Ester 6
6
Liurai Foo Onra Ba Mordekai
1Iha kalan nee, liurai la bele dukur. No nia haruka ema lori livru nebee hakerek krónikas no ema lee livru nee iha liurai nia oin. 2Sira hetan fatin nebee hakerek kona ba Mordekai nebee foo hatene kona ba Bigtana no Teres, liurai nia ministru nain rua, nebee hein portaun, no buka atu ataka liurai Asueru. 3Liurai dehan, “Mordekai simu onra no respeitu saida tanba buat nebee nia halo nee?” No liurai nia atan sira nebee serví nia dehan, “Ita la halo buat ida ba nia.” 4Liurai husu, “See mak iha pátiu laran?” No Haman foin tama iha pátiu nia liur iha liurai nia uma hodi koalia ho liurai atu tara mate Mordekai iha ai riin aas nebee nia prepara tiha ona ba Mordekai. 5Liurai nia atan sira dehan ba nia, “Tebes, Haman hamriik iha pátiu laran.” No liurai dehan ba nia, “Husik nia tama mai.” 6Entaun Haman tama mai. No liurai dehan ba nia, “Ba ema nebee liurai hakarak foo onra, ita bele halo saida?” Haman hanoin iha ninia fuan laran, “See mak liu fali hau hodi nunee liurai hakarak atu foo onra?” 7No Haman hataan ba liurai, “Ba ema nebee liurai hakarak atu foo onra, 8husik ema lori mai ropa liurai nian nebee liurai uza tiha ona, no kuda nebee liurai sae tiha ona, no koroa liurai nian ida nebee bele tau iha ema nee nia ulun. 9No husik ita foo ropa no kuda nee ba liurai nia xefi nebee boot liu hodi nia bele foo hatais mane nebee liurai hakarak atu foo onra. No xefi boot nee bele lori mane nee iha kuda no lao liu hosi sidade nia dalan boot no deklara iha ninia oin, ‘Ita halo hanesan nee ba ema nebee liurai hakarak atu foo onra!’” 10Depois liurai dehan, “Entaun lalais, foti kedas ropa no kuda no halo tuir o nia liafuan. Halo tuir liafuan nee ba Mordekai, ema Judeu nebee tuur iha liurai nia portaun. Keta falta buat ida hosi buat hotu nebee o koalia ona nee.” 11Depois Haman foti ropa no kuda no foo hatais Mordekai no lori nia ho kuda, no nia lao liu hosi dalan boot iha sidade laran. Haman deklara iha Mordekai nia oin, “Ita halo hanesan nee ba ema nebee liurai hakarak atu foo onra.”
12Mordekai fila fali ba liurai nia portaun. Maibee Haman fila lalais ba ninia uma ho laran tristi no nia taka ninia ulun. 13Haman konta ba ninia feen no ninia kolega hotu kona ba buat hotu nebee foin akontese ba nia. Depois ninia ema matenek no ninia feen Zeres dehan ba nia, “Se Mordekai mai hosi jerasaun Judeu nian, no ita boot komesa atu monu iha ninia oin, entaun ita boot la bele manaan hasoru nia. Maibee ita boot sei monu duni iha ninia oin.” 14No bainhira sira koalia hela, liurai nia ministru sira mai no foti nia lalais hodi lori nia ba festa ida nebee Ester prepara ona.
Copyright Kadi Timor. All rights reserved. Portions of scripture can be used without permission for the promotion of God's glory.