘Nia iha nebaa!’ imi keta fiar. 24Tanba kristu falsu no profeta falsu sira sei mosu mai. Sira sei hatudu sinál boot no milagre sira, atu koko lohi mos ema nebee Maromak hili ona, se sira bele. 25Tebes, Hau foo hatene nanis ona ba imi. 26Entaun se sira dehan ba imi, ‘Tebes, Nia iha rai fuik maran,’ imi keta baa; ka se sira dehan ‘Tebes, Nia iha kuartu laran,’ imi keta fiar. 27Tanba hanesan rai lakan mosu mai hosi parte lorosae, no nabilan too iha parte loromonu, nunee mos bainhira Ema Nia Oan mai. 28Tanba iha fatin nebee iha mate isin, iha nebaa mos manu makikit sei halibur hamutuk.#24:28 Kompara ho Job 39:30.
Oan Mane Sei Mai Fali
29“Bainhira tempu terus nee foin liu tiha, loro matan sei sai nakukun, no fulan sei la foo ninia naroman, no fitun sira sei monu hosi lalehan, no kbiit iha lalehan sira sei nakdoko. 30Depois Ema Nia Oan nia sinál sei mosu iha lalehan. No nasaun hotu iha mundu sei tanis halerik. No sira sei haree Ema Nia Oan mai hosi lalehan iha kalohan leten ho kbiit no glória boot. 31Nia sei haruka Ninia anju sira ho trombeta nia lian makaas. No sira sei halibur hamutuk ema nebee Nia hili tiha ona hosi fatin hotu,#24:31 Gregu dehan ‘hosi anin haat’, nebee hosi parte norte, súl, leste no oeste, nunee fatin hotu. hosi lalehan nia rohan ida too lalehan nia rohan seluk.
Aprende Hosi Ai Figeira
32Aprende lai kona ba ai knanoik ida hosi ai figeira nee: bainhira ninia sanak foin nurak, no tahan sira foin dikin, imi hatene katak tempu bailoron besik ona. 33Nunee mos, bainhira imi haree buat hotu nee, imi bele hatene katak Nia besik ona, no too ona iha portaun. 34Tebes Hau dehan ba imi, jerasaun nee sei la lakon, too buat hotu nee akontese ona. 35Lalehan no mundu sei lakon, maibee Hau nia liafuan sei nunka lakon.
Ema La Hatene Tempu Nee
36“Maibee la iha ema ida nebee hatene loron ka oras nee, inklui mos anju sira iha lalehan no Ema Nia Oan. Só Aman deit mak hatene. 37Maibee hanesan iha Noé nia tempu, nunee mos ho tempu nebee Ema Nia Oan sei mai. 38Tanba iha tempu molok rai nabeen nee, sira haan hemu, sira kaben no foo kaben, too loron nebee Noé tama ba roo boot laran. 39Sira la hatene too rai nabeen mai ona no halakon sira hotu. Hanesan nee mos ho tempu nebee Ema Nia Oan sei mai. 40Mane nain rua sei iha toos laran, no Maromak#24:40-41 Iha lian Gregu, la iha liafuan ‘Maromak’. sei lori ida no husik ida seluk. 41Feto nain rua sei fai batar, no Maromak sei lori ida no husik ida seluk. 42Nunee matan moris ba, tanba imi la hatene oras nebee imi nia Nai sei mai. 43Maibee hatene ida nee: se uma nain hatene oras ida nebee naok-teen atu mai, nia sei hein hodi haree no la husik naok-teen tama ninia uma. 44Nunee imi mos tenki prontu. Tanba Ema Nia Oan sei mai iha oras nebee imi la hanoin.
Ai Knanoik Kona Ba Atan Fiel
45See mak atan fiel ho matenek klean, nebee ninia nai hili hodi tau matan ba nai nee nia uma kain, no foo hahaan ba atan sira iha tempu loos? 46Haksolok ba atan nee, nebee ninia nai mai fali no hetan nia halo hela servisu nee. 47Tebes Hau dehan ba imi, katak nai sei foo knaar ba atan nee hodi tau matan ba ninia sasaan hotu. 48Maibee se atan aat nee dehan iha ninia fuan laran, ‘Hau nia nai sei mai tardi,’ 49no nia komesa baku ninia maluk atan seluk nee, no nia haan hemu ho lanu-teen sira, 50entaun atan nee nia nai sei mai iha loron nebee atan nee la hein, no iha oras ida nebee atan nee la hatene. 51No ninia nai sei foo kastigu todan#24:51 Gregu dehan nai nee sei tesi atan ba pedasuk sira. ba nia, no tau nia iha fatin hamutuk ho ema laran makerek sira. Iha nebaa sira sei tanis no ruun nehan.
Currently Selected:
Mateus 24: BK
Highlight
Copy
Compare
Share
Want to have your highlights saved across all your devices? Sign up or sign in
Copyright Kadi Timor. All rights reserved. Portions of scripture can be used without permission for the promotion of God's glory.