Ester 7
7
Ester Foo Sai Haman Nia Planu
1Entaun liurai no Haman tama ba festa ho liurai feto Ester. 2Iha loron segundu, bainhira sira hemu tua uvas iha festa nee, liurai husu fali ba Ester, “O hakarak saida, liurai feto Ester? Hau sei foo. No o husu saida? Too hau nia reinu sorin, buat nee hau sei kumpri.” 3Liurai feto Ester hataan, “Se hau hetan grasa iha ita boot nia oin, Oh liurai, no se liurai hakarak, hau husu katak liurai foo hau nia moris mai hau, no hau nia pedidu katak liurai foo hau nia povu mai hau. 4Tanba ema faan tiha ami, hau no hau nia povu, hodi destrui, hodi oho no hodi halakon. Se karik ema faan ami atu sai atan mane no atan feto deit, hau sei nonook hela, tanba terus nee la kompara ho problema nebee ami kria ba liurai.” 5Depois liurai Asueru husu ba liurai feto Ester, “See mak ema nee? No nia iha nebee? See mak hanoin iha nia fuan laran hodi halo hanesan nee?” 6Ester dehan, “Akuzadór no inimigu nebee iha hahalok aat nee mak Haman!” Nunee Haman sai tauk iha liurai no liurai feto nia oin. 7Liurai hamriik kedas hosi festa nebee hemu tua uvas nee, no nia tama ba palásiu nia jardin ho laran hirus. Haman hamriik no husu liurai feto Ester hodi salva ninia moris. Tanba nia haree katak liurai desidi ona atu halo buat aat ba nia. 8Liurai fila fali hosi palásiu nia jardin no tama ba fatin nebee sira iha festa tua uvas nian. No Haman monu aan dadauk ba kama nebee Ester toba. Entaun liurai dehan, “Nia abuza mos liurai feto iha hau nia oin iha uma nee ka?” No bainhira liafuan nee foin sai hosi liurai nia ibun, ema taka kedas Haman nia oin. 9Depois Harbona, nebee ministru ida, dehan iha liurai nia oin, “Tebes mos, Haman haruka ona ema harii ai riin aas too metru rua-nulu resin hodi tara mate Mordekai. Mordekai nee mak ema ida nebee koalia buat diak kona ba liurai. Ai riin aas nee hamriik hela iha Haman nia uma.” Entaun liurai dehan, “Tara nia iha nebaa!” 10Entaun sira tara mate Haman iha ai riin aas nebee nia prepara tiha ona ba Mordekai. Depois liurai nia laran hirus nee malirin fali.
Currently Selected:
Ester 7: BK
Highlight
Copy
Compare
Share
Want to have your highlights saved across all your devices? Sign up or sign in
Copyright Kadi Timor. All rights reserved. Portions of scripture can be used without permission for the promotion of God's glory.