Looma 3
3
1Hango mufunu wakuba Muyudayo wuri hari, bunu pele ndaandu ya nyirukulu bubakala yiri hari ? 2Yiri yayinene mu momanso. Bukuri, kuri Bayudayo batekisiri kuha maampu ma Nzaambi. 3Heki mu nki ? Mbuti babamosi basii ba bakwiikama ko, buri kuhele kukwiikama kwa bo, lo kuyaariri nkwikumunu ya Nzaambi ? 4Pele, kadiri bubwo ko ! Nzaambi ngaa-ngwanwa, ngo mpisi muutu wuri na mpya, bunu bu diri dyatinu :
« Ye yelemini kuba wasuunguma mu nzoonsulu yaaku,
mpisi ye luuluka, ha bakutsuundisa. »
5Ngo mbuti kunsa bubayi bwa beetu, nsungumunu ya Nzaambi yimonokono, lo nki tuleele ? Buri Nzaambi kabakaa nkesi, lo weki ngaa-bubayi ? Me mu kimuutu nyiri mu kudzoonsolo. 6Pele, kadiri bubwo ko ! Lo dyaburi Nzaambi mbasi tsuku katsuundisila nsi ?
7Ngo mbuti mu mpya dza me, ngwanwa ya Nzaambi yimonokono na kyensekelee mu ntoono nkeembu yaandi, lo mu nki babweese kutsuundisa me bunu ngaa-masumu ? 8Hango, mamabi tuyirikee kweetu mpisi mamabwe miisa, kindeele babo bakwetufutukila, ti beetu turi mu kweeleele bubwo ? Mutsuundu wu bataambula bo, wayelemene mu bo.
Kwahele muutu wasuunguma
9Ngo nki ? Buri beetu tubvuriri bweese ti na bambaasi ? Pele ! Mukwongo, beetu twatswiikisiri ti : Na Bayudayo, na Bangereke bobanso bari kunsa lutumu lwa masumu ; 10bu diri dyatinu :
« Kuri muutu wasuunguma ko, kuri ti mosi ko,
11kuri ti mosi ko wuri na madyeele,
kuri ti mosi ko wukwesaka Nzaambi.
12Bobanso badziimbisa nzila,
mu kintwaari bobanso basaala mufunu ko ;
Kuri ti mosi ko wuyirikaa mamabwe,
nkati kwahele ti mosi.
13Miwiri mya bo, mampeembe mamwaasi,
bakwesalila ndima dza bo mu kwewuna,
mu bibori bya bo muri misya mya mpiri ;
14minwa mya bo myaluula mu mampopi,
na mu misamu myankari ;
15miilu mya bo myaleenge mu kwetsaamuna makila,
16mfukusulu na manyoongi biri mu manzila ma bo,
17bahele kuyaaba nzila ya kiyeengi.
18Kibvumi kya Nzaambi kyope ha miisu mya bo. »
19Tuyaari ti myominso mileele mangisi, mitariri bari kunsa mangisi, mpisi bobanso bakaanga minwa, na nsi yansiina yitaambula kibila ha busu bwa Nzaambi. 20Hango nkuumbu, kuri muutu ko wuba walulukusu mu biyiriki bya mangisi, bukuri mangisi yini nyaabulu masumu makoohaanaa.
Dyaburi Nzaambi kabvukusila baatu
21Mu lumalu, kwahele mangisi, kwamonokono nsungumunu ya Nzaambi, yiri mu yo, mangisi na babikiri bateele kimbaangi, 22nsungumunu ya Nzaambi, mu kanyi dya mu Yisu Kiristo, kuri bobanso basa kanyi. Bukuri kwahele nsobokoso : 23Mukwongo, bobanso bayirika masumu, na bahelele nkeembu Nzaambi, 24ngo nde wabalulukisa kwamungengi mu bweese, mu nzila ya nkuululu yiyo yiri mu Kiristo Yisu. 25Nde, Nzaambi kari kayakisa bunu kikori mu makila maandi, mu nzila ya kanyi, mu kusoongo nsungumunu yaandi, bu kahemisini masumu matekisiri, 26mu ntaangu ya nkindusulu mutima waandi. Nde wuri mu kusoongo nsungumunu yaandi, mu ntaangu ya lumalu, mpisi kaba wasuunguma nde-meene, na kaluulukisa wunde wuri na kanyi mu Yisu.
27Ngo masiiku mari hari ? Mari ko. Mu nkya ngisi ? Ya biyiriki ? Pele, ngo mu ngisi ya kanyi. 28Bukuri, beetu tutsimini ti, muutu wuri walulukusu mu kanyi, kwahele biyiriki bya mangisi. 29Buri Nzaambi ya bani Bayudayo yiri ? Buri kari ya makaanda se ko ? Bunubwo ! Ya makaanda se yiri. 30Ngo bukuri Nzaambi mosi kitsu, yiluulukisa mu kanyi, bayiriku bubakala, na bahele kuba bayirika. 31Ngo tuyisilee kwaandi mangisi mu ntoono kanyi ? Pele, kadiri bubwo ko ! Ngo beetu tutswiikisa mangisi.
Currently Selected:
Looma 3: ATBABC
Highlight
Copy
Compare
Share
Want to have your highlights saved across all your devices? Sign up or sign in
Alliance Biblique du Congo 2024