Mataayi 3
3
Nyikusulu ya Yowane Mubotiki
(Mal 1.1-8; Luk 3.1-18; Ywa 1.19-28)
1Mu biluumbu bibyo, Yowane Mubotiki wamonoko mu nsi yankatu ya Yuuda, mu kwebikisa ti : 2« Yiingee madyeele, bukuri Kimfumu kya mayulu kikokisiri. »
3Mu nde, Esayi mubikiri kaba dzoonsolaana, ha kabaleele ti :
« Mbeembu ya wunde wukwebikisa mu nsi yankatu, ti :
Yirikeenu munsaku Mfumu,
suungukeenu manzila maandi ! »
4Nde, Yowane, waba na kinkutu kya myoosi mya kamelo, na musweele wa mukaanda kibulu mu luketu lwaandi. Nde waba kwedya bambambala na maasi ma nyosi ya ku bitiiti. 5Bari mu Yerusalemi, mu Yuuda dyodinso na mu nkoonsi yoyinso ya Yorodaani, baba kweendaa kuri nde, 6na nde waba babotokaana mu nyari ya Yorodaani mu ntambukulu masumu maaku.
7Bu kamono Bafarisi balaka, na Basaduki babakwiisaana mu kuri ti nde kababotoko, wabaleele ti : « Kitsuumbu kya bampiri, na walusoongiri bwa kuyitikila nkesi dziri mu kwiisa ? 8Soongeenu biyiriki byayelemene na nyiingulu madyeele, 9na yaa lubeke kweleele mu beenu-meene ko ti : "Taayi dya beetu Abarahami." Bukuri me nyiluleele ti : Mu matari ma lo Nzaambi telemisi baala kuri Abarahami ! 10Kikuba kyeki kyasuusa ha yulu myaansi mya muti ; ngo mpisi muti wahele kubuta bimbutu byabibwete, lo wakutabula na wakutuba ku mbaawu. 11Me nyilubotoko mu maampa mu ntoono nyiingulu madyeele ; ngo wunde wukwiisa ku mambisa ma me, bvuriri makwa na me, me nyahele kukuka mu kusyoonono masapaatu ma nde. Nde sa kalubotoko mu Mpeeve Yangisi na mu mbaawu. 12Nde wuri na kiyengese mu kooko kwaandi, sa kakoombolo mbasi yaandi, sa kakutukisa mankono maandi ku yulu talaka, ngo sa kayoko bitiiti ku mbaawu yiri yadzimaa ko. »
Mbotokulu Yisu
(Mal 1.9-11; Luk 3.21-22)
13Yisu kafumuna ku Ngalile, wiisiri ku Yorodaani kuri Yowane, mpisi Yowane kamubotoko. 14Kasi Yowane wamutungukila, wamuleele ti : « Me nyiri na nzala kutaambula mbotokulu kuri ye ; kasi ye ngo weki kwiisa kuri me ? » 15Yisu wabvutula, waleele kuri nde ti : « Hemese mu lumalu ; bukuri bubwo bwayelemene kuri beetu na ye mu kukukisa nsungumunu yoyinso. » Haho, Yowane wataambula. 16Yisu na kumubotoko na kutoomboko ku nkoto ; na mono, mayulu madzibuma mu ntoono ya nde, na nde wamono Mpeeve ya Nzaambi yakulumuka, bunu beembe na yayisa ha yulu nde. 17Na mono, mbeembu yanangukini ku mayulu yaleele ti : « Wumawu ngo mwaana waami wa mutima ; mu nde me nyimonaa kiminu. »
Currently Selected:
Mataayi 3: ATBABC
Highlight
Copy
Compare
Share
Want to have your highlights saved across all your devices? Sign up or sign in
Alliance Biblique du Congo 2024