Looma 7
7
Kifwaani mu makweele
1Bampaangi, me kuri bari na nyaabulu ya mangisi nyiri mu kudzoonso. Buri beenu lwahele kuyaaba, ti mangisi mari na lutumu mu muutu, mu ntaangu yoyinso yi kari mu bumwooyo ? 2Mukasi wuri kunsa lutumu lwa mulumi, wubari bakaangama mu mangisi, mu ntaangu yiri mulumi wakiri mwooyo, ngo mbuti mulumi fwiiri, lo nde kuulukiri mu mangisi ma mulumi. 3Hango nkuumbu, mbuti mulumi wakiri mwooyo, ngo mukasi pariri na bakala dikimi, lo baleeriri ti nde ngaa-kimpala ; ngo mbuti mulumi fwiiri, lo mukasi bakiri bunsaalisi, ha busu bwa mangisi, kuri hayuku nde pariri na bakala dikimi, lo wahele kuba ngaa-kimpala. 4Beenu se bunubwo, bampaangi baami, beenu lwayeki lwafwa mu mangisi mu nyutu ya Kiristo, mu kuba ba muutu mukimi, wunde wafulukusu mu bafwa, mpisi tubeeneenu na bimbutu mu ntoono Nzaambi. 5Bukuri, mu ntaangu yitwaba twakiri kwedyaatila mu kimuutu, mantiilu ma masumu mu nzila ya mangisi, maba kwesalaana mu binamu byeetu, mu kubuta bimbutu binata ku lufwa. 6Ngo mu lumalu, twayeki twakuuluka mu mangisi, twafwa mu mi twaba twakaangama, kuri heki tuba bankutu mu kiteesu kyamono kya Mpeeve, kari mu kiteesu kyakikulu kya mukaanda ko.
Mangisi na masumu
7Ngo nki tuleele ? Buri mangisi ngo masumu ? Pele, kadiri bubwo ko ! Kasi, mbuti ka nzila ya Mangisi ko, nkani me nyahele kuyaaba masumu. Mukwongo, mbuti ka mangisi maleele kuri ti : « Yaa sa nyiimunu ko », nkani me nyaketi kuyaaba nyiimunu ko. 8Mu nzila ya mangisi, masumu mabaka mpwaanyi, ya kubuta mu me, nyiimunu dza bitsuumbu-bitsuumbu. Bukuri, mangisi mbuti mo pe, lo masumu mafwa. 9Mu ntaangu yayikulu, me nyanata kidziingu kwahele mangisi ; ngo mangisi bu mayisa, masumu mabweesiri kuba mamwooyo. 10Ngo me nyafwa ; dyamonokono kuri ti mangisi maketi kuha me bumwooyo, meki kunata ku lufwa. 11Bukuri mu nzila ya mangisi, masumu mabaka mpwaanyi ya kuwuna me, na ya kudzusa me.
12Mu didyo, mangisi matsyeemeke, na lutumu lwangisi, lwasuunguma na lwalubwete. 13Diri dyadibwe, buri lo dibutiri lufwa kuri me ? Pele, kadiri bubwo ko ! Ngo masumu, kumonokono ti masumu, mo mabuta lufwa kuri me mu nzila ya mamabwete, mpisi heki, mu nzila ya ntumunu, masumu mamonoko mu mpinu dzaandi.
Muutu kunsa lutumu lwa masumu
14Beetu tuyaari ti mangisi mari ma kimpeeve, ngo me nyiri na nyutu ya muswiinyi, bayeki banyarika kuri masumu. 15Mamo manyiri mu kuyirika, nyahele kubakula ; bukuri mari nyahele kutya kuyirika, mamo ngo ma nyiyirika, kasi mamo ma mberiri, mamo ngo ma nyiyirika. 16Ngo mbuti, mamo mari ntii ko, ngo ma nyiyirika, lo me ntaamburi ti mangisi mamabwete. 17Ngo mu lumalu, kari me nyibweese kuyirika mamo ko, kasi masumu mari mu me. 18Me nyaari ti mamabwe mahele mu me, bu ntiiri kuleele ti, mu muswiinyi waami. Nzala kuyirika mamabwe yiri mu me, kasi nyahele kubangisina kumayirika. 19Me nyahele kuyirika mamabwe mantiiri, kasi me kuyirika mamabi mari ntii ko. 20Mbuti mamo mari ntii ko, ngo ma nyiyirika, lo kari me nyibweese kumayirika ko, kasi masumu mari mu me.
21Me nyimono kiteesu kimaki : Ha ntiiri kuyirika mamabwe, kumonokono mamabi. 22Me nyimono kiminu mu mangisi ma Nzaambi, bunu buri muutu wa kunsa kati. 23Ngo me nyimono kiteesu kikimi mu binamu byaami, kiri mu kunwaanisa ngisi ya nyukulu yaami, na kukotoso me boroko dyangisi ya masumu, yiri kunsa binamu byaami. 24Kyaari kuri me ! Nani wunkuula mu nyutu yimayi yalufwa ? 25Matoondo kuri Nzaambi, mu Yisu Kiristo Mfumu yeetu !
Hango nkuumbu, mu nyukulu ya me-meene, me nyiri nkutu ya mangisi ma Nzaambi, ngo mu muswiinyi, nyiri nkutu ya mangisi ma masumu.
Currently Selected:
Looma 7: ATBABC
Highlight
Copy
Compare
Share
Want to have your highlights saved across all your devices? Sign up or sign in
Alliance Biblique du Congo 2024