Looma 8
8
Kunata kidziingu bunu buri Mpeeve Nzaambi
1Ngo mu lumalu, kwasaala mbwiilu mu mutsuundu ko, kuri babo bari mu Kiristo Yisu. 2Bukuri, ngisi ya Mpeeve, ya bumwooyo mu Kiristo Yisu, yayeki yakuula me mu ngisi ya masumu, na ya lufwa. 3Mangisi maketi kubangisina mimyo ko, bukuri maba mahele na makwa, mu ntoono muswinyi. Ngo Nzaambi waheeke Mwaana waandi, mu kifwafwani kya muutu ngaa-masumu, mu ntoono masumu, wabwiisa masumu mu nyutu ya muswiinyi, 4mpisi heki nsungumunu mu mangisi, yiba yakukusa mu beetu, turi mu kwedyaatila mu Mpeeve, nkani ka mu muswiinyi ko. 5Mukwongo, babo bari mu muswiinyi, bakwedyaatila bunu bu tiiri muswiinyi ; ngo, babo bari mu Mpeeve, bakwedyaatila bunu bu tiiri Mpeeve. 6Ndyaatulu ya muswiinyi yinataa ku lufwa, ngo ndyaatulu ya Mpeeve yinataa ku bumwooyo na ku kiyeengi. 7Hango nkuumbu, ndyaatulu ya muswiinyi yiri kitaatu na Nzaambi, yahele kutumuma mu mangisi ma Nzaambi, na yitsiitsa kubangisina ko. 8Babo bari mu muswiinyi kabatsiitsa kubweeye kuri Nzaambi ko.
9Beenu lwahele kuba mu muswiinyi, ngo luri mu Mpeeve, mbuti heki Mpeeve Nzaambi yadzakala mu beenu. Mbuti muutu wahele na Mpeeve ya Kiristo, lo nde kari wa Kiristo ko. 10Mbuti Kiristo wuri mu beenu, lo nyutu yafwa mu ntoono masumu, ngo Mpeeve yiluha bumwooyo, mu ntoono nsungumunu. 11Mbuti Mpeeve, ya wunde wafulukisi Yisu mu bafwa, yadzakala mu beenu, lo wunde wafulukisi Kiristo mu bafwa, sa kaha bumwooyo kuri manyutu meenu ma mfwiilu, mu Mpeeve yaandi yadzakala mu beenu.
12Mu didyo bampaangi, beetu turi na kibiimbu, ngo kari kuri muswiinyi ko, mu kuri ti tuba bamwooyo mu muswini. 13Mukwongo, mbuti luri bamwooyo mu muswiinyi, lo sa lwafwa ; ngo mbuti mu Mpeeve, lo ludzusiri biyiriki bya kimuutu, na sa lwaba bamwooyo. 14Bukuri, bobanso batwaalusu mu Mpeeve Nzaambi, babo ngo baala ba Nzaambi. 15Beenu lwahele kutaambula mpeeve ya bunkutu, mu kuri ti lubweese kuba na boomo : Ngo beenu lwataambula Mpeeve, yisa kuri ti luba baala ba Nzaambi, mu yo beetu tukoobikisaa ti : « Aba, Taata ! » 16Mpeeve yo-meene, yita kimbaangi kuri kiluunsi kyeetu, ti beetu turi baala ba Nzaambi. 17Mbuti turi baala, lo turi se bakondiri basaala : Bakondiri basaala dya Nzaambi, bakondiri kintwaari na Kiristo, mbuti heki tubamaa na nde, lo tuba se bakeembusu na nde.
