Looma 4
4
Kifwaani kya Abarahami
1Hango nki tuleele mu Abarahami mwa-nkaaka yeetu ? Nki kari kataambula mu muswiinyi ? 2Mbuti Abarahami mu biyiriki kari walulukusu, lo wuri na miswa mu kuba na masiiku ; ngo kari ha busu bwa Nzaambi ko. 3Mukwongo, nki Matinu mari mu kuleele ? « Abarahami kasaana kanyi mu Nzaambi, mu didyo kari walulukusu. » 4Ngo kuri wunde wuri mu kusalaa, mufutu lo wahele kumonokono bunu bweese, ngo bunu kitotolo kikari na miswa. 5Kasi, kuri wunde wahele mu kusala, ngo wasa kanyi mu wunde wululukisaana wa mungooyi, lo kanyi dyaandi dimonokini mu nsungumunu. 6Mu didyo se, Daavidi kari mu kudzoonsolo mu lwambwe, lwa muutu wuri Nzaambi wumululukisaa kwahele biyiriki :
7« Kiminu kuri babo bataambula mpemisi mu lumvuki lwaaku,
na bari masumu maaku mahemusunu !
8Kiminu kuri muutu wunde wuri, Mfumu wahele kumutaangila masumu ! »
9Buri muutu wuri mu kiminu kikyo, wuni wayirika bubakala, ho ti wunde se wahele kuyiriku bubakala ? Mukwongo, beetu bu tuleele ti : « Kanyi dya Abarahami dyamonokini, bunu nsungumunu ». 10Mu nkya ntaangu kanyi didyo dyamonokini bubwo ? Mu ntaangu yiri weki wayiruku bubakala, ho ti mu ntaangu yiri wahele kiyiriku bubakala ? Pele ! Kari kuri wayirika ko, ngo kuri waba wakiri kuyirika pe. 11Nde wataamburi nyirukulu, bunu kinyemu kya ndulukulu mu kanyi dikasiiri, ha kaba wakiri kuyirika pe, mpisi kaba taayi dya bobanso basaanaa kanyi, bakiri bubakala kuyirika pe, kuri heki bo se, babamono bunu basuunguma. 12Na nde kaba taayi dya bayiriku bubakala, kari dya bani bayiriku bubakala ko, ngo se bakwenama bitaambi bya kanyi dya taayi dyeetu, Abarahami bu kaba wakiri bubakala kuyirika pe.
Nsiilulu dza Nzaambi dzi bataambulaa mu kanyi
13Mukwongo, kari mu nzila ya mangisi ko, ngo mu nzila ya ndulukulu mu kanyi, bari basa lusiilulu kuri Abarahami, bunu pele kuri bapalila mu nde, mu kuba mukondiri-saala dya nsi. 14Mukwongo, mbuti bakoondiri basaala, kubakula dyo mu mangisi, lo kanyi dyeki dyamukangala, na lusiilulu lusii ko. 15Bukuri, mangisi mabutaa nkesi ; haho ha hele mangisi, lo hahele se kusinina kwa mo.
16Hango nkuumbu, saala kubakila mu nzila ya kanyi, mpisi heki mu bweese lusiilulu luba lwatswiikama, kuri bobanso bapalila mu Abarahami, kari bani bapalila mu mangisi ko, ngo bapalila se mu kanyi dyaandi. Nde wuri taayi dya beetu bobanso, 17bunu bu diri dyatinu : « Me nyasa ye taayi dya makaanda malaka. » Nde wuri ha busu bwa Nzaambi, wukari kasiila kanyi, Nzaambi yibvutulaa bafwa mu bumwooyo, na wayirika bitotolo byonbinso biri bi beeri byope. 18Nde wasii kanyi, bu kasiiriri nsiitu mu mimyo myahele na bwakusiila nsiitu, mpisi kaba « taayi dya makaanda malaka », bunu bu diri dyaleele ti : « Bapalila mu ye sa baba balaka. » 19Nde kasii yekele kanyi dyaandi ko, ti bukuri waba weki mpaangi pe na nkama mibvu, miilu myeki mu bulu, na Saara mwooyo wafwa. 20Nde kasii yekele kanyi na kusa mpaka ko, mu nsiilulu dza Nzaambi, ngo wabaka makwa mu kanyi, na waha nkeembu kuri Nzaambi. 21Nde waba nkati na nsiitu dzakuka, ti Nzaambi wakuka mu kuyirika mamo, makari kasa nsiilulu. 22Hango nkuumbu, « mu didyo bari bamumono ti wasuunguma ». 23Mamo mahele kuba matinu, mu wunu nde kitsu ti : « Mu didyo bari bamwiina ti wasuunguma. » 24Ngo mu beetu se, bari bayelemini kumono bubwo, basiilaa kanyi mu wunde wafulukisi Yisu, Mfumu yeetu mu bafwa. 25Nde bamuyekele mu ntoono masumu meetu, na Nzaambi wamufulukisi mpisi tuba basuunguma.
Currently Selected:
Looma 4: ATBABC
Highlight
Copy
Compare
Share
Want to have your highlights saved across all your devices? Sign up or sign in
Alliance Biblique du Congo 2024