Ester 5
5
Ester Prepara Festa
1Iha loron terseiru, Ester hatais nudar liurai feto no hamriik iha pátiu laran nebee iha liurai nia uma laran, iha liurai nia fatin nia oin. Liurai tuur hela iha ninia kadunan liurai nian iha liurai nia uma laran nebee iha uma nia portaun nia oin.
2Bainhira liurai haree Ester, liurai feto, hamriik hela iha pátiu, Ester hetan grasa iha liurai nia oin. Liurai lolo rota osan mean nebee iha ninia liman. Entaun Ester hakbesik no book rota nia ulun. 3Depois liurai dehan ba nia, “Nusaa, liurai feto Ester? O husu saida? Hau sei foo too hau nia reinu sorin.” 4Ester hataan, “Se liurai hanoin diak, husik liurai no Haman mai ohin loron ba festa nebee hau prepara ona ba nia.” 5Liurai dehan, “Haruka Haman mai lalais hodi ami bele halo tuir Ester nia liafuan.”
Nunee liurai no Haman mai festa ida nebee Ester prepara tiha ona. 6Bainhira liurai hemu hela tua uvas iha festa nee nia dehan ba Ester, “O hakarak saida? Hau sei foo. No o husu saida? Too hau nia reinu sorin, buat nee hau sei kumpri.” 7Ester hataan, “Buat nebee hau hakarak no hau husu mak nee: 8Se hau hetan grasa iha liurai nia oin, no se liurai kontenti atu foo hau nia hakarak, no halo tuir buat nebee hau husu, entaun husik liurai no Haman mai festa nebee hau sei prepara ba sira, no aban mak hau halo tuir liurai nia liafuan nee.”
Haman Atu Tara Mordekai
9Depois Haman sai ba iha loron nebaa ho laran haksolok no kontenti. Maibee bainhira Haman haree Mordekai iha liurai nia portaun katak nia la hamriik ka nakdedar tanba Haman, nunee Haman sai nakonu ho laran hirus hasoru Mordekai. 10Maski nunee, Haman kontrola aan. No bainhira nia too iha uma nia haruka ema bolu ninia kolega sira no ninia feen Zeres. 11Haman konta ba sira kona ba ninia riku-soin nia todan, ninia oan mane barak, oinsaa liurai promove nia, no oinsaa liurai foti nia sae aas liu liurai nia xefi no atan sira. 12Depois Haman dehan tan, “No liurai feto Ester, nia mos la husu mane ida atu tuir festa ho liurai nebee Ester prepara ona, só hau deit. No aban mos nia konvida hau baa hamutuk ho liurai. 13Maibee buat hotu nee saugati deit bainhira hau haree Mordekai, ema Judeu nee, tuur hela iha liurai nia portaun. 14Depois ninia feen Zeres no ninia kolega sira hotu dehan ba nia, “Haruka ema halo ai riin nebee aas too metru rua-nulu resin,#5:14 Ebreu ‘kubit lima-nulu’, nebee kubit ida mak 45cm. no aban koalia ho liurai hodi bele tara mate Mordekai iha nebaa. Depois baa ho haksolok hamutuk ho liurai ba festa nee.” Haman kontenti ho planu nee no nia haruka ema harii ai riin aas.
Copyright Kadi Timor. All rights reserved. Portions of scripture can be used without permission for the promotion of God's glory.