Nkeembu yiri mu kwiisa
18Me nyitsima ti, mpasi dza lumalu, dzahele kuyelemene na nkeembu, mbasi tsuku yiba yayabakana kuri beetu. 19Bukuri, nsi yoyinso yiri mu kwekiingila, mu kinsukulu mutima, ntaangu mbasi tsuku, yiyabakana baala ba Nzaambi. 20Mukwongo, nsi yoyinso yayeki kunsa lutumu lwa mimyo myahele mufunu, kari mu ntiilu ya yo-meene ko, ngo mu ntoono wunde wayituma, mu nsiitu 21yiri ti, nsi yo-meene se, sa yaba yakuuluka mu bunkutu bwa mbiiyulu, mu kutaambula bunsaalisi bwa nkeembu ya baala ba Nzaambi. 22Ngo beetu tuyaari ti, nsi yoyinso yiri mu kwekuuma, na kwenyonyomoko mu misoongo mya mbutulu, natee mu lumalu. 23Kari yini nsi yo yikaka ko, ngo na beetu se tumwaabaka mintekesele mya Mpeeve ; beetu se mu beetu-meene, tukwekuuma mu kwekiingila ntaangu, yakuba baala ba Nzaambi, na ya nkuululu manyutu meetu. 24Bukuri, mu nsiitu beetu turi twabvuukusu ; ngo nsiitu dzibaanaa dzamonokono, lo dzisiiri nsiitu ko ; mukwongo, na wuri lo siiri nsiitu mu bikamono ? 25Ngo mbuti beetu tusa nsiitu mu bibyo biri twahele kumono, lo tukwekiingila mu nkindusulu mutima.
26Bunubwo se, Mpeeve yikwiisaana, mu kutubakisa mu bubolo bweetu, bukuri twahele kuyaaba kusaambila bunu buyelemini. Kasi Mpeeve nde-meene, wutunwanikinaa mu lusaambulu mu nkuumunu, yahele na bwa kubangukila. 27Wunde wufyongokinaa mitima myeetu, yaari buri bitsimi bya Mpeeve, bukuri wunwanikinaa bangisi mu lusaambulu, bunu butiiriri Nzaambi.
28Beetu tuyaari kuri ti, byobinso bisalisinaana, mu bubwe bwa batyaanaa Nzaambi, babo bakari kateele mbila, bunu buri bitaasi byaandi. 29Bukuri babo ba katekisiri kuyaaba, wabataasila mu kuba bafwanikina na mwaana waandi, mpisi nde kaba mwaana watete, ha kakati dya bampaangi balaka. 30Babo ba kataasiri, babo se kari kateele mbila ; babo bakari kateele mbila, babo se kari kalulukisa ; babo bakari kalulukisa, babo se kari kakeembese.
Bunene bwa ntiilu ya Nzaambi
31Ngo nki tuleelee mu mamo ? Mbuti Nzaambi wuri na beetu, lo na wubwiisa beetu ? 32Nde wuri kasii wuungula Mwaana wa nde-meene ko, kasi wamuyekiri mu ntoono beetu bobanso, lo dyaburi kahele kutuha byobinso kintwaari na nde ? 33Na wutsiitsa kufuunda basoolu kuri Nzaambi ? Nzaambi ngo mululukisi ! 34Na wubakesele mukanu ? Kiristo Yisu wafwiiri, ha yulu haho se wafulukiri, wuri ha lubakala lwa Nzaambi, na wuri mu kutunwanikinaa mu lusaambulu. 35Na wutuhaambila na ntiilu ya Kiristo ? Buri manyoongi, kinkuukulu, nkwamusunu, nzala, mpene, nsisi, bunu pele mbeesi yayila ? 36Bunu bu diri dyatinu :
« Mu ntoono ye, beetu turi ha busu bwa lufwa mpisi kiluumbu.
Beetu bayeki batuhololo bunu bimeeme,
bi bari mu kunata ku nzo yi bapaakilaa bibulu. »
37Kasi mu momanso mamo, beetu tubvuri kuba baluuluka, mu wunde watutya. 38Bukuri, me nyirikiri kuyaaba ti, hayuku lufwa, bumwooyo, bambasi, bangaa-lutumu, misamu mya lolo di, bunu mpe mya ntaangu yikwiisa, mpinu, 39kudzaangama, musundu, ti hayuku kiyiriki kikimi, ka kitsiitsa kuhaambula beetu ko, na ntiilu ya Nzaambi, yiri mu Kiristo Yisu, Mfumu yeetu.
Currently Selected:
Looma 8: ATBABC
Highlight
Copy
Compare
Share
Want to have your highlights saved across all your devices? Sign up or sign in
Alliance Biblique du Congo 2024