Mataayi 4
4
Nsindukulu dza Yisu
(Mal 1.12-13; Luk 4.1-13)
1Hanaho, Mpeeve yanata Yisu ku nsi yankatu, mpisi dyaabulu kamusindikila. 2Bu kakoto loomi mu biluumbu makuumi mana bya mwiini, na makuumi mana bya butsuku, ku manunu nde wakolo nzala. 3Musindikiri bu kakokosolo wamuleele ti : « Mbuti ye mwaana Nzaambi, leele ti matari ma makituka mampa. » 4Yisu wabvutula ti : « Diri dyatinu ti : "Muutu kari mbeele mwooyo mu mana mampa kitsu ko ; ngo se mu maampu momanso mapalaa mu munwa Nzaambi." » 5Haho, dyaabulu wamunata ku bvula dyangisi, na wamuteeteke ku yulu nsoongi Nzo-Nzaambi, 6na wamuleele ti : Mbuti ye mwaana Nzaambi, sonoko ku nsuku nsi ; bukuri diri dyatinu ti :
"Nde sa kaha lutumu kuri bambasi baandi mu ntoono ye,
na bo sa bakunaanguna mu myooko,
mu kubata ti kuulu kwa ye, kukwiisa kubumina kya mu tari."
7Yisu wabvutula kuri nde ti : « Diri dyatinu se ti : "Yaa sindikila Mfumu Nzaambi yaaku ko." »
8Dyaabulu wabweese kumunata ku yulu mulaandu nkati wadzaangama kwalaka, wamusoongo bimfumu byobinso bya nsi na nkeembu ya byo. 9Nde waleele kuri Yisu ti : « Me sa nyakuha byobinso bi, mbuti ye tsukumini me, na kunsaambila. » 10Hanaho Yisu waleele kuri nde ti : « Yisika, Saatana ! Bukuri diri dyatinu ti : "Mfumu Nzaambi yaaku ye yelemini kutsukumina, na nde kitsu yelemini kusaambila." » 11Haho, dyaabulu wamusiisa ; na mono, bambasi bakokosolo na bamusalila.
Yisu wabaandika kisalu kyaandi ku Ngalile
(Mal 1.14-15; Luk 4.14-15)
12Yisu kayuka ti Yowane bamukaanga, nde wayende ku Ngalile. 13Nde wasiisa Nadzareti na wayende kweedzakala ku Kaperenawumi, mu teke mubu, mu mankoonsi ma Dzabuloni na ma Nefetali ; 14mpisi mamo maleeriri mubikiri Esayi meende mu mana ; nde waleele ti :
15« Nsi ya Dzabuloni na nsi ya Nefetali,
nzila ya mubu, ku simu dya Yorodaani,
Ngalile ya makaanda !
16Baatu badzakala kunsa mampimbisi,
bamwiini buungi bwabunene ;
buungi bumonokini,
kuri babo badzakala mu nsi, na ha mposi yalufwa ! »
17Haho Yisu wabeke mu kwebikisa, na kweleele ti : « Yiingeenu madyeele, bukuri Kimfumu kya mayulu kikokisiri ! »
Yisu wateele balebi bana
(Mal 1.16-20; Luk 5.1-11)
18Bu kaba kweyende mu ndaambu mubu wa Ngalile, nde wamono bampaangi boolo, Simoni wubateelaa ti Peetelo, na Andere mpaangi yaandi, bari mu kutuba siinga mu mubu ; bukuri bo baba balebi. 19Yisu waleele kuri bo ti : « Namee me, na me sa nyasa beenu balebi ba baatu. » 20Hanaho, bo babwoongolo masiinga na bamunemi. 21Bu kayende ha mankula, wamono bampaangi boolo bakimi, Yaakobo bo na mpaangi yaandi Yowane, baala ba Dzebede, munsa bwaatu na Dzebede taayi dya bo, bari mu kuloondo masiinga ma bo. Nde ha kabateele mbila. 22Hanaho, bu basiisa bwaatu na taayi dya bo, bamunama.
Yisu wayikisa na watsinikisa babeeru
23Tumi Yisu wayende mu Ngalile yoyinso, mu kweyikisa munsa manzo ma nkutukunu ma bo, na kweyaabisa Musamu Wamubwete wa Kimfumu, na kwetsinikisa mabeeru momanso, na bipfuumi byobinso bya baatu. 24Mvuumfu yaandi yatsamukina mu Siri dyodinso. Bamutwalikila babeeru bobanso baba na mabeeru ma bitsuumbu ngo bitsuumbu, na ba kweluunga na mpasi, na baba na mampeeve mamabi, baba na bubeeru bwa kimbikila-ngoondo, baatu babobo binamu, na nde wabatsinikisa. 25Mampuumbu malaka mafumini ku Ngalile, ku mumvuka wa mabula kuumi, ku Yerusalemi, ku Yuuda na ku simu dya Yorodaani, maba kwemunamaana.
Currently Selected:
Mataayi 4: ATBABC
Highlight
Copy
Compare
Share
Want to have your highlights saved across all your devices? Sign up or sign in
Alliance Biblique du Congo 2024