Looma 9
9
Nzaambi na kaanda dikari kasoolo
1Me ngwanwa nyiri mu kudzoonso mu Kiristo, nyahele kufuta mpya ; nsimunu yaami yinteelele kimbaangi, mu Mpeeve Yangisi, 2ti me nyiri na ngebe dzalaka, na nyiri mu kwebama kunsa mutima waami mpisi ntaangu. 3Me nyitiisila mu me-meene, kuba kunsa mpopi, na kuba la na Kiristo, mu ntoono bampaangi baami, bampaangi baami ba mu kaanda dya muswiinyi, 4bapalila mu Iselili. Kuri bo, bari baha kiteesu kya kuba baala ba Nzaambi, nkeembu, ndelusunu, kikabu kya mangisi, kisalu kya lusaambulu, nsiilulu. 5Bataayi bari, Kiristo wapalila mu bo mu muswiinyi, nde wuri ha yulu byobinso ; Nzaambi wasakumunu mu bibvu ngo bibvu ! Amene !
6Ka kuri ko ti maampu ma Nzaambi, mayeki mawa mufunu. Bukuri bobanso bapalila mu Iselili, bari Iselili ; 7na babo bapalila mu Abarahami, bobanso kabari baala ba nde ko, kasi : « Mu Isaki, ye wubaka babo babateele ti, bapalila mu ye. » 8Mbangukulu ti : Kari baala ba muswiinyi ko, bari baala ba Nzaambi, kasi baala ba nsiilulu, bari mu lutaangu lwa bapalila mu nde. 9Mukwongo, mu lusiilulu luri maampu mamama : « Mbasi tsuku mu mantaangu maama, me sa nyiisa, na Saara, sa kaba na mwaana wamubakala. »
10Kari manamo kitsu ko, ngo Lebeka se, wabakiri yimi mu wunu Isaki, taayi dyeetu. 11Mukwongo, baala baba bakiri kubutuka pe, na baba bakiri bahele kuyirika mamabwe bunu pele mamabi, mpisi heki bitaasi bya Nzaambi binamitina kuba, bunu buri nsoololo yaandi ya bunsaalisi. 12Kari mu nzila ya biyiriki ko, ngo bunu bu tiiri wumuteele, Nzaambi waleele kuri Lebeka ti : « Mwaana wamukuutu sa kaba mu bunkutu, kuri mwaana nguri. » 13Bunu bu diri dyatinu :
« Me nyatya Yakobi, ngo nyabele Esawu. »
14Ngo nki tuleele ? Buri bubwo buri bubayi, Nzaambi kari na bwo ko ? Pele, kadiri bubwo ko ! 15Bukuri nde waleele kuri Moose ti : « Me sa nyabakila ngebe, kuri wunde wuntiiri kubakila ngebe ; na me sa nyaba na kyaari, mu wunde wuntiiri kumwiinina kyaari. » 16Hango nkuumbu, mimyo myahele mu miswa mya wunde wutiiri, bunu pele mya wunde wuyirika, ngo mu miswa mya Nzaambi wubakila ngebe. 17Bukuri, Matinu maleele kuri Faraho : « Mu didyo me nyatelemisi ye, mpisi heki mu ye, me nsoongo mpinu dzaami, na mpisi heki badzoonsolo nkuumbu yaami mu nsi yansiina. » 18Hango nkuumbu, kuri wunde wukatiiri kubakila ngebe, lo wumubakiri ngebe ; kuri wunde wukatiiri kukubisa mutima, lo wumukubisiri.
Nkesi na kyaari kya Nzaambi
19Hango, ye lo leeriri me ti : « Heki mu nki ntoono Nzaambi kakoobweesaa kuŋaŋina ? Na wuri lo tsiitsiri kutungukila kutya kwa nde ? » 20Heki ye muutu, na wuri mu kukaalisa mbeembu kuri Nzaambi ? Buri kisa lo kileeriri kuri mubuumbi ti : « Buri wuri wanyirikila bumabu ? » 21Buri mubuumbi wahele na lutumu, mu kuyirika mu tubuumbu twotumosi, kisa kya lukiinsu, na kisa kyahele kuba kya lukiinsu ?
22Ngo Nzaambi watiiri kusoongo nkesi dzaandi, na kuyaabisa mpinu dzaandi, wakiindisa mutima, mu nkindusulu yayinene mu bisa bya nkesi, bi bari bayirika mu ntoono ya mfukusulu. 23Nde watiiri se kuyaabisa busina bwa nkeembu yaandi, kuri bisa bikari kabakila ngebe, bi katekisiri kuyirika mu ntoono nkeembu yaandi. 24Beetu-meene turi, babo bakari kateele mbila, kari hani ha kakati dya Bayudayo kitsu ko, ngo se na ha kakati dya makaanda. 25Bunu bukari kaleele mu mukaanda Ose ti :
« Me sa nyateele, wunde wahele kuba kaanda dya me, ti kaanda dya me;
na mukyeetu wahele kuba nduku ya mutima, ti nduku ya mutima ;
26na ha kibeendu kibaba baleele kuri bo ti : "Beenu luri kaanda dya me ko",
haho sa babateele baala ba Nzaambi yamwooyo. »
27Esayi waleele mu ntoono Iselili ti : « Ti hayuku lutaangu lwa baala ba Iselili, luri bunu munyeenge wa mubu, lo mwaa ndaambu yisaala yiba yabvuukusu ; 28bukuri Mfumu sa kakukisa, maampu maandi momanso mu mawasu, ha butoto. » 29Bunu bwaba tekesele kuleele Esayi ti :
« Mbuti Mfumu ngaa-mikaangu, kasii tusisikila mwaa baatu bapalila mu beetu ko,
nkani twaketi kuba bunu Sodomo,
nkani twaketi kufwanikina na Ngomoro. »
Iselili na mvuukulu mu kanyi
30Hango nki tuleele ? Ti : Makaanda mahele kwenama nsungumunu, babaka nsungumunu ; nsungumunu yifumunaa mu kanyi, 31ngo Iselili wukwenama mangisi mu kubaka nsungumunu, wahele kubangisina mu mangisi. 32Bukuri nki ? Bukuri nde wahele kusakila mu kanyi, ngo mu biyiriki. Bo babumuna kya, mu « tari dya mbumukunu makya », 33bunu bu diri dyatinu ti :
« Mono, me nyisuusa mu Syooni, tari dya mbumukunu makya,
lweende dya mbwiisulu makubu.
Ngo wunde wusiila kanyi mu nde, kafwa nsoni ko. »
Currently Selected:
Looma 9: ATBABC
Highlight
Copy
Compare
Share
Want to have your highlights saved across all your devices? Sign up or sign in
Alliance Biblique du Congo 2024